--------------------------------------

HÜSEYNOV CAVAD CAVİD oğlu

(Əsgər)

HÜSEYNOV CAVAD CAVİD oğlu 16 sentyabr 1998-ci il Lerik rayonunun Çayrud kəndində dünyaya göz açıb. 2005-ci ildə Sumqayıt şəhəri M.Müşfiq adına 34 saylı tam orta məktəbə gedib.

C.Hüseynov təhsil aldığı müddətdə bir çox uğurlara imza atıb. 7-ci sinifdə oxuduğu zaman "Cüdo” güləş növü ilə məşğul olub. Rəssamlıq qabiliyyəti olduğundan, 9-cu sinifdə,"Gənc Rəssamlar” dərnəyinin üzvü kimi, rəsm müsabiqəsində iştirak edir. Asfaltın üzərində təbaşirlə çəkdiri "Ana fəryadı”rəsmi münsiflər heyəti tərəfindən yekdilliklə bəyənilir və Cavad Fəxri Fərmanla təltif olunur. Həmçinin həmin tədris ilində "Gənc rəssamlar” dərnəyinin hesabat sərgisində fərqləndiyinə görə, Fəxri Fərmana layiq görülür.

Doğma dilini ürəkdən sevən, ədəbiyyata xüsusi maraq göstərən Cavadın gözəl də şeir söyləmək istedadı var idi. O, bir neçə dəfə şeir müsabiqələrində iştirak etmişdi. "20 Yanvar” faciəsinin 24-cü ildönümünə həsr olunmuş şeir müsabiqəsində II yeri tutduğuna görə, məktəb rəhbərliyi tərəfindən Diplomla təltif olunmuşdu.

C.Hüseynov 2012-ci ildə Sumqayıt şəhərində, "Fərid” İdman Klubunun təşkilatçılığı ilə keçirilən, "İdman ili”nə həsr olunmuş, yeniyetmələr arasında Cüdo güləşi üzrə açıq birincilikdə, öz çəki dərəcəsində III yeri tutmuş, Diplomla təltif edilmişdi. Cavidin idmandakı uğurlarını sadalamaqla qurtarmaz. Bir sözlə,Cavad məktəbin fəxri idi. İstedadına, bacarığına, ağlına, zakasına, təlim-tərbiyəsinə görə fərqlənərək, müəllim kollektivinin və yoldaşlarının sevgisini qazanmışdı.

C.Hüseynov 2016-cı ildə Lənkəran Dövlət Universitetinin "Biznesin idarə edilməsi” fakültəsinə qəbul olur. Cəmi İki il yarım oxuyur. Ailənin imkansızlığı ucabatından, maddiyyat baxımından yaranmış problemlər səbəbindən oxumağa həvəsli olan, istedadlı gənc universitetdə təhsilini dondurmalı olur.

C.Hüseynov 2019-cu ilin oktyabr ayında Lerik rayon Hərbi Komissarlığı tərəfindən həqiqi hərbi xidmətə çağrılır və xidmətini yerinə yetirmək üçün Goranboy rayonundakı "N” saylı hərbi hissəyə göndərilir. 3 aylıq təlimlərdən sonra o, Ağdam rayonunda yerləşən "N” saylı hərbi hissədə, daha sonra isə Tərtər rayonunda yerləşən "N” saylı hərbi hissədə xidmətinə davam edir.

Ailə:Hüseynovlar ailsi 2004-cü ildə taleyini Sumqayıt şəhəri ilə bağlayıb. Corat qəsəbəsində birotaqlı kiçik mənzildə kirayə qalsalar da,mehriban, sevgi dolu bu ailədə xoşbəxtliyin çırağı yanıb.Ata sürücü işləyərək, ailəsini halal qazancı ilə dolandlrlb, uşaqlarını vətənpərvər ruhda böyüdüb. Ana uşaqların təlim-tərbiyəsi, təhsilləri ilə məşğul olub, ailə qayğıları ilə yaşayıb. İki qardaş və bir bacı isə uşaqlıqdan mehriban olmala bir-birilərinə arxa-dayaq durublar. Uşaqlar böyüdükdə birotaqlı mənzildə yaşamaq çətin olduğundan, ailə Sumqayıt şəhərində kirayə ev tutmalı olur. Əvvəlkindən nisbətən böyük olan mənzildə heç olmasa uşaqların normal təhsil alması üçün müəyyən şərait yaranır...

