(Əsgər)

TELMAN NADİR oğlu ABIŞOV3 oktyabr 1995-ci ildə Sumqayıt şəhərində dünyaya gəlib. 2002-2013-cü illərdə Sumqayıt şəhər 19 saylı tam orta məktəbdə təhsil alıb.

T.Abışov məktəddə oxuduğu illərdə təlim-tərbiyəsinə, böyüklərlə rəftarına, nəzakətli davranışına, məktəb həyatında fəallığına görə, müəllimlərin və sinif yoldaşlarının hörmət və rəğbətini qazanıb. O, məktəbdə orta qiymətlərlə oxusa da, ən sevdiyi fənnlər Azərbaycan dili, Coğrafiya və Tarix olub. Dünya xəritəsini o qədər mükəmməl bilib ki, yoldaşları da heyran qalıblar. Xəritədə hansı bir şəhəri, ölkəni desəydin, həmin andaca tapıb göstərərdi.

2013-cü ildə təhsilini başa vuran Telman Abışov Sumqayıt Hərbi Komissarlığı tərəfindən həqiqi hərbi xidmətə çağrılaraq Daşkəsəndə yerləşən "N” saylı hərbi hissəyə göndərilir. Burada gənc əsgərin komandiri hər kəsin sevimlisi olan general-mayor Polad Həşimov olur.

Telman hərbi xidmətdə olan zaman ailəsi onun görüşünə gedir. Valideynlərlə görüşən Polad Həşimov Telmanın nümunəvi əsgər olduğunu ailəsinə bildirir. Elə təlim-tərbiyəsinə, nümunəvi xidmətinə görə də, gənc əsgər xidməti müddətində iki dəfə məzuniyyətə buraxılır. Valideynlər oğulları ilə fəxr edirlər. Hərbi xidmətdə atıcı olan Telman, gözəl xasiyyətinə, mehribanlığına görə, burada da komandanlığın və əsgər yoldaşlarının sevgisini qazanır.

T.Abışov 2015-ci ilin aprel ayında həqiqi hərbi xidmətini uğurla başa vurub evə qayıdır. O, bir müddət sonra, usta yanında bərbərlik sənətini öyrənir və "Bərbər” kimi əmək fəaliyyətinə başlayır. Sənətini ürəkdən sevərək insanlara yüksək səviyyədə xidmət göstərməyə çalışır. Biliyini artırmaq və sənətini daha təkmilləşdirmək üçün bir neçə kurslara qatılmaqla "Sertifikat”alır.

Telman işində məsuliyyətli olması ilə seçilir. Az zamanda müdiriyyətin və müştərilərin hörmətini qazanır. Onun səliqə-sahmanla gördüyü iş hər kəsin zövqünü oxşayır. Xarici ölkələrdən sənəti ilə bağlı xeyli iş təkifi alsa da, Vətənə olan sevgisi bütün arzularını üstələyir.

Dolanışıq çətin olan ailədə Telman işləməklə ailə problemlərini həll etməyə çalışır. İşə başlayanda ilk addımı o olur ki, atasına deyir: "Ata, sən çıx işdən, mən özüm işləyib evi dolandıracam”.Bütün məsuliyyət Telmanın üzərində olur. Arzularından biri o olur ki, evi təmir etdirəndən sonra ailə həyatı qursun.

AİLƏ:Abışovlar ailəsinin sonbeşiyi – iki bacının bir qardaşı olan Telman ailədə arzulanan və sevilən uşaq olub. Valideynlər 8-9 ildən sonra dünyaya gələn və gəlişi ilə evi nurlandıran oğulu bir qədər ərköyün böyüdürlər, nazını çəkirlər. Lakin Telman ağlı, zəkası, qayğıkeşliyi, əməksevərliyi ilə hər kəsi heyran edir. Xoş xasiyyəti, istiqanlılığı, qanacaq-mərifəti, tez bir zamanda insana qaynayıb-qarışması, ünsiyyətcil olması ilə diqqəti çəkir.

Telman incə yumor hissinə malik şən insan olub. Həyat eşqli, Vətən sevgili, ailəyə, dostlara bağlı olan gənc oğlan yanındakı insana hər zaman müsbət enerji ötürüb.

Bütün gənc oğlanlar kimi, Telman da futbol azarkeşi olub. Bir yarış da onun nəzərindən qaçmayıb. Asudə vaxtlarında dostları ilə futbol oynamağa gedib.

----------

2020-ci ilin iyul ayında baş verən Tovuz döyüşləri zamanı, sevimli komadiri general-mayor Polad Həşimov başda olmaqla, zabitlərin həlak olması Telmanı çox üzür. Həmin günü o, səhərəcən yatmır. O, gah pəncərədən boylanır, gah telefona baxır, gah da otaqda-vargəl edirdi...

