(Yazılar Şəhidlərimizin Sumqayıt Şəhidlər Xiyabanında dəfn olunma ardıcıllığı ilə verib).

ƏHMƏDOV KƏNAN LƏZGİ oğlu

(Əsgər)

ƏHMƏDOV KƏNAN LƏZGİ oğlu15 fevral 1995-ci ildə Şəmkir rayonunun Yuxarı Çaykənd kəndində anadan olub. Təhsilinin ilk 3 ilini Yuxarı Çaykənd tam orta məktəbində alıb. 2005-ci ildə ailə Sumqayıt şəhərinə köçəndən sonra, Kənan elə həmin ildən Sumqayıt şəhərinin H.Z.Tağıyev qəsəbəsində yeləşən Laçın rayon F.Cəfərov adına Aşağı Cicimli kənd orta məktəbində təhsilini davam etdirib və 2012-ci ildə məktəbi müvəffəqiyyətlə bitirib.

Məktəbi uğurla başa vuran Kənan Əhmədov sənədlərini Peşə Liseyinə verir və daxil olur. Bu müddətdə birillik kompüter kursunu da bitirir və sertifikata sahib olur. Bir il Sumqayıt peşə liseyində oxuduqdan sonra, 2013-cü ildə atasını itirdiyinə görə, təhsilini yarımçıq saxlayır. Sonradan təhsildən tamamilə uzaqlaşaraq, ailəsinə yardım etmək üçün işləməyə başlayır.

Təbiətcə sakit, mülayim xasiyyətli Kənan sadəliyi, səmimiliyi ilə hər zaman seçilib. Qəlbi həddən artıq saf, təmiz, olan, hər kəsə yazığı gələn və kimsəsizə, kasıba əl tutmağa çalışan, mərhəmətli gənc, kimsənin xətrinə dəyməzdi. Əməli xeyirxahlıqdan yoğrulmuşdu. Kimə nə zaman dəstək olmaq lazım olardısa, Kənana müraciət edərdi. Bilirdilər ki, o, məsuliyyətli olduğundan, həmının işini tərəddüd etmədən vaxtında yerinə yetirməyə çalışacaq. Kənan böyüklərə hörmət, kiçiklərə məhəbbət hissi ilə yaşayardı.

İdmana hədsiz marağı olduğundan, "Cüdo” idman növü ilə məşğul olardı. Futbol azarkeşi olan gənc oğlan bir oyunu belə gözdən qaçırmazdı. Az-susuz, yorğun, gecənin yarısı olsaydı belə, yarışı izləməyə gedərdi.

K.Əhmədov 2013-cü ildə Sumqayıt Şəhər Hərbi Komissarlığı tərəfindən Sumqayıt şəhərinin H.Z.Tağıyev qəsəbəsində yerləşən "N” saylı hərbi hissəyə həqiqi hərbi xidmətə göndərilir. Andicmə mərasimindən sonra, Bakının Qaradağ rayonunun Müşfiqabad qəsəbəsi ərazisində -Qaraheybətdə yerləşən "N” saylı hərbi hissədə xidmətini davam etdirir. O, 2015-ci ildə xidmətini başa vuraraq evə dönür.

K.Əhmədov 2015-2019-cu illlərdə Rusiya Federasiyasında, Başqırdıstan Respublikasının paytaxtı Ufa şəhərində olur. Burada çalışaraq ailəsinə maddi yardım göstərir. 2019-cu ildə Vətənə dönən gənc oğlan 2019-2020-ci illərdə əmək fəaliyyəti ilə məşğul olaraq ailəsinə dəstək olur.

AİLƏ:Əslən Şəmkir rayonundan olan Əhmədovlar ailəsi 2005-ci ildən talelərini Sənaye şəhəri olan Sumqayıtla bağlayıblar. Ata, ana və iki qardaşdan ibarət olan kiçik ailədə övladlar vətənpərvər ruhda böyüyərək, halal qazanc sahibi olublar. 2013-cü ildə ata rəhmətə getdikdən sonra ailənin bütün yükünü qaldırmaq ananın çiyinlərinə düşür. Qardaşlar böyüdükdən sonra, hərəsi bir işin qulpundan yapışmaqla, anaya dəstək olurlar. Kənanın qardaşı Kamran ailə qurur, onun körpəsinin dünyaya gəlişi ailəyə sevinc, səadət, xoşbəxtlik bəxş edir.