Cavadı yaxından tanıyaq:Cavadın ən böyük arzularından biri bacısını xoşbəxt görmək idi. Bacısının toyunda onun sevincinin həddi-hüdudu olmayıb. İki qardaş – Anar və Cavad qardaş olmaqla yanaşı, həm də dost, sirdaş olublar, hər zaman valideynlərə dəstək olmağa çalışıblar.

Cavad saf, təmiz qəlbli, heç kimlə işi olmayan uşaq olub. Qayğıkeş, diqqətcil, mehriban, səmimi, səliqə-sahmanlı olması ilə seçilən Cavad, həm də cəsur, qorxmaz, sözünün arxasında duran, hər kəsə kömək etməyə çalışan mərd oğlan idi. Boş vaxtlarını dəyərləndirməyi bacarırdı. O qədər fərasətli, bacarıqlı, fəal idi ki, bir çox işlərin öhdəsindən gəlməyə zaman tapırdı. Rəsm çəkər, idmanla məşgul olardı. Hətta musiqiyə də marağı olubdur. Dostları ilə bir yerə yığışanda şeir söyləyər, mahnı oxuyardı.

Bütün oğlanlar kimi Cavadın da futbola xüsusi marağı olub. Əsl futbol azarkeşi idi. Bir oyunu da nəzərdən qaçırmazdı. Boş vaxtlarında dostlarla futbol oynayar, hətta birlikdə məhəlləarası yarışlar da təşkil edərdilər.

Təbiət vurğunu olan Cavadın elə təbiət qoynunda şeir yazmaqları da olub. Bunun təsdiqi ondan qalan yazılardır. Eşq dolu şeirlər... Olsun ki, onun da xoşuna gələn, könlünə yatan qız olub, amma o, bu barədə kimsəyə bir söz deməyi məsləhət bilməyib. Onun da, təbii ki, tükənməz xəyalları, arzuları olub... Necə ki, valideynlər də Cavadı evləndirib, nəvə-nəticə görmək istəyiblər...

Hələ uşaqlıq illərində vətənpərvər ruhda böyüyən Cavad müntəzəm olaraq xəbərləri izləyər, ölkədə baş verən hadisələrlə maraqlanardı. 2020-ci ilin iyul ayında baş verən Tovuz hadisələri zamanı general-mayor Polad Həşimovun həlakından təsirlənən gənc əsgərin əzizlərinə yazdığı mesajda deyilir: "Şəhid olmaq üçün deyil, qan tökmək üçün mübarizə aparacam!”.Cavad bütün günahsız insanların, şəhidlərin intiqamını almaq, el-oba həsrıti ilə alışıb-yanan insanların yurd həsrətinə son qoymaq üçün... şərəfsiz düşmənin qanını içməyə belə hazır idi. Hər an ön cəbhəyə getmək arzusunda olduğunu əsgər yoldaşlarına da bildirərdi...

Vətən müharibəsi:27 Sentyabr 2020-ci il tarixində II Qarabağ müharibəsi başlananda, minlərlə gənc kimi, Cavad da çox sevinir. Elə sevinc hissi ilə də müharibəyə qatılır, Füzuli, Cəbrayıl rayonu istiqamətində, Hadrut qəsəbəsi uğrunda gedən döyüşlərin iştirakçısı olur.

Cavadın ailəsi ilə son danışığı 15 oktyabr tarixində olur...

