Gürcüstanın sabiq prezidenti Mixail Saakaşvili 2008-ci ildə Cənubi Osetiyada baş verən müharibə ilə Ukrayna münaqişəsini müqayisə edib. Ukrayna prezidentinin müşaviri vəzifəsində çalışan Mixail Saakaşvili Rusiyanın bölgədə yeritdiyi siyasəti acgöz timsahla müqayisə edib.

"Siz yoxlaya bilərsiniz, mən hələ 2008-ci ildə Rusiyanın növbəti hədəfinin Ukrayna və Krım olacağını demişdim”,-deyə Saakaşvili söyləyib. 

Gürcüstanın keçmiş başçısı Rusiya lideri Vladimir Putinlə 2004-cü ildə baş tutan görüşündən də söz açıb. Mixail Saakaşvili qeyd edib ki, Vladimir Putinlə birinci görüşü zamanı onlar arasındakı münasibət isti idi.

"Putin mənə deyirdi ki, Ukrayna sərbəst hərəkət edən dövlət deyil. Putin mənə deyirdi ki, NATO Baltikyanı ölkələri qoruya bilməyəcək. Bu zaman o, mənə ritorik bir sual da verdi: "Sən doğurdan düşünürsən ki, Qərb Baltikyanı kiçik ölkələrə öz qoşunlarını göndərəcək?” sualını verdi”.

Mixail Saakaşvili bildirib ki, Vladimir Putində dəqiq iş planı var və indiki ana qədər hər şeyi müşahidə edir, onu reallaşdırır. Gürcüstanın eks prezidentinin sözlərinə görə Cənubi Osetiyada müharibə olandan sonra Putinin davranışları dəyişib. "2008-ci ildə müharibə zamanı Putin hər hansı barışıq əldə olunmasına tərəfdar idi. Lakin 2008-ci illə müqayisədə Putin indi daha səbirsiz hərəkətlər edir”. 

Qeyd edək ki, bir müddət öncə Gürcüstanın sabiq rəhbəri Mixail Saakaşvili  Ukrayna prezidentinin ştatdankənar müşaviri təyin edilib. (modern.az)