Hər bir subay gənc oğlanlar kimi, Kənanın da tükənməz arzuları vardı. O da ailə qurmaq, övlad sahibi olmaq istəyirdi. Və bir gün bu arzusunun gerçəkləşəcəyini fikirləşərək, yaşadığı evə əl gəzdirməyi, təmir etməyi düşünür. Bu məqsədlə də mənzilində öz əlləriylə və öz zövqünə uyğun təmir işləri aparır. Lakin bəzi işlər tamamlanmamış, yarımçıq qalır...

Kənanın atası Ləzgi Əhmədov 1992-1993-cü illərdə I Qarabağ müharibəsində iştirak etmişdi. O, tez-tez o günləri xatırlayar, tarixən Azərbaycanın başına gətirilən müsibətlərdən, mənfir qonşuların azğınlıq və vəhşiliklərindən, utanmaz şəkildə söylədikləri iftira və yalanlardan söz açardı. İki qardaş düşmənə nifrət hissi ilə böyüyür, zamanı gələndə düşməndən qisas alacaqlarını bildirirdilər.

2020-ci ilin iyul ayında baş verən Tovuz hadisələri Kənanı çox sarsıdır. General-mayor Polad Həşimovun dəfnindən sonra evə gələn Kənan, anası ilə bir az söhbətləşdikdən sonra, ondan soruşur: "Ana, mən şəhid olsam, nə edərsən?”.Ana suala sualla cavab verir: "Haradan ağlına gəldi bu?”.Sonra da sözünə davam edir: "Allah eləməsin, ay oğul, sənə bir şey olsa, dəli olaram!”.Kənan bir qədər fikrə gedəndən sonra anasının əllərini ovuclarına alaraq deyir: "Ana, mən şəhid olacam. Baxarsan. İndi ya sonra, bilmirəm nə vaxt, amma ürəyimə damıb ki, mən şəhid olacam”.

27 Sentyabr 2020-ci ildə II Qarabağ müharibəsi başlayanda, elan olunmuş Səfərbərliklə bağlı, ön cəbhəyə yollanan çağırışçılar arasında Vətənin mərd, qorxmaz oğlu Kənan Ləzgi oğlu Əhmədov da olur. O, silahdaşları ilə birlikdə Gəncə, Daşkəsən, Qazax zonasında olur, sonda Füzuli istiqamətində gedən döyüşlərə qatılır.

Vətən sevgisi ilə yaşayan 25 yaşlı Kənan Əhmədov "Vətəni biz qorumalıyıq!”deyərək silahlanır. Füzuli-Cəbrayıl istiqamətində döyüşlərdə mərdlik, qoçaqlıq nümayiş etdirərək, düşmənin çoxsaylı itkisinə səbəb olur. O, qələbə əzmi ilə, Zəfəfə gedən yolda inamla addımlayır.

Minamyot atıcısı olan Kənan Əhmədov bir neçə mövqelərdə düşmənə sarsıdıcı zərbələr endirir. O, ağır döyüşlər zamanı fürsət düşən kimi, yaralı yoldaşlarına da koməklik göstərir, onları qanlı meydandan uzaqlaşdırmağa çalışırdı.

Kənan 2-3 gündən bir evə zəng edər, ailə üzvləri ilə danışar, hər dəfə də deyərdi: "Vətən üçün canımdan keçməyə hazıram! Sizi çox sevirəm! Şəhid olsam, üzülməyin, ağlamayın...”.

Cəsur döyüşçü oktyabrın 22-si qardaşı ilə əlaqə yaradır, xeyli danışdıqdan sonra son sözü bu olur: "Hər şey Vətən üçündür və hər şey Allahın hökmündədir”.Oktyabrın 24-ü doğmaları ilə tələm-tələsik danışır və hər şeyin yaxşı olduğunu, düşmənin tab gətirmədiyini, silahlarını atıb qaçdıqlarını söyləyir.

