ZaminXəqani oğlu Abbasov

(Baş leytenant)

Qısa arayış:Abbasov Zamin Xəqani oğlu 8 mart 1993-cü ildə Qubadlı rayonunda anadan olub. 1993-cü ilin 31 avqust tarixində Qubadlı rayonu Ermənistan Silahlı Qüvvələri tərəfindən işğal olunduqdam sonra Abbasovlar ailəsi, məcburi köçkün kimi, Sumqayıt şəhərində məskunlaşıb. Z.Abbasov 2000-ci ildə Sumqayıt şəhərində yerləşən Qubadlı rayonu Mehman Ağayarov adına Kavdadıq kənd orta məktəbində 1-ci sinfə gedib.

Uşaq yaşlarından Zamin yaşıdlarından ağlı, zəkası ilə seçilib. Məktəbdə oxuduğu zaman musiqiyə maraq göstərdiyindən, Sumqayıt şəhər S.Rüstəmov adına 2 saylı musiqi məktəbinin "Tar” bölməsində təhsil alıb və məktəbi yüksək qiymətlərlə bitirib. Zaminin tarda Azərbaycanın xalq musiqilərini duyaraq mükəmməl ifa etməsi hər kəsi heyran edib. Musiqi duyumu güclü olan yeniyetmə, bəlkə də tarın simlərinə toxunaraq könlünün həzin tellərinin simfoniyasını dilə gətirib. Kim bilir… Bəlkə də, bu anlarda o, ətrafda hər şeyi, hər kəsi unudaraq, öz sehirli dünyasında xəyalların ağuşunda xoşbəxt dəqiqələrini yaşayıb…

Zamin 5 yaşından 8-ci sinifdə oxuyanacan Sumqayıt şəhər 24 saylı tam orta məktəbin nəzdində fəaliyyət göstərən "Cüdo” idman növü ilə məşğul olub. Atasının əllərindən bəkr-bərk tutan balaca oğlan böyük həvəslə məşqlərə gedib.

Ana:"Evdə sındırmamış bir şey, qab-qacaq qalmamışdı. Çox məsuliyyətli, məqsədli idi. Əslində Zamin hərtərəfli, istedadlı uşaq olub. Tara, güləşə, hətta şahmata da gedib. Hətta məktəbin direktoru da demişdi ki, "Sevda xanım, bu uşağı o qədər yükləyirsiz ki”. Bütün bunlara baxmayaraq, Zamin bir dəfə də olsun, gileylənməyib, "yoruldum” deməyib”.

Zamanla böyüyən oğlan az bir zamanda məşqçisinin diqqətini cəlb edir. Zamin artıq yarışlarda iştirak etməyə başlayır və uğurlara imza atır. Qazandığı nailiyyətlərə görə, dəfələrlə Fəxri Fərman, Diplom və medallara layiq görülür.

Bütün sahələrə maraq göstərən, fitri istedadlı və bacarıqlı yeniyetmə hələ məktəbdə oxuduğu illərdə özünün gələcək yolunu seçir.

Ana: "Oğlumu həkim görmək istəmişəm. Səkkizinci sinifdə oxuyanda mənə dedi ki, "sən nə istədin mən etdim, indi isə mənim arzularıma qarşı çıxma, mən hərbi məktəbə getmək istəyirəm”. İstəyini razılıqla qarşıladıq. Çox yaxşı oxuduğuna görə, məktəbdən sənədlərini vermək istəmirdilər...”.

Z.Abbasov arzsunun arxasınca getmək üçün, səkkizillik təhsildən sonra sənədlərini C.Naxçıvanski adına Hərbi Liseyə verir və daxil olur. 2008-2011-ci illərdə liseydə təhsil alan yeniyetmə, liseyi tam orta təhsillə bitirirərək Attestat alır. 2011-ci ildə Z.Abbasov sənədlərini H.Əliyev adına Azərbaycan Ali Hərbi Məktəbinə verir və 372 bal toplayaraq daxil olur. İllərlə xəyal etdiyi arzusuna qovuşan Zaminin sevincinin həddi-hüdudu olmur. Dərslərinə ciddi yanaşan,qayda-qanuna, nizam-intizam qaydalarına riayət edən Zamin, həmçinin xoş xasiyyətinə, təlim-tərbiyəsinə, qabiliyyətinə görə qrup yoldaşlarının və müəllimlərin hörmət və rəğbətini qazanır.