Uşaqlıqdan vətənpərvər ruhda böyüyən gənc, illərlə düşmənə nifrət hissi ilə yaşamışdı. Bu itki isə onu o qədər sarsıtmışdı ki, komandirinin qisasını almaq üçün, bir an belə tərəddüd etmədən sübh tezdən Hərbi Komissarlığa gedir, adını könüllülərin cərgəsinə yazdırır və səbirsizliklə ön cəbhəyə gedəcəyi günü gözləyir...

Sentyabrın 27-si 2020-ci ildə II Qarabağ müharibəsinin başlanması xəbəri Telmanı da, bütün gənclər kimi, sevindirir. Nəhayət, o da Milli Ordunun sıralarında düşmənə layiqli cavab verəcək döyüşçülərin sırasında olacaqdı. Nəhayət, o da döyüş meydanında öz gücünü düşmənə göstərərək, yağının torpaqlarımızdan təmizlənməsində öz sözünü deyəcəkdi! Nəhayət, o da Qələbə qzanaraq, Azərbaycan bayrağını dalğalandıracaqdı! Ən əsası isə, o, sevimli komandirinin və minlərlə günahsız insanların, şəhidlərimizin qisasını alacaqdı! Gənc qəhrəman bu arzuyla yaşayaraq günləri sayırdı...

Okyabrın 3-ü Telmanın 25 yaşı tamam olur. Başqa vaxt olsaydı, o, yubileyini dostlarının ahətəsində təmtəraqlı şəkildə qeyd edərdi. Lakin ölkəmizdə müharibə şəraiti olduğu, hər gün şəhid xəbəri gəldiyi üçün, Telman ad gününü qeyd belə etmədi. Hətta Telmanın qərarından xəbəri olmayan qohumlar yığışıb gedirlər ki, təbrik etsinlər, ana bildirir ki, "istəmədi qeyd etməyi”.Özü isə gələn qonaqlara bircə gəlmə deyir: "Nə ad günü, bu qədər şəhidlərimiz var, heç onun yeridir?!”.

Oktyabrın 4-ü 2020-ci ildə Hərbi Komissarlıqdan "Çağırış” vərəqəsi alan Telmanın sevinci yerə-göyə sığmır. Sanki illərlə gözlədiyi bir həsrətə qovuşmuşdu. O qədər sevincli idi ki, hətta ailə üzvləri ilə görüşməyi də ağlına gətirmir. Telman səhər yeməyi də yemədən, atası ilə halallaşıb evdən çıxır. Hansı ki, səbirli olub, evə dönəcək əzizlərini gözləyə, görüşdükdən sonra yola düşə bilərdi...

Telman cəbhədə olanda, ailəsi nigaran qalmasın deyə, fürsət düşən kimi əlaqə saxlayırdı. Hər dəfə də yüksək əhval-ruhiyyə ilə hər şeyin yaxşı olduğunu, tezliklə qələbə çalınacağını vurğulayırdı. "Narahat olmayın, Burada hər şey yaxşıdır. Özünüzdən muğayat olun! Belə getsə, tezliklə zəfər çalaçağıq!” deyərək sevincini gizlətmirdi.

Telman tez-tez evlərinə zəng edirdi. Harad olduqları barədə heç bir məlumat vermirdi. Sonradan ailə üzvləri nilirlər ki, Füzulidədir.

Füzuli uğrunda gedən döyüşlər çox ağır keçmişdi. Bu müddətdə Telman nə soruşulurdusa, bircə kəlmə deyirdi: "Gələndə danışarıq, telefon söhbəti deyil”.Əslində döyüş meydanında nələr baş verdiyi haqqında danışmağı sevmirdi.

Azərbaycan Ordusu yeni qələbələrə imza ataraq əzmlə irəliləyirdi. Füzuli istiqamətində gedən əməliyyatlar uğurla nəticələndi. Qarşıda düşməndən təmizlənəsi yeni mövqelər dururdu. Telman da mübariz döyüşçülərin cərgəsində idi və irəli doğru can atırdı...

İgidimiz oktyabrın 27-si əzizlərinə zəng edir və sevinclə bildirir ki, "mütləq televizora baxın, bizi göstərəcəklər”.Axşam bütün ailə üzvləri televizorün önünə yığışır...

