"Yenidən namizəd olacağımı deyə bilmərəm, bunu zaman göstərər”
Bu ilin payızında 4-cü çağırış Milli Məclisin səlahiyyət müddəti başa çatır. Modern.az saytı deputatlardan ötən müddətdə seçki platformalarını necə yerinə yetirdiklərini, 2015-ci ildə yenidən namizədliklərini irəli sürüb-sürməyəcəklərini soruşub.
Bu dəfə suallara 41 saylı Sumqayıt birinci seçki dairəsindən deputat Leyla Abdullayeva cavab verir. 

- Deputatlığa namizəd olarkən seçki platformanızı necə qurmuşdunuz?

- Bilirsiniz ki, Milli Məclisə Yeni Azərbaycan Partiyasının namizədi kimi Sumqayıtdan seçilmişəm. YAP isə Azərbaycanın  ictimai-siyasi həyatında ən mühüm qurumdur. Təbii ki, platformamın müddəaları YAP ideyaları, onun prinsiplərinə əsaslanır. Seçicilər qarşısına da məhz bu ideyaları əsas götürərək çıxmışdım. Bildirmişdim ki, seçicilər üçün əlçatan olacam, daim onlarla ünsiyyət quracağam. Seçkiöncəsi görüşlərdə də bildirmişdim ki, məni hər zaman tapa biləcək, ünsiyyət qura biləcəklər. Mən isə onların müraciətlərini mərkəzi və yerli icra orqanları qarşısında qaldıracaq, onların maraqlarını qorumağa çalışacağam. Ümumiyyətlə, real, ciddi vədlər vermişdim, populist ifadələr işlətməmişdim. Çünki hər gün sumqayıtlılarla üz-üzə gəlirəm və verdiyim vədlərin məsuliyyətini başa düşürəm.
- Üzərinizə götürdüyünüz öhdəlikləri tam yerinə yetirə bilmisinizmi?

- Bunu yəqin ki, seçicilər daha dəqiq deyə bilərlər. Fikrimcə, bəli, etimadi doğrulda bilmişəm. Sumqayıtın ilk qadın deputatı kimi də üzərimə əlavə məsuliyyət düşürdü. Bunu da nəzərə alın. Sumqayıtın məsələlərini qaldırmağa çalışmışam. Bilirsiniz, ömrü boyu Sumqayıtda yaşamışam. Seçicilər evimi də, iş yerimi də tanıyırlar. Yaşadığım və işlədiyim ərazidən seçilmişəm, bu dairədə demək olar, hamı məni, ailəmi tanıyır. Atam, anam uzun illər Sumqayıtda işləyiblər. Atam Sumqayıt Yuyucu Tozlar zavodunun ilk direktoru olub. Anam həkim kimi fəaliyyət göstərib. İşlədiyim məktəb də dairəmizdədir, seçicilər günün istənilən saatında ora yaxınlaşa bilir, sadəcə, köməkçim  qeydiyyata alır, mən də vaxt təyin edib görüşürəm. Çalışıram ki, hər kəsi qəbul edim, səlahiyyətimdə olmasa belə, qaldırdıqları məsələləri müvafiq qurumlara, yaxud ayrı-ayrı şəxslərə çatdırım.
- Deputat seçildiyiniz dairədə hansı işləri görmüsünüz?