Z.Abbasov 2014-cü ildə Müdafiə Nazirliyinin xətti ilə, Hərbi Məktəbin nəzdində "Sürücülük kursu”nu bitirir. O, 2015-ci ildə təhsilini "Mexanika mühəndisliyi” ali peşə ixtisas dərəcəsi ilə başa vurur.

Zaminin hərbiçi olmaq seçimində atasının da çox böyük rolu olmuşdu. O, ağlı kəsəndən atasını hərbi formada görmüşdü. Belə ki, Xəqani bəy I Qarabağ müharibəsində iştirak edərək, düşmənə qarşı mədliklə mübarizə aparmışdı. O, evdə tez-tez isti ata ocağından, nəsil-kökündən söz açar, yağı düşmənin xalqımızın başına gətirdkləri müsibətlərdən, zülümlərdən, insaniyyətliyə sığmaz vəhşiliklərindən ürək ağrısı ilə danışardı. Müharibədə Azərbaycan Ordusunun cəsur döyüşçülərinin şücaətini xüsusi vurğulayan ata, şəhid olmuş silahdaşlarını köks ötürərək yada salardı. Həmçinin Zamin səkkizinci sinifdə oxuyanda dayısı oğlu C.Naxçıvanski adına Hərbi Liseyə daxil olur. O, qohmunun əynində hərbi formanı görəndə qəlbi çırpınır, yaxşı mənəda ona qibtə də edirdi.

Ana:"Qardaşım oğlu Zamindən bir il qabaq hərbi liseyə daxil oldu. Onun əynində formanı görəndə sanki havalanırdı. Ağlayırdı ki, "mən ancaq hərbiçi olmaq istəyirəm”. O, hərbi məktəbə qəbul olanda uşaq kimi sevinirdi. O sevinci ifadə etməkdə söz də acizdir. O, bu peşəni həddən artıq sevirdi”.

Gənc hərbiçi 2015-ci ildə təhsilini uğurla başa vurduqdan sonra, ilk təyinatı Xocavənd rayonuna olur.

Z.Abbasov Azərbaycan Silahlı Qüvvələrinin Təlim və Tədris Mərkəzində 03.08.2015-ci il tarixdən 26.12.2015-ci il tarixədək fəaliyyət göstərən "Motoatıcı taqım komandiri” kursunu bitirir və Zabit ixtisas kursu üzrə Sertifikat alır.

2016-cı ilin Şanlı Aprel döyüşlərində iştirak edən Z.Abbasov düşmən qarşısında öz sözünü mətinliklə deyir. Aprel hadisələri cəbhədə bir dönüş yaradaraq, insanların qəlbindəki ümid qığılcımını daha da alovlandırdı. İgidimizin anası Sevda xanım deyir ki, "o, elə sevinirdi o ərəfədə… Deyirdi, "ay ana, belə getsə, hətta Qubadlını da alarıq”.

2016-cı il Aprel döyüşləri zamanı xüsusi şücaətinə görə, Z.Abbasov rəhbərlik tərəfindən "Döyüşdə fərqlənməyə görə” medalı ilə təltif edilir. Döyüşlərdən sonra gənc zabit yenidən Xocavənddə hərbi xidmətinə davam edir. 2020-ci ilin avqust ayında o, Ağcabədiyə göndərilir.

27 Sentyabr 2020-ci ildə Ali Baş Komandanın düşmən təxribatına qarşı əks-hücum əmri ilə başlanan II Qarabağ müharibəsində Vətənin qeyrətli oğlu Zamin Abbasov da iştirak edir. O, Füzuli, Cəbrayıl, Hadrut, Zəngilan, Qubadlı, Laçın… istiqamətində gedən döyüşlərdə mərdliyi, igidliyi ilə seçilir.

Ana:"Zaminin Vətən müharibəsində göstərdiyi şücaətlərdən hərbiçi yoldaşları ağızdolusu danışırlar. Deyirlər ki, hələ belə bir şey olmayıb, o, döyüşə neçə nəfərlə gedibsə, qanlı savaşdan sağ-salamat çıxıbılar; nə şəhid verib, nə yaralanan olub. Bölük komandiri kimi, əsgərlərini daima qoruyub”.