Azərbaycan Ordusunun mübariz, igid əsgəri son dəfə noyabrın 1-i 2020-ci ildə ailəsi ilə əlaqə saxlaya bilir. Hər kəslə hal-əhval tutandan sonra deyir: "Narahat olmayın, hər şəy yaxşıdır. Daşaltındayıq. Öpürəm sizi, tezliklə görüşərik”.Bu, Telmanın son zəngi olur. Bu zəngdən sontra Telmandan heç bir xəbər ala bilməyən ailə üzvləri narahat günlərini yaşayıır..

İllərdir doğma dədə-baba ocaqlarını görmək istəyi ilə yaşayan Telman, indi o torpaqların azadlığı uğrunda savaşırdı...

Noyabrın 8-i 2020-ci ildə Şuşa şəhərinin, ətrafın mənfur düşməndən təmizlənməsi uğrunda qızğın döyüşlər gedir. Telman Daşaltı əməliyyatında iştirak edir. Bu döyüşdə Azərbaycanın igid döyüşçüləri düşmənə qan uddururlar. Silah-sursatsız, əlbəyaxa döyüşdə ətraf qan çanağına dönür. Bu igidlərin arasında Vətənin qeyrətli oğlu, 25 yaşlı gənc Telman Abışov da olur.

Füzuli, Cəbrayıl, Qubadlı, Kəlbəcər... uğrunda döyüşlərdə şücaəti ilə seçilərək hər kəsin rəğbətini qazanan gənc qəhrəman Şuşa uğrunda gedən qanlı döyüşlərdə son damla qanınadək mübarizə aparır və həlak olaraq Şəhidlik Zirvəsinə ucalır.

Noyabrın 12-si Sumqayıt Şəhər Hərbi Komissarlığından Abışovlar ailəsinə cəsur döyüşçünün şəhidlik xəbəri verilir. Bu xəbər ailə üzvlərini, qohum-əqrabanı... sarsıtsa da, hamı bir kəlmə deyir: "VƏTƏN SAĞ OLSUN!”. Telman öz şücaəti ilə Azərbaycanın ZƏFƏR tarixinə öz adını Qızıl hərflərlə yazır, Allah dərgahında Cənnətin qapıları üzünə açılır. Onun adı milyyonların qəlbinə yazılmaqla, ruhu azad olunmuş Qarabağ torpaqlarında rahat gəzib-dolaşır...

Azərbaycan Ordusunun mərd, mübariz, qorxmaz cəngavəri, Telman Abışov noyabrın ayının 13-ü 2020-ci ildə Sumqayıt Şəhidlər Xiyabanında dəfn olunur.

Bu gün gənc qəhrəman haqqında döyüş yoldaşlarının danışıqlarını dinlədikcə 25 yaşlı bir gəncin zəngin ömür tarixçəsinin şahidi olursan. Bu zənginlik onun döyüş meydanındakı saysız-hesabsız qəhrəmanlıqlarıdır. "Telman təbiətcə sakit olsa da, döyüş meydanında bir zəngavər idi. Heç nədən qorxmadan düşmənin üzərinə gedirdi. Öz yaralı döyüş yoldaşlarını çiynində daşıyıb, həyatlarını xilas edib...”.

Hər zaman ailəcanlı, qohumcanlı, dostcanlı olan Telman, əziz-doğmalarla, dost-tanışlarla mehriban münasibət yaradar, şirin zarafatlar edər, deyib-gülər, pis və yaxşı günlərdə hamının yanında olardı. Az yaşı olsa da, xeyir-şərdən qalmazdı. O qədər ürəyiyumşaq idi ki, bir imkansız görsə, son qəpiyini də ona verərdi. Bütün insanları sevinən və xoşbəxt görmək istəyərdi. Vətənpərvərlik, xeyirxahlıq onun qanında idi!

Bu gün igidimiz Telman Abışov haqqında onu tanıyanların deyəcəyi çox söz var. Bu xatirələr danışdıqca tükənməz. Vətənini, Torpağıni hər şeydən, hər kəsdən, hətta arzularından üstün tutdu qəhrəmanımız. İllər keçəcək hələ neçə-neçə kitablar yazılacaq 25 yaşlı qoçaq əsgər haqqında...

Azərbaycan Silahlı Qüvvələrinin mərd, qeyrətli, yenilməz əsgəri, atıcı Telman Nadir oğlu Abışov ölümündən sonra, Azərbaycan Respublikasının prezidenti İlham Əliyevin müvafiq Sərəncamlarına əsasən, "Vətən uğrunda”, "Cəsur döyüşçü”, "Füzulinin azad olunmasına görə” və "Şuşanın azad olunmasına görə” medallarıilə təltif olunub.

Ruhun şad olsun, Cənnətməkan Şəhidimiz!!!

Aygün Hacıyeva,

AJB, AYB, AAB-nin üzvü