- Bilirsiniz ki, Sumqayıt daim prezident İlham Əliyevin diqqət mərkəzindədir. Burada gedən quruculuq işləri bilavasitə onun tapşırıqları ilə həyata keçirilir. Buna görə mən, seçicilərim, bütün sumqayıtlılar ona çox minnətdarıq. Deputatın işi konkret məsələləri dövlət orqanları, hökümət qarşısında qaldırmaqdır. Hesab edirəm ki, Sumqayıtla bağlı xeyli məsələni istər parlamentdə, istərsə də mərkəzi icra hakimiyyəti orqanları qarşısında qaldıraraq müsbət həllinə nail ola bilmişəm. Onlardan bir neçəsini qeyd edə bilərəm.Sumqayıtda qəzalı vəziyyətdə olan yataqxanalarla bağlı hökumətin hesabatı zamanı çıxış etdim. Yataqxanalardan biri qəzalı vəziyyətdə idi. 120 ailə qızalı vəziyyətdəki binada yaşayırdı. Hökumət reaksiya verdi, çox sağ olsunlar, tədbirlər planı hazırlandı, şəhər icra hakimiyyətinin aktiv iştirakı ilə oradakı insanlar başqa yerə köşürüldü, FHN bu işlə yüksək səviyyədə məşğul oldu.Yenə büdcə müzakirələri və hökümətin hesabatı zamanı "Stansiya Sumqayıt” adlı yaşayış massivinin məsələsini qaldırdım. Oradakı məsələlərin həlli üçün böyük maliyyə lazım idi. Çıxışımda oraya qəsəbə statusunun verilməsini təklif etdim, yollarla, tibb məntəqəsi ilə bağlı məsələləri qaldırdım. Eyni zamanda, baş nazir Artur Rasizadəyə yazılı şəkildə müraciət göndərib bu məsələlərdə yardımçı olmağını xahiş etdim. Səhiyyə Nazirliyi, İqtisadi İnkişaf Nazirliyi ilə əlaqə yaradıldı. Sağ olsun hökumətimiz, müraciət nəzərə alındı və qərara gəlindi ki, "Stansiya Sumqayıt” qəsəbəsində tibb məntəqəsinin tikintisi dövlət proqramı layihəsinə salınsın.41 saylı dairənin ərazisində olan məktəbin təmiri ilə bağlı baş nazirin, baş nazirin müavinlərinin yanında oldum, maliyyə ayrıldı və təmir işlərinə start verildi və artıq təmir bitib.Sumqayıt şəhər İcra Hakimiyyəti bir layihə hazırlamışdı, lakin onun icrasına böyük maliyyə vəsaiti lazım idi. "Acıdərə” adlanan axarla bağlı, onun boruya salınması üçün.  9,5 km uzunluğunda olan bu axar böyük problemlər mənbəyidir. Bu axara yeraltı və  çirkab sular axıdılır. Ekoloji problemlər yaranır. Bu problemi son büdcə müzakirələri zamanı qaldırdıq. Eyni zamanda, 17 yataqxananın təmirə ehtiyacı var. Bununla bağlı parlamentdəki çıxışımda hökümətə, maliyyə nazirliyinə müraciət etdim. Ümid edirəm ki, bu məsələlər də tezliklə həllini tapar. "Azərsu”cəmiyyəti qeyd edilən axarla bağlı layihəni də hazırlayıb, icra hakimiyyəti də hazırdır, maliyyə məsələsi də inaniram ki, həll ediləcək.Bakı-Sumqayıt yolundakı tıxac problemini qaldırdım, Nəqliyyat Nazirliyinə müraciət etdim. Deyə bilmərəm ki, məhz mənim çıxışımdan sonra nazirlik tərəfindən yolun genişləndirilməsi həyata keçirildi. Təklif etdim ki, Bakı-Sumqayıt arasında elektrik qatarlarının fəaliyyəti artırılsın. Mümkün olarsa, sürət qatarları sistemi qurulsun. Bildiyiniz kimi, bununla bağlı nazirliyin də müəyyən çalışmaları oldu. Zatən bizim işimiz bundan ibarətdir - məsələləri qaldırmaq, çatdırmaq.Bağçalardakı vəziyyətlə bağlı büdcə müzakirələri zamanı Maliyyə Nazirliyindən vəsait ayrılmasını xahiş etdik. 2014-cü il büdcəsində bu vəsait xeyli artırıldı. Bundan başqa, bir sıra müəssisələrin, əsasən də 41 saylı dairədə yerləşən təhsil müəssisələrinin təmiri məsələsini də qabartmışam, hökümət üzvlərindən xahiş etmişəm.  Siz ancaq Milli Məclisdə qaldırdığım məsələləri deyirsiniz, amma ayrı-ayrı orqanlar, nazirliklər, komitələr qarşısında qaldırdığım məsələlər də olub. İndiyəcən bunu deməmişəm, sağlamlığında problem olan şəxslərə mütəmadi kömək edirəm, imkanım daxilində onlara dəstək oluram. Bir sıra ailələr repetitorların xidmətləri əvəzində pul ödəyə bilmirlər. Belə şəxslərə kömək üçün öz nüfuzumdan istifadə edirəm, müəllimlərdən xahiş edirəm ki, həmin uşaqlarla məşğul olsunlar.Yəni qeyd etmək istəyirəm ki, Sumqayıtla, seçicilərlə bağlı qaldırılan məsələlərin bir hissəsi həllini tapıb, bir hissəsi icra mərhələsindədir, bir hissəsi də inanıram ki, həll ediləcək.Yeri gəlmişkən, "Milli mətbəx mədəniyyəti haqqında” qanun layihəsi hazırlayıb Mədəniyyət komitəsinə təqdim etmişəm. Unutmayaq ki, deputatın işi hər şeydən əvvəl qanunvericiliklə məşğul olmaqdan ibarətdir. Ümumiyyətlə, 20-dən çox təklifim artıq qanunlarda əks olunub. Bu, ilk dəfə seçilən deputat üçün az nəticə deyil.Bundan başqa, aktual, gündəmdə olan məsələlərə münasibət bildirməyə də çalışıram. 