Cəsur döyüşçü Füzuli uğrunda gedən döyüşlərin birində minomyotun qəlpələrindən zədə alır, kontuziya olur. Onu təxliyə eləmək istəsələr də, qəti şəkildə etiraz edir və deyir: "Mən getsəm, uşaqlarıma nəsə ola bilər”. Fikri hər an əsgərlərinin yanında olan bölük komandiri öz səhhətini belə düşünmür. 44 günlük müharibə Zəfərlə bitdikdən sonra Z.Abbasov, döyüş zamanı aldığı zədəylə bağlı, 3 ay müalicə kursu keçir. Psixoloji durumu stabilləşəndən sonra o, xidmətini Qubadlının Mahruclu kəndində yerləşən hərbi hissədə davam etdirir.

Azərbaycan Ordusunun məğrur zabiti ZaminAbbasov Vətən müharibəsindən sonra Ölkə Rəhbərinin müvafiq Sərəncamları ilə, "Vətən müharibəsi iştirakçıısı”, "Hərbi xidmətdə fərqlənmətə görə”, "Cəbrayılın azad olunmasına görə”, "Qubadlının azad olunmasına görə” və "Laçının azad olunmasına görə” medalıarı ilə təltif olunur.

2022-ci ilin sentyabr ayında düşmən növbəti təxribata əl atandaZ.Abbasov Ağdərə istiqamətində gedən döyüşlərdə mənfurların layiqli cavabını verir. Daha sonra o, yenidənxidmət etdiyi hərbi hissəyə - Qubadlının Mahruclu kəndinə qayıdır.

AİLƏ: Ata - Abbasov Xəqani Kikrar oğlu əslən Qubadlı rayonundandır. İxtisasca quraşdırıcı çilingərdir, uzun müddət SOKARda və digər şirkətlərdə çalışıb. I Qarabağ müharibəsi qazisi olan Xəqani bəy 3 ildir ki, xəstəliklə bağlı, əmək fəaliyyəti ilə məşğul olmur.

Ana – Abbasova (Allahverdiyeva) Sevda Nurəli qızı 1964-cü ildə Bakı şəhəri Lökbatan qəsəbəsində anadan olub. 1966-cı ildə ailəsi Sumqayıt şəhərinə köçüb. Sevda xanım 27 il Sumqayıt Enerji-Quraşdırma İdarəsində "Kadrlar şöbəsinin müdiri” vəzifəsində çalışıb. Şəkər xəstəliyindən əziyyət çəkən zəhmətkeş xanım 2-ci qrup əlildir.

Xəqani bəyin ailəsi Qubadlı rayonunda yaşayıb. Sevda xanım tez-tez rayona nənəsigilə gedərdi. Burada gənclər bir-birini görüb tanış olurlar. 1992-ci ildə gənclər Sumqayıt şəhərində ailə həyatı qurduqdan sonra Qubadlıya gedirlər. 1993-cü ilin avqust ayında Qubadlı rayonu işğal olunduqdan sonra gənc ailə Sumqayıta gələrək, məcburi köçkün kimi Sumqayıt şəhərində yerləşən 56 saylı uşaq bağçasında məskunlaşır. Baş verən hadisələr nə qədər üzücü olsa da, Zamin (08.03.1993-cü il) və Zahidin (03.11.1999-cu il) dünyaya gəlişi Abbasovlar ailəsinə əvəzolunmaz bir sevinc bəxş edir.

Zaman sürətlə ötüb keçir. Bir gün ana oğlunu evləndirmək, evinə gəlin gətirmək arzusunu gerçəkləşdirmək istəyir.

Əslən Kürdəmirdən olan Aidə xanım Sumqayıt Tibb Kollecində "tibb bacısı” ixtisası üzrə təhsil alırdı. Xəstəxanaların birində təcrübə mübadiləsində olanda Sevda xanım onu görüb və çox bəyənib. Qıza oğlunu evləndirmək istədiyini bildirən ana, Zaminin şəklini ona göstərir. Yanaqları allanan gənc qız utanaraq heç bir söz demir. Sonradan Zaminlə Aidə telefonla əlaqə saxlayırlar. Beləcə, ünsiyyət, yaxından tanışlıq yeni bir ailənin təməlini qoyur. Və bu evlilikdən 30.10.2021-ci il tarixdə balaca Turan dünyaya gəlir. Oğlu ilə həyatının ən gözəl anlarını yaşayan qəhrəmanımız, o dəqiqələrdə bütün yorğunluğunu unudar, rahatlıq tapardı...

