Sentyabrın 19-u 2023-cü ildə gecə saatlarında Daxili İşlər Naziliyinin 4, Azərbaycan Avtomobil Yolları Dövlət Agentliyinin isə 2 əməkdaşı Qarabağda minaya düşərək həlak olmuşdu. Bu barədə Daxili İşlər Nazirliyi, Dövlət Təhlükəsizliyi Xidməti və Baş Prokurorluğun birgə məlumatı yayıımışdı. Dövlət Təhlükəsizliyi Xidmətinin başlatdığı cinayət işində hər iki hadisə "terror aktı” kimi təsnif edilmişdi.

Rəsmi məlumata görə, Əhmədbəyli-Füzuli-Şuşa yolunun Xocavənd rayonundan keçən 58-ci kilometrliyində əvvəlcə AAYDA iki əməkdaşının - Fərhad Quliyev və Samir Sadıxovun olduğu avtomobil minaya düşmüş və onlar həlak olmuşlar.

Daha sonra həmin əraziyə gələn polis əməkdaşlarının avtomobilləri də minaya düşmüşdür. DİN-in məlumatında deyilirdi:

" ‘Kamaz’ markalı avtomobil Xocavənd rayonunun Tağaverd kəndi ərazisində tunel yolunda sülhməramlıların müvəqqəti yerləşdiyi ərazidə fəaliyyət göstərən qanunsuz erməni silahlı birləşmələrinin təxribat-diversiya qrupu tərəfindən yerləşdirilmiş minaya düşərək partlayıb, nəticədə polis əməkdaşları Asim Camalzadə, Ramil Şirinov, Seymur Mahmudov, Xəzər Zamanov həlak olublar. Məsələ ilə bağlı cinayət işi qaldırılıb”.

Həmin hadisə vaxtı həlak olan Asim Camalzadə və Ramil Şirinov Sumqayıt Şəhidlər Xiyabanında dəfn olunub.

28.10.2023-cü il tarixdə Asim Camalzadənin, 29.10.2023-cü il tarixdə Ramil Şirinovun 40 mərasimi Sumqayıt şəhərindəki "Qayalı” mərasim evində qeyd olundu.

Ruhunuz şad olsun, Vətən oğulları!

Xeberle.com