Oktyabrın 25-i 2020-ci ildə Qubadlı rayonu işğaldan azad olunur. Kənanın da, silahdaşları kimi, sevincinin həddi-hüdudu yox idi. Ordumuz irəli getsə də, bəzi ərazilərdə alınmamış torpaqlar uğrunda qızğın döyüşlər gedirdi. Füzuli rayonunun yuksəkliyinin alınması uğrunda döyüşlər davam edirdi. Oktyabrın 25-dən 26-na keçən gecə, saat 1 radələrində Füzuli istiqamətində düşmənə qarşı əks-hücum əməliyyatı başlayır. Kənan da mübarizəyə böyük ruh yüksəkliyi, Qələbə əzmiylə qatılır. Çox ağır döyüşlər gedir. Bu döyüşdə Azərbaycan tərərfi xeyli itki verir. 55 nəfərdən yalnız 1 nəfər sağ qala bilir, 76 nəfər isə yaralanır...

Təəssüf ki, hər zaman "Vətəni biz qorumalıyıq!” deyən gənc, qorxmaz əsgər aldığı qəlpə yarasından həlak olaraq gözlərini əbədi yumur. Allahın sevimli bəndəsi olan Kənan Əliyev Şəhidlik Zirvəsinə yüksələrək, adnı Tarixin Zəfər səhifələrinə silinməz mürəkkəblə yazır...

Vətənin igid oğlu Kənan Əhmədov ailəsini, xalqını, Torpağını... - Vətənini ürəkdən sevən vətənpərvər bir Azərbaycanlı gənci, vətəndaşı idi. Uca Allah hər bir bəndəsinin qəlbindən, düşündüklərindən xəbərdardır. Bəlkə, elə buna görə, Kənanı seçərək izzətləndirdi, şərəfləndirdi və öz Dərgahına apardı!

Torpağ uğrunda döyüşən, Torpaq uğrunda canından keçən Qəhrəman Vətən oğlu Kənan Əhmədov özü də bir ovuc Qarabağ torpağına çevrilir şücaəti ilə! Ondan geriya qalan isə şərəfli döyüş yolu, onu tanıyanların, silahdaşlarının haqqında söylədikləri, xatirə olaraq yadiğar qalan şəkilləri və səs yazılarıdır...

Azərbaycan Ordusunun məğrur əsgəri Kənan Əhmədov 27.10.2020-ci tarixində Sumqayıt Şəhidlər Xiyabanında dəfn edilir.

Azərbaycan Silahlı Qüvvələrinin 25 yaşlı mətin əsgəri, minamyotçu Kənan Ləzgi oğlu Əhmədov ölümündən sonra, Azərbaycan Respublikasının prezidenti İlham Əliyrvin müvafiq Sərəncamlarına əsasən, "Vətən uğrunda”, "Döyüşdə fərqlənməyə görə” və "Füzulinin azad olunmasına görə” medalları ilə təltif olunub.

Ruhun şad olsun, Cənnətməkan Şəhidim!

------------------------------

MƏMMƏDOV MURAD YUSİF oğlu

(Əsgər)

MƏMMƏDOV MURAD YUSİF oğlu7 dekabr 1995-ci ildə Sumqayıt şəhərində ziyalı ailəsində dünyaya göz açıb. Hələ uşaq vaxtlarından Vətənə sevgisi ilə seçilən Murad 2002-ci ildə ibtidai təhsilini Sumqayıt şəhər 23 saylı tam orta məktəbdə alıb. Daha sonra o,Təbiət Elmləri Təmayüllü Gimnaziyada oxuyub.

Orta təhsilini Sumqayıt şəhər 22 saylı tam orta məktəbdə başa vuran Murad, məktəb illərində müxtəlif idman növləri ilə maraqlanıb, xüsisilə futbol və cüdo ilə. Elə çox sevdiyi futbol və cüdo ilə kiçik yaşlarından məşğul olmağa başlayıb. 2002-2020-ci illərdə, arada müəyyən səbəblər üzündən kiçik fasilə olmaqla, "Təhsil” RİM-in Sumqayıt şəhər 1saylı İOEUGİŞM-də cüdo ilə məşğul olub. Peşəkar məşqçi-müəllim Natiq Qasımov Muradda olan potensialı görüb, ona bu idman növü haqqında daha geniş məlumat verər, döyüş taktikalarını və fəndləri həvəslə öyrədər, hər xırda detalları başa salardı. Gənc idmançı məşqçisinin bütün tapşırıqlarını yerinə yetirməyə səy göstərərdi.