-----------------

19.09.2023-cü il tarixdə səhər saatlarında Azərbaycan Respublikasının Qarabağda lokal xarakterli antiterror tədbirləri keçirilir... Bu əməliyyat zamanı düşmən gülləsinə tuş gələn, qəlbi arzularla dolu olan gənc zabit Zamin Abbasov qəhrəmancasına həlak olaraq əbədi gözlərini yumur...

...Zamin sonuncu dəfə 19.09.23-cü il taririxində anasına mesaj yazır. Telefonun mesaj yerində saat 02:44-ü göstərir. "Can, gözəl anam, səni çox sevirəm…”. Daha sonra ananın yazdığı iki mesaj: "Bu dünyada məni yaşadan sizin mənə sevginizdir”, "mən bilirəm, sən də, Zahid də məni çox sevirsiz”. Saat 05:45-də Zamin mesajları oxuyur. Sonradan ananın yazdığı mesajlar cavabsız qalır…

Aidə xanım:"Gözüm telefonda idi. Hər an ondan xəbər gözləyirdim. Sanki saniyələr belə, ağır-ağır keçirdi…19.09.2023.Telefona baxdım, gördüm ki, gecə saat 3-ə yaxın Zamin vatsapda olub. Zəngləşib danışdıq. Gördüyüm yuxumu ona danışdım. Xeyli söhbət etdik. Ağlıma da gəlməzdi ki, bu, bizim son danışığımız olacaq…Ondan bir xəbər yox idi. Telefona baxdım, səhər saat 12-yə işləmiş Zamin vatsapdan çıxmışdı. Haradasa, saat 12-yə qalmış balacamızın videosunu göndərdin ona, amma heç bir səs-soraq olmadı. Sonradan iki mesaj yazmış və pozmuşdu. Hərdən düşünürəm, görən nə demək istəyib bu mesajlarda…”.

Ana: "Yazışdıq vatsapda, sonra zəng etdi. Dedi ki, "ana, nəsə olsa birdən, başını dik tut, hər şey yaxşı olacaq. Qorxma, mənə heç nə olmayıb, indən belə də heç nə olmayacaq. İnşallah. Sən ancaq dua elə”...

Ana ilə balanın arasında kiçik bir dialoq olur:

- Mən sənə hər gün dua edirəm, oğlum.

- Yox, ana, təkcə mənə görə dua eləmə. Burda mənim 20 əsgərim var, bir aydan çoxdur ki buradadılar, xidmətləri bitib, evə getməliydilər. Mən çox istəyirəm ki, onları analarına sağ-salamat təhvil verim.

- A bala, sən onlarabir ildir qulluq edirsən, mənsə sənin zəhmətini 30 ildir ki çəkmişəm… - Narahat ananın dilindn biləixtiyar bu cümlələr çıxır.

- Sən möhkəm qadınsan. Biri var, sən tək ağlayasan, biri də var 20 ana ağlaya…

Qəhər ananı boğduğundan başqa söz deyə bilmir. Daha sonra Zamin öz arzularından danışır. Oktyabrın 30-u balaca Turanın 2 yaşı olacaqdı. Zamin son sözlərini deyir: "İnşallah, gələrəm… maşın da alaram… sizləri maşınla hər yerə apararam, doğma el-obanı birlikdə gəzərik… Amma hər nə olsa, möhkəm ol”.

Azərbaycan Ordusunun məğrur, cəsur zabiti, Vətən torpaqlarının yağı düşməndən azad olunması yolunda aparılan müharibələrdə rəşadətli mübarizəsi ilə adını tarixin səhifələrinə qanıyla yazan igid qəhrəmanın nəşi sentyabr ayının 22-si axşam saatlarında vidalaşmaq üçün məskunlaşdığı 56 saylı bağçanın həyətinə gətirilir. Köksü Vətən eşqi ilə çırpınan gənc zabit – Baş leytenant Zamin Abbasov 23 sentyabr 2023-cü il tarixdə Sumqayıt Şəhidlər Xiyabanında dəfn olunur.

