Şəhidimizin anası, uzun müddət mədəniyyət sahəsində çalışan, Abşeron-Xızı Regional Mədəniyyət İdarəsinin əməkdaşı və "Şəhid Analarına Dəstək” İctimai Birliyinin sədri Ceyran xanım Əbdülməcidin keçdiyi həyat və şərəfli döyüş yolundan, arularından söz açdı. O, belə bir gündə onun yanında olmaqla, mənəvi dayaq olan hər kəsə öz təşəkkürünü bildirdi. Daha sonra çıxış edənlər şəhidimizin vətənpərvərliyindən, fərqli xüsusiyyətlərindən, müsbət keyfiyyətlərindən söz açdılar. Ə.Axundovun təhsil aldığı 16 saylı məktəbin ibtidai sinif şagirdləri Vətən, Torpaq, İgidliklə bağlı şeirlər səsləndirdilər...

Ruhun şad olsun, Şəhidimiz! Sənin canın, qanın bahasına azad olunmuş torpaqlarda bu gün Azərbaycanın üçrəngli bayrağı qürurla dalğalanır! Məhz bugünkü tarixdə Ölkə Rəhbəri, Ali Baş Komandan Xocalıda, Xankəndində yenilməz bayrağımızı yükskliyə qaldırdı.

Arzularıniz çin oldu, QƏHRƏMAN OĞULLAR!!!

*2016-ci il aprelin 1-dən 2-nə keçən gecədən başlayaraq Azərbaycan və Ermənistan Silahlı Qüvvələrinin Qondarma Dağlıq Qarabağ Respublikasının hərbi birləşmələri arasında baş vermiş hərbi münaqişədə düşmənin hücumunun qarşısını alarkən qəhrəmancasına şəhid olan cəsur əsgər Əbdülməcid Axundovun həyat yoluna bir daha nəzər salaq:.

Qısa arayış: Əbdülməcid Nadirşah oğlu Axundov15.10.1993-cü ildə Sumqayıt şəhərində dünyaya göz açıb. 2000-2011-ci illərdəSumqayıt şəhər 16 saylı tam orta məktəbdə oxuyub. 2011-2015-ci illərdə Azərbaycan Texniki Universitetində"Energetika” fakültəsinin "Energetika mühəndisliyi” ixtisası üzrə təhsil alıb.

Sumqayıt Şəhər Hərbi Komissarlığından "Çağırış” vərəqəsi alan Ə.Axundov 21.07.2015-ci il tarixdə Gəncənin Üçtəpə kəndində yerləşən "N” saylı hərbi hissədə həqiqi hərbi xidmətə başlayıb. 3 aylıq təlimlərdən uğurla keçən gənc əsgər, Andiçmə mərasimindən sonra Tərtər rayonunun Şıxarx qəsəbəsindəki (Müəl.: Əvvəlki adı "Marquşavan”) hərbi hissədə xidmətinə davam edib.

2015-ci ilin dekabr ayında Ə.Axundov "çavuş” rütbəsi almaq üçün kursa qatılıb. 2016-cı ilin yanvar ayında "Manqa komandiri” təyin olunub. Qısa müddətdə döyüş hazırlığına, nizami qaydalara riayət etməsinə, davranışına və müsbət keyfiyyətlərinə görə, əsgər və zabitlərin rəğbətini qazanıb, Müdafiə Nazirliyi tərəfindən qol saatı ilə mükafatlandırılıb.

Ə.Axundov xidməti dövründə özünü diribaş, məsuliyyətli, hazırcavab, Vətəninə sonsuz məhəbbətlə bağlı olan qeyrətli oğul kimi tanıdıb. Hərbi xidmət onun üçün qeyrət, namus məktəbi olub. Qələbəyə inanan döyüşkən, cəsur əsgər düşmənə qarşı hücum komandasını hər an səbirsizliklə gözləyib...

----

Ə.Axundov 23.01.2016-cı ildə ongünlük məzuniyyətə buraxılır. Gec gəlməsindən ailə üzvlərinin narahatlığını görən əsgər, növbəti dəfə xəbərsiz gələcəyini söyləyir. Bəli, o, sözünün üstündə durur. Dediyi kimi, əzizlərinin yanına qəfildən gəlir, lakin heç kimin ağlına sığmayacaq bir şəkildə...

Novruz bayramı ərəfəsində, 13.03.2016-cı il tarixdə ailə gənc əsgərlə görüşə gedir. Bu, əzizlərinin Əbdülməcidlə son görüşü, son ünsiyyəti olur.

20 Mart 2016-cı ildə Vətən sevdalı oğul bayrağa bükülmüş şəklini anasına göndərir...

AİLƏ:Əbdülməcid Axundov dörd nəfərdən ibarət olan zəhmətkeş bir ailədə dünyaya gəlib. Ata halal zəhməti ilə ailəsini dolandırıb. Ana – Ceyran xanım uzun müddət mədəniyyət sahəsində çalışmaqla məsuliyyətli bir işin öhdəsindən gəlməklə yanaşı, ailə qayğıları ilə yaşayaraq övladlarından sevgisini, diqqət və qayğısını əsirgəməyib. Axundovlar ailəsində boya-başa çatan iki oğul vətənpərvər ruhda böyüyüb.