Futbol həvəskarı olan Murad sonradan Türk futbol klublarından biri olan "Qalatasaray”ın azarkeşinə çevrilir. Onda tükənməz "Qalatasaray” sevgisi vardı. Komandanın bütün oyunlarını maraqla izləyən yeniyetmə, uğur sevincini necə yaşayırdı, bir Allah bilirdi. Sanki özü futbol meydançasında qalibiyyət qazanırdı. Arda Turanın o qədər vurğunu idi ki, bunu sözlə ifadə etmək çətin idi. Ağır təbiətli, sakit görünməyinə baxmayaraq, Murad təmiz qəlbli, ağıllı, düşüncəli idi. Sevdiklərini həmişə ön plana qoyaraq, qayğılarına qalar, öz problemləri ilə başqalarını yormaq istəməzdi. Onun ən önəmli keyfiyyətlərindən biri, bəzilərinin adi kimi baxdığı işə onun daha diqqət və masuliyyətlə yanaşması, səbr və təmkinlə məsələni həll edib ədalətli qərar verməsi idi.

M.Məmmədov 2013-2018-ci illərdə Azərbaycan Texniki Universitetin "Elektroenergetika mühəndisliyi” fakültəsində təhsil alıb. 2018-ci ilin iyul ayında, Vətən qarşısında borcunu yerinə yetirmək üçün, Sumqayıt Şəhər Hərbi Komissarlığı tərəfindən hərbi xidmətə göndərilib. Xidmətinin ilk 3 ayını Gəncə şəhərində keçirdikdən sonra, qalanını Daşkəsən rayonunda davam etdirib. M.Mmmədov 2019-cu ilin iyul ayında həqiqi hərbi xidməti ləyaqətlə başa vurub.

Hərbi xidmət illərində təlim-tərbiyəsi, ağlı, zəkası, düşüncəsi, bacarıq və qabiliyyəti, cəldliyi, qoçaqlığı, cəldliyi ilə seçilən gənc əsgər komandanlığın və yoldaşlarının rəğbətini qazanıb. Dəfələrlə Komandanlıq tərəfindən "Təşəkkür məktubu” alan, xoş sözlər eşidən valideynlər övladları ilə fəxr ediblər.

M.Məmmədov hərbi xidmətdən sonra əmək fəaliyyəti ilə məşğul olub. O, "Azərişıq” ASC-də "Rele mühəndisi” vəzifəsində çalışaraq, işinə böyük sevgi və məsuliyyətlə yanaşıb.

AİLƏ:Məmmədovlar ailsinin başçısı Yusif Surxay oğlu Məmmədov Sumqayıt şəhərində anadan olub, uzun müddət fərdi sahibkar kimi fəaliyyət göstərib. Elza xanım Lənkəranda anadan olsa da, taleyini Sumqayıt şəhəri ilə bağlayıb, burada ailə qurub, oğul-uşaq sahibi olub. Sumqayıt şəhər 1 saylı uşaq poliklinikada tibb bacısı işləyib, hər zaman körpə fidanların qayğısına qalaraq qulluğunda durub. Hər iki zəhmətkeş valideyn ailədə qayda-qanun, nizam-intizam, səliqə-sahman, mehribançılıq yaratmağa çalışıb. Və istəklərinə də nail olublar.

1995-ci ildə anadan olan evin ilk övladı dünyaya gəlişiylə gənc ailəyə sevinc bəxş edib. Uşağın adını "Murad” qoyurlar. Bu ad özündə bir çox mənaları daşıyır - arzu, məqsəd, niyyət, dilək, istək, kam, şans... Valideynlər istəyirlər ki, adı kimi, özünün də arzuları çiçək açsın, məqsədə doğru mətin addımlasın, niyyətinə çatsın, diləklərinə qovuşsun Murad.

Daha sonra ailəyə pənah gətirən Nurlan da qardaşına oxşamağa çalışaraq, onunla fəxr edir. (Müəl.:Nurlan da II Qarabağ müharibəsi iştirakçısıdır). Evin sonbeşiyi, Allahın şirin payı olan Leylanın mövcudluğu təkcə valideynləri deyil, qardaşları da çox sevindirir. Onlar bacılarını əzizləyir, nazını çəkirdilər. Bacı da hər zaman qardaşlarının qulluğunda durardı. Mehriban bacı-qardaşlar birlikdə gözəl, mənalı, xoşbəxt günlərini yaşayardılar. Bu evdə hər kəs bir-birinə hörmət və ehtiramla yanaşaraq, Məmmədovlar ailəsinin adət-ənələrinə riayət edərdi.

