Azərbaycanın Pakistandakı səfiri Əli Əlizadə bu ölkənin Silahlı Qüvvələrinin Birləşmiş Qərargah Rəisləri Komitəsinin sədri, general Nadim Raza ilə görüşüb.
Bu barədə Xeberle.com-a Azərbaycanın Pakistandakı səfirliyindən məlumat verilib.
General N.Raza Azərbaycanın Vətən müharibəsində əldə etdiyi
qələbənin, torpaqların işğaldan azad olunmasının Pakistanda da rəğbətlə
qarşılandığını vurğulayaraq bu münasibətlə səfirə təbriklərini çatdırıb,
Dağlıq Qarabağ məsələsində Pakistanın Azərbaycanın haqlı mövqeyini daim
dəstəklədiyini bildirib.
General, iki ölkə arasındakı olan qardaşlıq münasibətlərinin
inkişafından məmnunluğunu ifadə edərək, Azərbaycan Silahlı Qüvvələri ilə
təcrübə mübadiləsi, birgə təlimlərin keçirilməsi, qarşılıqlı səfərlərin
təşkili, hərbi, hərbi-təhsil və hərbi-texniki sahədə əməkdaşlığın davam
etdirilməsi və daha da möhkəmlənməsinə Pakistan Silahlı Qüvvələrinin
önəm verdiyini və bu istiqamətdə səylərin daha da artırılacağını
bildirib.
Azərbaycanın Pakistandakı səfiri Əli Əlizadə, Ermənistanın
Azərbaycana qarşı son təxribatları və 10 noyabr 2020-ci il tarixli birgə
bəyanatdan sonra bölgədə mövcud olan cari vəziyyət haqqında məlumat
verib. Azərbaycan və Pakistanın möhkəm təməllər üzərində qurulan və iki
qardaş xalqın iradəsini əks etdirən dostluq və əməkdaşlıq
münasibətlərinə malik olduqlarını bildirən səfir, bu münasibətlərin ən
əhəmiyyətli sahələrindən olan müdafiə, təhlükəsizlik və hərbi sahələrdə
də ölkələrimizin strateji tərəfdaşlığa malik olduğunu vurğulayıb və hər
iki ölkənin rəhbərliyinin səyləri və müsbət yanaşmaları nəticəsində qeyd
olunan sahələrdə də mütəmadi yüksəlişin müşahidə edildiyini qeyd edib.
Pakistanın Vətən Müharibəsi dövründə də Azərbaycanın yanında
dayanaraq ölkəmizin haqlı mövqeyini dəstəkləməsinin böyük məmnunluqla
qarşılandığını vurğulayan Ə.Əlizadə, göstərilən bu mənəvi və siyasi
dəstəyə görə Pakistan xalqına və Hökümətinə, eləcə də Pakistan Silahlı
Qüvvələrinə təşəkkürlərini çatdırıb.
Görüşdə, regionda sülh və sabitliyin təmin olunmasında Pakistan və
Azərbaycanın göstərdiyi səylər, eləcə də qarşılıqlı maraq doğuran digər
məsələlər ətrafında da fikir mübadiləsi aparılıb.
Xəbərdən istifadə edərkən istinad etmək vacibdir.
