22 il əvvəl dünyaya bir oğul gəldi, valideynlər adını "Rüfət” qoydular, taleyini Uca Allah yazdı. Heç kimin ağlına gəlməzdi ki, bir gün bu, nur çöhrəli, qəlbi təmiz, fitri istedadlı bəndəni Yaradan ən böyük mükafata layiq görəcək, milyonların arzusunda olduğu Cənnətin sakini olacaq bu yeniyetmə...

15.10.2023-cü il. Sumqayıt Şəhidlər Xiyabanında 44 günlük Vətən müharibəsində şücaəti ilə adını Zəfər tarixinə silinməz mürəkkəblə həkk edən igid Vətən oğlu - əsgər Rüfət Əhmədzədənin anım gününün işığına toplaşdı Rüfətsevərlər. Kiçikdən-böyüyə hər kəsin sevgi və rəğbətini qazanan Rüfətlə bağlı xatirələr bitib-tükənmədi. 31 saylı məktəbin müəllim kollektivinin və şagirdlərin iştirakı, çıxışları tədbirə xüsusi rəng qatdı. Rüfətin müəllimləri, sinif yoldaşları, dostları, silahdaşları, qazilər...onun haqqında ağızdolusu xoş sözlər söylədilər, şücaətindən danışdılar.

Sonda şəhidin anası Ruhiyyə xanım belə bir gündə onunla olduqlarına, oğlunu xoş xatirələrlə yada saldıqlarına görə təşrif buyurmuş hər kəsə öz dərin minnətdarlığını bildirdi.

Bəs, görəsən, kimdir könülləri oxşayan 22 yaşlı bu igid – əsgər Rüfət Əhmədzadə? Gəlin, Qəhrəmanın keçdiyi şərəfli yola nəzər salaq:

----------

RÜFƏT ƏBÜLFƏT oğlu ƏHMƏDZADƏ 15.10.2001-ci ildə Sumqayıt şəhərində dünyaya göz açıb. 2007-2017-ci illərdə Y.Məmmədəliyev adına 31 saylı tam orta məktəbdə təhsil alıb. İngilis və rus dillərini mükəmməl bilib, müəyyən səviyyədə kompüter bilgisinə malik olub.

Rüfət Əhmədzadə 2017-ci ildə Tür­kiyə Respublikasında Kastamonu Universitetinin "İqtisadi və idari bilimlər” fakültəsinə daxil olub. İlk öncə Vətən qarşısında borcunu yerinə yetirməyi, daha sonra təhsilini davam etdirməyi düşünən gənc, təhsilini yarımçıq qoyaraq Vətənə dönüb.

Vətən sevgisi köksünə sığmayan, bir çox sahələrdə fitri isteda malik olan R.Əhmədzadə hər zaman xarici qonaqlara Azərbaycanın tarixi, gözəl adət-ənənələri haqqında danışıb, mədəniyyətimizi, musiqimizi... təbliğ edib.

R.Əhmədzadə 23.10.2019-cu ildə həqiqi hərbi xidmətə yola düşüb. Əvvəlcə Goranboy rayonundakı, And­içmədən sonra Tərtər rayonunun İsmayılbəyli kəndindəki "N” saylı hərbi hissələrdə xidmət edib. O, xidməti dövründə təlim-tərbiyəsi, nizam-intizamı, hazırlıq səviyyəsi, tapşırıqların yerinə yetirilməsində cəldliyi ilə se­çi­lə­rək hərbi heyətin rəğbətini qazanıb.

11.03.2020-ci ildə gənc əsgər "2020-ci ilin 1-ci tədris dövründə "Ən yaxşı istehkamçı” adı uğrunda yarışda 2-ci yerə layiq görüldüyünə görə”, hərbi hissə rəhbərliyi tərəfindən Fəxri Fərmanla təltif olunub.

Vətən müharibəsi başlananda sevincini gizlədə bilməyənlərdən biri də R.Əhmədzadə olub. O, bu məqamda hərbi xidmətdə olduğuna görə özünü şanslı sayıb. Torpaqların azadlığı uğrunda gedən Haqq savaşında onun da deyəcək sözü vardı...

Ə.Rüfətin anası ilə son danışığı 20.09.2020-ci il tarixdə olur...

30.09.2020-ci ildə Tərtər rayonunun Şıxarx qəsəbəsində düşmənə qarşı qızğın döyüş başlanır. Azərbaycan Ordusunun məğrur, mübariz əsgər və zabitləri döyüşdə əzm və qətiyyət nümayiş etdirərək mənfur qonşuların layiqli cavablarını verirlər. Bu igidlərin arasında Əhmədzadə Rüfət də olur.

Gərgin mübarizədən sonra əsgər və zabitlər sığınacağa qayıdırlar. Bu zaman qəfil atılan minamyotun qəlpələrindən gənc əsgər ayağından, əlindən və başından yaralanır. Qanaxma nəticəsində Vətənin qəhrəman oğlu gözlərini əbədi yumaraq Allah dərgahında ən uca məqama – Şəhidlik Zirvəsinə ucalır.

Çox sevdiyi payız fəs­lində dünyaya gələn Ə.Rüfət, elə payız fəslində də şəhadətə yüksəlir. 15.10.2020-ci ildə igidimizin 19 yaşı olacaqdı, cəmi 15 gündən sonra...

Azərbaycan Ordusunun cəsur, qorxmaz əagəri Rüfət Əhmədzadə 01.10.2020-ci il tarixdə Sumqayıt Şəhidlər Xiyabanında dəfn olunur.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qo­yulmuş tapşırıqların icrası zamanı vəzifə borcunu şərəflə yerinə yetirən, Azərbaycan Silahlı Qüvvələrinin 18 yaşlı cəsur əsgəri Rüfət Əbülfət oğlu Əhmədzadə ölümündən sonra, Azərbaycan Respublikasının prezidenti İlham Əliyevin müvafiq Sə­rəncamına əsasən, "Vətən uğrunda”, "İgidliyə görə” və "Suqovuşanın azad olunmasına görə” medalları ilə təltif olunub.

Ruhun şad olsun, Cənnətməkan Şəhidimiz!!!

Aygün Hacıyeva,

jurnalist, yazıçı-publisist