Muradın əmisi Məmmədov Asif Surxay oğlu I Qarabağ müharibəsi iştirakçısı olub. Ailə bir yerə yığışanda söhbət nədən gedir-getsin, sonda Qarabağ mövzusunun üzərinə gəlib çıxırdı. Əmi ermənilərin azğınlığından, insaniyyətliyə sığmayan vəhşi hərəkətlərindən, hiylə və yalanlarından... ürək ağrısı ilə danışardı. Murad bu söhbətlərdən daha da hiddətlənər, düşmənə qarşı amansıq olardı...

2016-cı ildə baş verən Şanlı Aprel döyüşləri və 2020-ci ildəki Tovuz hadisələrindən sonra, Murad da vətənpərvər gənclər kimi, ön cəbhəyə gedib düşmənin layiqli cavabını vermək arzusu ilə yaşayır.

2020-ci ilin sentyabr ayında düşmənin təxribatları artmaqda idi. Artıq səfərbərlik elan olunmuşdu. Muradın qardaşı Nurlan sentyabrın 21-də səfərbərliklə ön cəbhəyə yola düşür. Sentyabrın 27-də müharibə başlayanda Murad da heç kimə bir söz demədən, ən yaxın dostu Eminlə birlikdə adını könüllülərin siyahısına yazdırır və səbirsizliklə cəbhəyə gedəcəyə günü gözləyir.

Nəhayət, Muradın gözlədiyi məqam çatır. O, oktyabrın 1-də döyüş bölgəsinə göndərilir. İlk döyüşlər Füzuli rayonu istiqamətində başlayır. Oktyabrın 4-dən 11-nəcən bu istiqamətdə qızğın döyüşlərin iştirakçısı olur. Oktyabrın 11-dən sonra Qubadlı uğrunda döyüşlərdə iştirak edən Muradın və onun döyüş yoldaşlarının şücaəti sayəsində düşmənin bir çox səngərləri, texnikaları, canlı qüvvələri məhv edilir.

Okyabrın 25-i 2020-ci ildə Qubadlı rayonunun düşməndən tamamılə təmizlənməsi uğrunda qanlı döyüşlər gedir. Azərbaycan Ordusunun mübariz əsgərinin gözü bu anlarda heç nəyi görmürdü. Hər kəs bir amal uğrunda savaşırdı – 27 illik həsrətə son qoymaq!

Bu dünyaya bir oğul gəldi, şərəfli ömür yolunun yolçusu oldu. Hər zaman özünü irəli atan qeyrətli Vətən oğlu öz əqidəsi, məqsədi və məsləyi yolunda canından, qanından keçməyə hazır idi. O, istəyinə doğru inamla addım atdı və sonda ən ümdə arzusuna qovuşdu.

25 Oktyabr 2020-ci ildə Qubadlı rayonunun mənfur qonşulardan azad olunmasında şücaət göstərərək Şəhidlik Zirvəsinə ucalmaqla, adını Yeni Tarixin şanlı səhifələrinə Qızıl hərflərlə yazdı. Bu mübarizədə ir igidin həyat hekayəsinin son nöqtəsi qoyulsa da, onun adı daima qəlblərdə yaşayacaq, əsrlər keçsə də unudulmayacaq!

Azərbaycan Ordusunun cəsur döyüşçüsü Murad Məmmədov 27 sentyabr 2020-ci il tarixində Sumqayıt Şəhidlər Xiyabanında dəfn olunur.

Azərbaycan Silahlı Qüvvələrinin yenilməz, igid əsgəri, 24 yaşlı qumbaraatan Məmmədov Murad Yusif oğlu ölümündən sonra, Azərbaycan Respublikasının prezidenti İlham Əliyevin müvafiq Sərəncamlarına əsasən, 3-cü dərəcəli "Vətənə xidmətə görə” ordeni, həmçinin "Vətən uğrunda”, "Qubadlının azad olunmasına görə” və"Laçının azad olunmasna görə” medalları ilə təltif olunub.

Ruhun şad olsun, Cənnətməkan Şəhidimiz!!!

Aygün Hacıyeva,

jurnalist, yazıçı-publisist