Ana: "Zamin Allaha bağlı, imanlı bir oğul, peşəsini ürəkdən sevən peşəkar hərbiçi idi. Uşaqlıqdan namaz qılıb, oruc tutub, Quranı oxuyub. Evdə namaz qılanımız olmayıb. Sanki ona Allahdan bir vergi verilmişdi. Məktəb illərində kiçik hekayələr yazardı. Ədəbiyyat və Tarix fənnini çox sevərdi, hər zaman hərbi oyunlar oynayar, döyüş filmlərinə baxardı. Allah yolunu açdı, arzusuna çatdı, hərbiçi oldu, Vətən keşiyində durdu, vətənpərvər balam. Vətəni üçün canından keçməyə hazır oldu Zaminim! Ruhları şad olsun bütün Şəhid balaların! Allah heç kimə bala dağı çəkdirməsin!”.

Aidə xanım: "Çox savadlı, bacarıqlı, mərhəmətli, xeyirxah, zəhmətkeş, namuslu, ləyaqətli, vicdanlı… olub. Sakit təbiətli, az danışan idi. Sözü bir kəlməylə deyib. Çox danışmağı sevməzdi. Həddən çox dürüst insan idi. Heç vaxt yalan danışmazdı. Oxumağa, öyrənməyə meyilliydi. Rus dilini mükəmməıl bilirdi. Kompütür kursuna gedib proqramları öyrənmişdi. İşini çox sevib.

30 Oktyabr tarixində oğlumuzun 2 yaşı olacaq. O günü ailəlikcə bir yerdə qeyd etməyi səbirsizliklə gözləyirdi. Uşağın adını özü qoymuşdu. Yuxusunu da görmüşdü. 44günlük müharibədən qayıdandan sonra yuxusunu danışdı. "Belə bir yuxu görmüşəm. Görürəm, taxtın üstündə balaca bir oğlan uşağı qoyublar. Arxadan da mənə deyirlər ki, bunun adıTurandır. Sonra bir kişi uşağı mənə verib deyir ki, bu uşaq sənə müharibədən sonra hədiyyədir”. Övladımız dünyaya gələndə Zamin adını "Turan” qoydu.

Zaminin ən böyük arzularından biri də o olub ki, öz evi olsun, biz özümüz bir ailə kimi yaşayaq. Qismət… Onsuz çox ağırdır…”.

Abbasovlar ailəsində kimi gördümsə, hər kəs qəhrəmanımız haqqında, nə qədər ağır osa da, xatirələrini danışdı, məlumatlar verdi. Oğul itkisi ilə barışa bilməyən, gözü yol çəkən ata - Xəqani bəy isə yalnız bircə kəlmə dedi: "Mən I Qarabaq savaşının məğlub əsgəriyəm, oğlum isə Zəfərə imza atan Vətənin qalib əsgəridir!”.

Başınızı uca tutun Şəhid atası, Şəhid anası, bütün Şəhidlərimizin əziz-doğmaları, Vətənin Qəhrəman oğullarının sayəsində bu gün sizlərin də uzun illər düşmən əsarəti altında olan ata-baba ocaqlarınız rahat nəfəs alır. Bu gün Vətənin hər qarışında Azərbaycanın üçrəngli bayrağı qürurla dalğalanır! Şəhidlərimiz Turan kimi gül balaların parlaq gələcəyi naminə özlərini MÜHARIBƏ adlı alovun içərisinə atdılar və şücaətləri ilə Qələbəyə imza qoydular, kiçikdən-böyüyə hər kəsə bu sevinci yaşatdılar.

Şəhidlər ölmürlər! Onlar daima ürəklərdə yaşayırlar, Allahın ən sevimli, SEÇİLMİŞ bəndələri olaraq ən uca məqamın sakinləri - Cənnət MƏLƏKləridirlər! Bunu unutmayaq!!!

Ruhun şad olsun, Cənnətməkan Şəhidimiz!

Aygün Hacıyeva,

AJB, AYB, AAB-nin üzvü