- Çox zaman deputatlarımız seçicilərin istəklərinin həyata keçirilməsi istiqamətində işlər görsə də, seçicilər icra hakimiyyətləri ilə müəyyən problemlər yaşayırlar. Deputat olaraq, dörd il ərzində hansısa məsələdə icra hakimiyyəti ilə münasibətlərinizdə problem yaranıbmı?

 - Sumqayıt şəhər İcra Hakimiyyəti, onun başçısı Eldar Əzizovla işğüzar, yaxşı münasibətlərimiz var. Bilirsiniz ki, mən qanunverici hakimiyyətin nümayəndəsiyəm. Yəni səlahiyyət bölgüsü, iş bölgüsü mövcuddur. Mən icra hakimiyyətinin işinə müdaxilə edə bilmərəm, amma mütəmadi Eldar müəllimlə məsləhətləşirik.
 - Seçicilərlə görüşlərdə əsasən hansı məsələlər qabardılır? 
- Müxtəlif məsələlər olur. Sosial, hüquqi, məhkəmə qərarları ilə bağlı. Müraciətləri əsasən bu meyarlara görə qruplaşdıra bilərik. - Bu günə qədər sizə aidiyyatı olmayan məsələlərlə bağlı müraciətlər olubmu?

- Bəli, olur. Məsələn, bəzən rayonlardan olur. Belə olan halda həmin bölgələrdən  olan deputatlara yönləndirik. Məhkəmə qərarları ilə bağlı müraciət edirlər. İzah edirik ki, biz müdaxilə edə bilmərik, məsləhət görürük ki, apelyasiya, Ali Məhkəmə var, onlara müraciət edə bilərlər. Amma bizə aid olmasa belə, çalışırıq ki, istiqamət göstərək. 
- O zaman ən yadda qalan seçici məktubu, seçici müraciəti də olub. Mümkünsə, danışa bilərsinizmi?

- Elə bir qəribə hal xüsusi xatırlamıram.
- Növbəti parlament seçkilərində namizədliyinizi vermək fikriniz varmı? 
- Bilirsiniz, mən Yeni Azərbaycan partiyası tərəfindən namizəd kimi irəli sürülmüşəm. Yəni bu partiyamızın qərarından asılıdır. Mən deyə bilmərəm, zaman göstərər.