Vətənin igid qəhrəmanının ən böyük arzularından biri oğlunun doğum günündə onunla birlikdə olmaq, əziz-doğmalarla bu gözəl günü mənalı keçirməklə yaddaşına yazmaq idi. Oğlunun qoxusunu ciyərləriniə çəkən zaman bütün yorğunluğunu unudan gənc ata, tezliklə ailəsi ilə görüşəcəyi anı səbirsizliklə gözləyir, günləri sayırdı. Lakin...

Şəhidimiz ZaminAbbasov oğlunun ad günündə yanında ola bilməsə də, onun arzusunu Zaminsevərlər həyata keçirdilər. "VİP” Mərkəzinin təsisçisi və rəhbəri, jurnalist-yazıçı Aygün Hacıyevanın təşəbbüsü ilə, həmin gün balaca Turanı təbrikə qoşulan şairə Esmira Günəş, Sumqayıt şəhər 7 saylı məktəbin Dil-Ədəbiyyat müəllimi Şəlalə xanım, şəhid ailələrindən ibarət olan "Seçilmişlər” qrupunun rəhbəri, şəhidimiz Rüfət Əhmədzadənin anası Ruhiyyə xanım və ""Damla” un məmulatları” şirniyyat evinin rəhbəri Sevil xanım aldıqları hədiyyələrlə balacanı sevindirməyə, ailəyə həmin dəqiqələrdə dəstək olmağa çalışdılar.

Sevda xanım (şəhidin anası):"Bu gün nəvəmin atasız qeyd etdiyi ilk doğum günüdür. Çox ağırdır... Nə qədər ağır olsa da, yenə özümüzdə güc tapmağa çalışırıq. Zaminimlə qürur duyuruq! O, və silahdaşları Turan kimi övladların aydın sabahları naminə canlarından keçdilər... Allah bütün uşaqları qorusun, xöşbəxt eləsin! Bir daha müharibələr olmasın, insaniyyətlik itməsin, Şəhidlərimiz unudulmasınlar, qazilərimiz diqqətdən kənar qalmasınlar!

Bu gün bizi yad edib qapımızı döyən, Turanımızı sevindirən, bizləri tək qoymayan hər kəsə, ailəmizin adından, təşəkkürümü bildirirəm!”.

Aidə xanım (şəhidin həyat yoldaşı):"Bu gün Turanımızın 2 yaşı oldu. Bu günü ailəlikcə bir yerdə qeyd etməyi səbirsizliklə gözləyirdi. Uşağın adını özü qoymuşdu. Yuxusunu da görmüşdü. 44 günlük müharibədən qayıdandan sonra yuxusunu danışdı. "Belə bir yuxu görmüşəm. Görürəm, taxtın üstündə balaca bir oğlan uşağı qoyublar. Arxadan da mənə deyirlər ki, bunun adıTurandır. Sonra bir kişi uşağı mənə verib deyir ki, bu uşaq sənə müharibədən sonra hədiyyədir”. Övladımız dünyaya gələndə Zamin adını "Turan” qoydu. O, uşaq kimi sevinirdi oğlu olduğuna görə. Onu özünün davamçısı görürdü...

Allah hər kəsdən razı olsun ki, belə bir gündə bizlərlə oldular”.

Bu gün Azərbaycanın azadlığı və bütövlüyü uğrunda canından, qanından keçməyə hər zaman hazır olan zabit Zamin Abbasovun övladı bizlərə əmanətdir. Turanın simasında bütün gül balaların sağlam və xoşbəxt böyümələri, parlaq gələcəkləri naminə hər bir Azərbaycan vətəndaşı əlindən gələni edəcək!

Xeberle.com komandası olaraq, gələcəyin əsgəri olacaq balanı ürəkdən təbrik edir və deyirik:"Yeni yaşın mübarək, Turanımız!”.

Xeberle.com.

-----------------

Baş leytenant Zamin Xəqani oğlu Abbasovu daha yaxından tanıyaq:

Abbasov Zamin Xəqani oğlu8 mart 1993-cü ildə Qubadlı rayonunda anadan olub. 1993-cü ilin 31 avqust tarixində Qubadlı rayonu Ermənistan Silahlı Qüvvələri tərəfindən işğal olunduqdam sonra Abbasovlar ailəsi, məcburi köçkün kimi, Sumqayıt şəhərində məskunlaşıb. Z.Abbasov 2000-2008-ci illərdə Sumqayıt şəhərində yerləşən Qubadlı rayonu M.Ağayarov adına Kavdadıq kənd orta məktəbində oxuyub.