Oktyabrın 16-da, döyüşə getməmişdən bir gün qabaq, sanki ürəyinə dammış kimi, Cavad yazdığı məktubu döyüş yoldaşına verərək,"mən şəhid olsam, bu məktubu ailəmə çatdırarsız” deyir. Yoldaşı məktubu götürmək istəmir. "Bu nə sözdür? Belə danışma... İnşallah, sağ-salamat ailənin yanına qayıdacaqsan”.Cavad gülümsəyərək bir söz demir. Qolundakı saatı çıxarıb yoldaşının qoluna taxır və: "Şəhid olsam, bu saatı qardaşımın qoluna taxarsan”, – söyləyir.

Oktyabrın 17-si Tərtər rayonunun Suqovuşan kəndi istiqəmətində qızğın döyüşlər gedir. Cavadgil birirnci döyüşdən sağ-salamat çıxırlar. O, təəssüflənərək, əsgər yoldaşına "mən sağ qaldım”desə də, ikinci döyüşdə həlak olaraq Allah dərgahında ən uca məqama - Şəhidlik Zirvəsinə ucalır.

Azərbaycan Ordusunun qorxmaz, igid, qoçaq, mərd qəhrəmanı öz şücaəti ilə Azərbaycan Tarixinə adını Qızıl hərflərlə yazaraq, milyonların qəlbundə özünə məskən saldı – şücaəti ilə, insanlığı ilə, çəngavərliyi ilə!!!

Qəhrəmanımızın nəşi 34 gün neytral zonada qaldıqdan sonra çıxarılaraq Sumqayıt şəhərinə gətirilir. Böyük izdihamın müşayiəti ilə qeyrətli Vətən oğlu 18 noyabr 2020-ci ildə tarixində Sumqayıt Şəhidlər Xiyabanında dəfn olunur.

Bu gün Cavadın vəsiyyət olaraq əzizlərinə ünvanlayaraq yazdığı məktubun hər cümləsi könüllərdə iz qoyub:

"Salam. Allahın adıyla başladım. Son danışığım olacaq, bəlkə də sizinlə.

Gözəl Anam, 30 ilə yaxın olar ki, şərəfsizlərdə olan torpaqlarımız qayıdır.

Anam, Atam, qardaşım, bacım və sevdiklərim, qismət olsa, inşallah, şəhid olsam, ağlamayın. Qara bağlamayın. Qarabağın alınmasında şəhid düşən əsgər yoldaşlarım, qardaşlarım üçün dua edin. Sağ qalsam, sizə söz verirəm, Ağdamda, Ağdərədə, Füzulidə, Kəlbəcərdə, hər hansısa bir Qarabağ bölgəsində əlaqə saxlayacam.

Artıq durmaq yox, durdurmaq lazımdır! Yeravana kimi qovacağıq şərəfsizləri! Qardaşım da, inşallah, gəlib Qarabağda xidmət edər. Sakitlik, Firavanlıq, Azadlıq tapan Qarabağdan sizə vəsiyyətim: həyatınıza davam edin, arxamca ağlamayın. Sevinc göz yaşı tökün.

Şəhid olmaq üçün, qan tökmək üçün mübarizə aparacam!

Bacım, oğlunun adını "Polad” qoyarsız. Qardaşımın da toyunda əl qaldırıb oynayın. Nənəm də oynasın.

Sizi çox sevirəm.

Əsgər oğlunuz Hüseynov.

HAQQINIZI HALAL EDİN!”.

Azərbaycan Siahlı Qüvvələrinin yenilməz əsgəri, qəlbi hər zaman Vətən eşqi ilə döyünən 22 yaşlı qəhrəmanımız Cavad Cavid oğlu Hüseynov ölümündən sonra, Azərbaycan Respiblikası prezidentinin Sərəncamına əsasən, "Vətən uğrunda”, "Cəsur döyüşçü” və "Suqovuşanın azad olunmasına görə” medallarıı ilə təltif olunub.

Ruhun şad olsun, Cənnətməkan Şəhidimiz!!!

Aygün Hacıyeva,

AJB, AYB, AAB-nin üzvü