-----

Əbdülməcid hələ uşaqlıqdan yaraşıqlı, səliqə-sahmanlı, çılğın, hərəkətli, aktiv olub. İti yaddaşa malik olan yeniyetmə, dərslərinə məsuliyyətlə yanaşması, nitq qabiliyyəti, gözəl xətti ilə seçilib. Bütün fənləri yaxşı oxusa da, Tarix fənninə xüsusi marağı olub. elə buna görə də, tarixi kitabları həvəslə mütaliə edib, tarixi və hərbi filmləri böyük maraqla izləyib. Poeziya vurğunu olsa da, şeir əzbərləməyi heç sevməyib. İstiqanlı, qayğıkeş, hər kəsə qarşı diqqətcil olan Əbdülməcid həddən artıq dostcanlı olub. Kin-küdurətdən, paxıllıqdan, yersiz söz-söhbətdən uzaq olan yeniyetmənin xəmiri yaxşılıqdan, xeyirxahlıqdan yoğrulmuşdu. Qəlbinin saflığı, xoş təbəssümü, gözəl xüsusiyyətləri, ciddi xarakteri ilə hər zaman hər kəs tərəfindən sevilib.

Uşaqlıqdan vətənpərvər ruhda böyüyən Əbdülməcidin get-gedə arzu çələngi də böyüyürdü. Onun ən böyük arzusu hərbiçi olmaq, yağı düşməndən zəbt olunmuş torpaqları azad etmək idi. Hərbi dərslərdə xüsisi maraq göstərən Əbdülməcid Vətənin igid oğlu Mübariz İbrahimova həsr olunmuş kadrlara saatlarla baxsaydı belə, doymazdı. İdealına çevrilmiş qəhrəmanın həyat yolu onun üçün bir örnək idi. O, şərəfli bir yolun yolçusu olmaq arzusu ilə yaşayırdı. Yeri gəlsə, Vətən yolunda şəhid olmağa hazır idi!

Ə.Axundov xidmətə yola düşən günün qabaqkı gecəsi səhərəcən hərbidən danışır. Elə hey deyir ki, "Allah eləsin cəbhə bölgəsinə düşüm, vuruşum”. Allah onu istəyinə çatdırır. Andiçmə mərasimindən sonra ön cəbhəyə - Tərtər rayonuna göndərilən əsgərin sevincinin həddi-hüdudu olmur. Əynindəki förma ilə qürur duyan gənc əsgər özü də bilmir ki, artıq şəhidliyə gedən yolun bir addımlığındadır...

01.04.2016-cı ildə A.Əbdülməcid evlərinə zəng edir və qardaşını doğum günü münasibəti ilə təbrik edir. Bu, onun ailəsi ilə son danışığı olur...

2016-cı ilin aprel ayının 1-dən 2-sinə keçən gecə erməni silahlıları tərəfindən törədilən təxribata qarşı əks-hücum əmri veriləndə ilk önə çıxan əsgərlərdən biri də Əbdülməcid Axundov olur. İgid əsgər 02.04.2016-cı il tarixdə Tərtər istiqamətində gedən döyüşlərə qatılır. O, Seysulanın alınması uğrunda gedən döyüşlərdə xüsusilə fərqlənir. Döyüşlərin birində komandiri Azər Məmmədov ağır yaralanır və o, manqa komandiri kimi döyüşə rəhbərlik edir, igidliyi ilə öz hünərini göstərir. Bu savaşda o, silahdaşı, tələbə yoldaşı Elvin Mirzəyevlə birlikdə vuruşur. Gərgin keçən mübarizədə yaralansa da, bir an belə geri çəkilmir.

Qorxubilməz döyüşçü xeyli sayda düşməni məhv etməsinə baxmayaraq, yaralı halda düşmənə doğru irəli atılır. Döyüşün qızğın yerində özü kimi yaralı olan dostunu xilas etməyə çalışır və bu zaman hər iki cəsur döyüşçü namərd gülləsinə tuş gəlir. Köksü Vətən eşqi ilə çırpınan cəsur döyüşçülər bu savaşda qəhrəmancasına həlak olaraq, Allah dəgahında ən uca məqama – Şəhidlik Zirvəsinə yüksəlirlər. Onların nəşi tapılanda Əbdülməcidin əli dostunun topuğunda olur. Son nəfəsdə belə, dostlar bir-birinə etibarlı, sədaqətli olurlar...

Ə. Axundov 18 nəfər silahdaşı ilə bir həftə neytral zonada qalır. Beynəlxalq Qızıl Xaç Təşkilatının xətti ilə qəhrəman oğulların nəşi 08.04.2016-cı il tarixdə neytral ərazidən çıxarılır.

Azərbaycan Ordusunun qorxmaz, mətin, mübariz əsgəri Əbdülməcid Axundov 09.04.2016-cı il tarixdə Sumqayıt Şəhidlər Xiyabanında dəfn olunur.

Azərbaycanın ərazi bütövlüyü uğrunda gedən Haqq savaşında erməni işğalçılarına qarşı göstərdiyi igidliyə və şücaətə görə, Vətən sevdalı igid döyüşçü, 22 yaşlı əsgər Əbdülməcid Nadirşah oğlu Axundov ölümündən sonra, Azərbaycan Respublikasının prezidenti İlham Əliyevin müvafiq Sərəncamına əsasən, "Hərbi xidmətdə fərqlənməyə görə” 3-cü dərəcəli medalla təltif edilib.

Ruhun şad olsun, Cənnətməkan Şəhidimiz!!!

Aygün Hacıyeva,

AJB, AYB və AAB-nin üzvü