Z.Abbasov 2008-2011-ci illərdə C.Naxçıvanski adına Hərbi Liseydə, 2011-2015-ci illərdə H.Əliyev adına Azərbaycan Ali Hərbi Məktəbində təhsil alıb. 2014-cü ildə Müdafiə Nazirliyinin xətti ilə, Hərbi Məktəbin nəzdində "Sürücülük kursu”nu bitirən Z.Abbasov 2015-ci ildə təhsilini "Mexanika mühəndisliyi” ali peşə ixtisas dərəcəsi ilə başa vurub. Gənc hərbiçinin ilk təyinatı Xocavənd rayonuna olub.

Z.Abbasov Azərbaycan Silahlı Qüvvələrinin "Təlim və Tədris Mərkəzi”ndə "Motoatıcı taqım komandiri” kursunu bitirərək "Zabit ixtisas kursu” üzrə Sertifikat alıb.

2016-cı ilin Şanlı Aprel döyüşlərində iştirak edən Z.Abbasov düşmən qarşısında öz sözünü mətinliklə deyib. 2016-cı il Aprel döyüşləri zamanı xüsusi şücaətinə görə, rəhbərlik tərəfindən "Döyüşdə fərqlənməyə görə” medalı ilə təltif edilib.Döyüşlərdən sonra gənc zabit yenidən Xocavənddə hərbi xidmətinə davam edib. 2020-ci ilin avqust ayında o, Ağcabədiyə göndərilib.

II Qarabağ müharibəsində Z.Abbasov Füzuli, Cəbrayıl, Hadrut, Zəngilan, Qubadlı, Laçın… istiqamətlərində gedən döyüşlərdə mərdliyi, igidliyi ilə seçilib. Müharibə Zəfərlə bitdikdən sonra o, döyüş zamanı aldığı zədəylə bağlı, 3 ay müalicə kursu keçib. Psixoloji durumu stabilləşəndən sonra xidmətini Qubadlının Mahruclu kəndində yerləşən hərbi hissədə davam etdirib.

Baş leytenant Zamin Abbasov Vətən müharibəsindən sonra Ölkə Rəhbərinin müvafiq Sərəncamları ilə, "Vətən müharibəsi iştirakçıısı”, "Hərbi xidmətdə fərqlənmətə görə”, "Cəbrayılın azad olunmasına görə”, "Qubadlının azad olunmasına görə” və "Laçının azad olunmasına görə” medalıarı ilə təltif olunub.

2022-ci ilin sentyabr ayında düşmən növbəti təxribata əl atanda Z.Abbasov Ağdərə istiqamətində gedən döyüşlərdə mənfurların layiqli cavabını verir. Daha sonra o, yenidən xidmət etdiyi hərbi hissəyə - Qubadlının Mahruclu kəndinə qayıdır.

19.09.2023-cü il tarixdə səhər saatlarında Qarabağda lokal xarakterli antiterror tədbirləri keçirilir... Bu əməliyyat zamanı düşmən gülləsinə tuş gələn, qəlbi arzularla dolu olan gənc zabit qəhrəmancasına həlak olaraq əbədi gözlərini yumur...

Azərbaycan Ordusunun məğrur, cəsur zabiti, Baş leytenant Zamin Abbasov 23 sentyabr 2023-cü il tarixdə Sumqayıt Şəhidlər Xiyabanında dəfn olunur.

Bu gün Vətənin hər qarışında Azərbaycanın üçrəngli bayrağı qürurla dalğalanır! Şəhidlərimiz Turan kimi gül balaların parlaq gələcəyi naminə özlərini MÜHARIBƏ adlı alovun içərisinə atdılar və şücaətləri ilə Qələbəyə imza atdılar, kiçikdən-böyüyə hər kəsə bu sevinci yaşatdılar.

Ruhun şad olsun, Şəhidimiz!

Xeberle.com