10 dekabr 2021-ci il tarixində Sumqayıt şəhər Gənclər və İdman Baş İdarəsinin və Heydər Əliyev Mərkəzinin birgə təşkilatçılığı ilə Mərkəzdə Ümummilli Lider Heydər Əliyevin anım gününə həsr edilmiş tədbir keçirilmişdir.
Əvvəlcə qonaqlar Ulu Öndərin abidəsini ziyarət edərək önünə gül dəstələri qoymuşlar.
Sonra Mərkəzin foyesində dahi şəxsiyyət Heydər Əliyev haqqında qısa metrajlı video çarxa baxış keçirilmişdir.
Tədbir dəyirmi masa ətrafında davam etmişdir. İlk öncə Ulu Öndərin və torpaqlarımızın ərazi bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilmişdir.
Tədbiri giriş sözü ilə açan Baş İdarənin rəisi Elgün Hümbətov Ulu Öndər Heydər Əliyevin xilaskarlıq, quruculuq, öndərlik missiyasından, dövlət gənclər siyasətindən, gənc nəslə diqqət və qayğısından danışmışdır. Heydər Əliyevin ordu quruculuğu sahəsində apardığı islahatlardan danışan natiq Ali Baş Komandan İlham Əliyevin rəhbərliyi ilə Ordumuzun 44 günlük Vətən müharibəsində qazandığı tarixi zəfərin məhz Ümummilli Liderin müdrik siyasi kursunun məntiqi davamı olduğunu vurğulamışdır.
Tədbirdə çıxış edən Sumqayıt şəhər İcra Hakimiyyəti başçısının birinci müavini Teymur Səmədov Heydər Əliyevin ölkəmizə rəhbərliyi dövründə 16 dəfə Sumqayıta səfər etdiyini, onun tövsiyə və tapşırıqlarının şəhərin inkişafına böyük təkan verdiyini qeyd etmişdir. Bildirmişdir ki, bu gün isə ölkə rəhbəri cənab İlham Əliyevin tapşırığına əsasən şəhər rəhbərliyi tərəfindən Sumqayıtda genişmiqyaslı abadlıq-quruculuq işləri aparılır.
Digər çıxış edənlər Sumqayıt Regional Mədəniyyət İdarəsinin rəisi Rəşad Əliyev, Sumqayıt Veteranlar Şurasının sədri Sovet Şükürov, tərəqqi medalçısı, əməkdar bədən tərbiyəsi və idman xadimi Qərib Əliyev, Dini Qurumlarla İş üzrə Dövlət Komitəsinin Sumqayıt şəhər bölməsinin əməkdaşı Ülvi Məmmədov, Sumqayıtın Tarix Muzeyinin direktoru Aygün Zülfüqarlı, Xidmət Sahələri üzrə Sumqayıt Peşə Təhsil Mərkəzinin direktoru Gülşən Ömərova, 31 nömrəli tam orta məktəbin tarix müəllimi Raqif Şirinov, Yeni Azərbaycan Partiyası Sumqayıt şəhər Təşkilatının Gənclər və Könüllülər üzrə koordinasiya qrupunun koordinatoru Fəridə Qafarova Ümumilli Lider Heydər Əliyevin Azərbaycan dövlətinin və xalqının bütövlüyü uğrunda etdiyi fədakarlıqlardan, müstəqilliyimizin möhkəmləndirilməsi, dövlətçiliyimizin inkişafı və xalqın rifah halının yaxşılaşdırılması istiqamətində göstərdiyi əvəzsiz xidmətlərdən danışmışlar.
Xəbərdən istifadə edərkən istinad etmək vacibdir.
