Mərasimdə İH-dən rəhbər işçilər, şəhidin qohum-əqrabaları, təhsil aldığı məktəbin müəllim kollektivi, hərbiçi yoldaşları, şəhid ailələri, şəhər ictimaiyyəti, QHT və media nümayəndələri… iştirak etmişlər.

Qeyd edək ki, iki bacının yeganə qardaşı olan Cavid Mirzəyev şəhid olan günü ata olacağı xəbərini bilmişdir...

Vətənin qeyrətli oğlunu daha yaxından tanıyaq:

Baş leytenant Cavid Azər oğlu Mirzəyev 14 noyabr 1994-cü ildə Siyəzən şəhəri, Gil-gil çay qəsəbəsində anadan olub. 2001-2006-cı illərdə Sumqayıt şəhər 40 saylı, 2006-2012-ci illərdə İ.Qayıbov adına 1 saylı tam orta məktəblərdə oxuyub. 2012-2016-cı illərdə Bakı Slavyan Universitetinin "Tərcüməçilik” (İngilis dili) fakültəsində təhsil alıb. 2016-cı ildə təhsilini uğurla başa vurub.

C.Mirzəyev 2016-ci ildə Sumqayıt Şəhər Hərbi Komisarlığından çağrılaraq, həqiqi hərbi xidmətə Sərhəd Qoşunlarının Yevlax rayonunda yerləşən "N” saylı hərbi hissəsəyə göndərilib. O, 22.07.2017-ci il tarixində xidmətini ləyaqətlə başa vurub.

C.Mirzəyev universitetdə oxuduğu illərdən 2017-ci ilə kimi, bir çox iş yerlərində çalışaraq təcrübə toplamış, ailəsinə dəstək olmuşdur.

2017-ci ildə Dövlət Sərhəd Xidmətinin "TTM”-də "Zabit hazırlıq kursunu bitirən C.Mirzəyev "leytenent” rütbəsi almışdır.

44 günlük Vətən müharibəsində, bölük komandiri kimi, Füzuli, Cəbrayıl, Xocavənd... istiqamətində gedən döyüşlərdə şücaət göstərən Cavid Mirzəyev Şuşayacan şərəfli döyüş yolu keçmişdir. Qələbədən sonra, əsas postları Xocavənddə olsa da, o, Şuşada, Qırmızıbazar qəsəbəsində xidmət edib.

Vətənin mətin zabiti Vətən müharibəsindən sonra, Ölkə Rəhbərinin müvafiq Sərəncamlarına əsasən, "Vətən müharibəsi iştiakçısı” , "Hərbi xidmətdə fərqlənməyə görə” 3-cü dərəcəli medalla, həmçinin "Hərbi xidmətlərə görə”, "Füzulinin azad olunmasına görə” medalları ilə təltif olunub.

C.Mirzəyev 18.02.2021-ci il tarixdə Səbinə xanımla nişanlanıb və 22.07.2022-ci il tarixdə gənclər ailə həyatı qurublar.

C.Mirzəyev ailəsi ilə son danışığında, "ana, hər şey yaxşıdır” deyərək, narahat olan anasını arxayın edir. Mirzəyevlər ailəsi 20.09.2023-cü il tarixdə Cavid Mirzəyevin şəhid olması xəbərini alır.

Azərbaycan Silahlı Qüvvələrinin Baş leytenantı Cavid Azər oğlu Mirzəyev 21 sentyabr 2023-cü il tarixdə Sumqayıt Şəhidlər Xiyabanında dəfn olunur.

Cəmi 28 il ömür yaşasa da, bu ömrü ləyaqətlə, şərəflə yaşadı Qəhrəmanımız! İllər, \srlər keçəcək, hər kəs unudulacaq, lakin yaddaşlardan heç vaxt silinməyəcək rəşadətli döyüş yolları ilə Şəhidlik Zirvəsinə ucalan Cavid kimi vətənpərvər oğullar!

Başınızı uca tutun Azər bəy, Arzu xanım! İgidimizlə təkcə siz yox, bütün Azərbaycan xalqı, Azərbaycan milləti qürur duyur, fəxr edir! Sağ olun ki, belə bir övlad böyütmüsünüz! Vətən sağ olsun!!!

Ruhun şad olsun, Vətən oğlu!

Xeberle.com