Oktyabrın 13-də Sumqayıt şəhərində 44 günlük Vətən müharibəsində şücaəti ilə Azərbaycanın yeni ZƏFƏR TARİXİnə adını QIZIL hərflərlə yazan, 36 yaşı Cənnətdə qeyd olunan Şəhidimiz - MAHHXHQ, Gizir NƏSİBOV ELMAR ŞİRZAD oğlunun anım günü oldu.
Sumqayıt Şəhidlər Xiyabanında dəfn olunan qəhrəmanımızın anım günündə ilk əvvəl Şəhidlərin əziz xatirəsi ehtiramla yad edildi, ruhlarına dualar oxundu. Tədbirdə şəhidimizin ailə üzvüləri və yaxınları, şəhər ictimaiyyəti nümayəndələri, şəhid ailələrinin üzvləri, Elmarsevərlər iştirak edərək, məzara gül dəstələri qoyaraq, şəhidimizi xoş xatirələrlə andılar.
Tədbirin davamı şəhidimizin adına açılan ehsan süfrəsində davam etdi. E.Nəsibovun valideynləri - Şirzad bəy və Sürəyya müəllimə anım günündə onların yanında olan hər kəsə öz təşəkkürlərini bildirdilər.
----
Vətənin igid oğlu gizir Elmar Nəsibovu daha yaxından tanıyaq:
QISA ARAYIŞ: "Şahin gözlü” ləqəbli ELMAR ŞİRZAD oğlu NƏSİBOV 19.09.1987-ci ildə Sumqayıt şəhərində dünyaya gəlib. 1994-2005-ci illərdə Sumqayıt şəhər 14 saylı tam orta məktədə oxuyub. 1997-ci ildə Sumqayıt Şəhər Uşaq və Yeniyetmələrin Yaradıcılıq Mərkəzinin "Qarmon” sinfinə daxil olub və həmin sinfi 2002-ci ildə uğurla bitirib.
İdmanı çox sevən Elmar Nəsibov əvvəlcə "Karate”, 2002-2007-ci illərdə isə "Taekvondo” idman növləri ilə məşğul olub. Azərbaycan Taekvondo Federasiyasının üzvü olan yeniyetmə dəfələrlə şəhər və respublika üzrə keçirilən yarışlarda iştirak edib, müxtəlif mükafatlara layiq görülüb.
E.Nəsibov Səfərbərlik və Hərbi Xidmətə Çağırış üzrə Dövlət Xidmətinin Sumqayıt Şəhər İdarəsi tərəfindən 07.10.2005-ci il tarixdə həqiqi hərbi xidmətə yola düşüb. Əvvəlcə Qazax rayonunda, Andiçmədən sonra isə Qazax rayonunun Quşçu Ayrım kəndində yerləşən "N” saylı hərbi hissələrdə xidmət edib.
Hərbi xidmətdən sonra Milli Orduda qalıb, hərbiçi kimi fəaliyyətinə davam etməyə, Vətənin müdafiəsində iştirak etməyə qərar verən E.Nəsibov 2011-ci ildə Müdafiə Nazirliyinə müraciət edib. O, elə həmin il AR SQ-nin "Təlim və Tədris Mərkəzi”nin "MAHHXHQ hazırlığı” kursunu uğurla bitirib.
E.Nəsibov 2012-2014-cü illərdə Daxili İşlər Nazirliyinin Daxili Qoşunlarında, müddətsiz hərbi qulluqçusu kimi, Vətənə xidmət edib və sonradan ehtiyata buraxılıb. O, 15.07.2015-ci il tarixdən yenidən Milli Ordu sıralarına qayıdıb.
E.Nəsibov 2016-cı ildə Müdafiə Nazirliyinin Silahlı Qüvvələrinin "Təlim və Tədris Mərkəzi”ndə təşkil edilmiş "Snayper hazırlığının təkmilləşdirilməsi (SVD tüfəngi üzrə)” kursunun dinləyicisi olub. Snayperinə bağlı olan və silahını sevən gənc hərbçi sonradan İSTİQLAL, daha sonra isə USPE snayperi işlədib.
Doqquz illik hərbi fəaliyyəti dövründə Qazax, Şəmkir, Gədəbəy, Murov, Daşkəsən, Beyləqan rayonlarındakı hərbi hissələrdə xidmət göstərən E.Nəsibov yüksək döyüş hazırlığına, bacarıq və qabiliyyətinə, çevikliyinə, qayda-qanuna və nizam-intizama riayət etməsinə görə, dəfələrlə komandanlıq tərəfindən müxtəlif təltif və mükafatlara layiq görülüb.
2020-ci ilin sentyabr ayının 17-də Elmar Nəsibov dinləyicisi olduğu "Gizir hazırlığı” kursunu bitirərək, Silahlı Qüvvələrin Baş Qərargah rəisinin əmri ilə, "Gizir” rütbəsi alıb. Sentyabrın 18-də gənc zabit Beyləqana yola düşüb, oradan da hərbçi yoldaşlarıyla birlikdə birbaşa ön cəbhəyə yollanıb. Həmin müddətdə o, "Mexanikləşdirilmə” manqasının komandiri vəzifəsinə təyin olunub.
E.Nəsibov 27 Sentyabr 2020-ci ildə II Qarabağ savaşı başlanandan ön cəbhədə - Füzuli istiqamətində gedən döyüşlərdə iştirak edib.
Torpaqlarımızın düşmən tapdağı altında qalması ilə heç cürə barışmayan Vətənin qeyrətli oğlu E.Nəsibov 2020-ci il oktyabr ayının 12-də səhər tezdən Füzuli rayonunun Qaraxanbəyli kəndi uğrunda gedən döyüşlərdə düşmənlə mübarizədə mərdlik, şücaət nümayiş etdirir.
44 günlük müharibənin ilk günündən ön cəbhədə olan peşəkar kəşfiyyatçı- snayperçi Elmar Nəsibov düşmənə sarsıdıcı zərbələr endirən zaman düşmən tərəfindən vurularaq ağır yaralanır. O, hospitala çatdırılsa da, həyatla vidalaşaraq əbədi gözlərini yumur və Allah dərgahında ən uca məqama – Şəhidlik Zirvəsinə yüksəlir.
13 Oktyabr 2020-ci ildə Azərbaycan Ordusunun məğrur zabiti, gizir Elmar Nəsibov Sumqayıt Şəhidlər Xiyabanında dəfn olunur.
Azərbaycan Silahlı Qüvvələrinin qorxmaz, cəsur döyüşçüsü, Vətən sevdalı qəhrəman, 33 yaşlı kəşfiyyatçı-snayperçi, gizir Elmar Şirzad oğlu Nəsibov ölümündən sonra, Azərbaycan Respublikasının prezidenti İlham Əliyevin müvafiq Sərəncamlarına əsasən, "Vətən uğrunda”, "Füzulinin azad olunmasına görə” və "Döyüşdə fərqlənməyə görə” medalları ilə təltif olunub.
*Bu gün Şəhidimizin qızı Aylin bizlərə əmanətdir.
RED.: Bu gün Sumqayıt Şəhidlər Xiyabanını ziyarət edən hər kəs bir söz dedi: "Səninlə qürur duyuruq, Vətən oğlu! Sənin kimi oğulları olan VƏTƏN heç vaxt basılmaz!”.
Xeberle.com
Xəbərdən istifadə edərkən istinad etmək vacibdir.
