-------------------------

ELVİN AĞASƏLİM oğlu ZAKIROV 15 avqust 1980-ci ildə Sumqayıt şəhərində anadan olub. 1987-1998-ci illərdə Sumqayıt şəhər Z.Hacıyev adına 17 saylı tam orta məktəbdə oxuyub.

E.Zakirov ali təhsil almaq və hərbiçi olmaq arzusunu reallaşdırmaq üçün sənədlərini Azərbaycan Dövlət Pedaqoji Universitetinə verib və "Fiziki tərbiyə və hərbi hazırlıq” fakültəsinə daxil olub. "Tələbə” adını qazanan gənc, dərslərində və universitetin ictimai həyatında fəallığı, xoş xasiyyəti, təlim-tərbiyəsi, özünəməxsus xarakteri ilə seçilib, pedaqoqların və tələbə yoldaşlarının hörmət və rəğbətini qazanıb.

Ali təhsilini uğurla başa vuran Elvin Zakirov, Vətənə xidmət etmək üçün, 2002-ci ildə birbaşa Goranboy rayonunda yerləşən "N” saylı hərbi hissəyə "Leytenant” rütbəsi ilə göndərilib. 

E.Zakirov10 illik hərbi xidməti zamanı "Baş leytenant” rütbəsini alıb, Qazax rayonunda sərhəd bölgəsində xidmət edib. Daha sonra Lənkaran və Astara şəhərlərində xidmətinə davam etdikdən sonra, ehtiyatda olan zabit kimi, ordu sıralarından tərxis olunub. 

2016-cı ildə baş verən, tarixə "Şanlı Aprel hadisələri” kimi düşən Aprel döyüşləri zamanı E.Zakirov bu savaşda iştirak etmək üçün adını könüllülərin siyahısına yazdırır. Müharibənin qısamüddətli olmasına görə döyüşlərə qatıla bilmir. 

2020-ci ilin iyul ayında baş verən Tovuz hadisələri zamanı ehtiyatda olan zabit bir yerdə qərar tuta bilmir. Azərbaycan Ordusunun qeyrətli zabitlərinin düşmən tərəfindən məhv ediməsindən çox üzülür. Ön cəbhədə - döyüş bölgəsində mənfur qonşuların təxribatlarının  səngimək bilməməsindən qəzəblənən Baş leytenant özünü cəbhə bölgəsində görürdü. 

Nəhayət, rəhbərlik tərəfindən səfərbərlik elan olunduqdan sonra, Elvin Zakirov bu dəfə də könüllü olaraq orduya yazılır. Müharıbəyə qatılmaq üçün razılıq aldığı gün o, sevincindən yüksək rütbəli zabiti qucaqlayıb öpərək təşəkkürünü bildirir.

Beləliklə, könüllü olaraq müharibəyə yollanan ehtiyatda olan Baş leytenant Elvin Zakirovun döyüş yolu 16 oktyabr Ağcabədi şəhərindən başlayır.  Daha sonra cəsur zabit qızğın döyüş bölgələrində - Füzui, Qubadlı, Zəngilan, Xocavənd rayonlarında olur, bu istiqamətlərdə gedən döyüşlərdə şücaət göstərərək, bir çox kənd və qəsəbələrin, yüksəkliklərin alınmasında iştirak edir. "Taqım komandiri” vəzifəsini icra edən qəhrəmanımız düşmənə qarşə mərdliklə mübarizə apararaq, onların layiqli cavbını verir, yüzlərlə canlı qüvvəsini, texnikasını məhv edir. 

Hər zaman əsgərlərinin qayğısına qalan, onlara atalıq edən, böyük qardaş kimi, məsləhət verən, onları qoruyan komandir, hər bir itkidə göz yaşlarını saxlaya bilmirdi. Düşmən əlinə keçməsin deyə, şəhid olmuş igidlərimizi döyüş meydanından kənarlaşdırmağa çalışırdı. Yaralı əsgər və zabitlərin, fürsət düşəndə, yaralarını da sarıyır, təxliyə edirdi. 

Həyat eşqli Elvin Zakirov ölümün gözünə dik baxaraq, düşmən üzərinə amansızcasına şığıyır, son gülləsinədək onları atəşə turur, Azərbaycan tarixinə düşən qara ləkələri düşməndən qisas alaraq təmizləyirdi. Xasiyyətcə sakit, mülayim, qəlbiyumşaq insanı döyüş meydanında tanımaq olmurdu. O, bir pələngə dönmüş cəngavər kimi, düşmənə göz açmağa belə imkan vermirdi.

Ailəsinə həddən çox bağlı olan, övladları ilə nəfəs alan atanın gözündə bu anlarda VƏTƏNdən savayı heç nə görünmürdü! Bu anlarda günahsız insanların, Azərbaycanın azadlığı və bütövlüyü uğrunda HAQQ savaşında həlak olmuş ŞƏHİDLƏRimizin İNTİQAMı ilə yaşayırdı QƏHRƏMANIMIZ...

AİLƏ: Əslən Ağdaşdan olan ata və Qazaxdan olan ana  Sumqayıt şəhərində tanış olub, ailə həyatı qurublar. Ailədə bir oğlan və bir qız övladı olmaqla, iki uşaq böyüyür. Sadə, zəhmətkeş aildə övladlar vətənpərvər ruhda tərbiyə olunurlar. Ağasəlim bəy rəhmətə gedəndən, evin qız övladı ailə həyatı qurandan sonra, ana oğlu ilə birgə yaşayaraq, həyatın imtahanlarından alnıaçıq, üzüağ çıxamağa çalışır...

Zamanı gələndə ailə həyatı qurmaq, oğul-uşaq sahibi olmaq arzusuna qovuşur gənc oğlan. O, 2001-ci ildə sevib-seçdiyi Samirə xanımla ailə həyatı qurur. Ailəyə bir qız və bir oğlan övladının – Toğrul və Yağmurun gəlişi vaideynlərə bir dünya sevinc bəxş edir.  

Zakirovlar ailəsini "hərbiçi ailəsi” də adlandırmaq olar. Hər zaman əmək fəaliyyətində olmuş ali təhsilli Samirə xanım 2011-2016-cı illərdə Daxili Qoşunlarda "Kərgüzar” vəzifəsində çalışıb. 

Ailəcanlı, qayğıkeş olan Elvin Zakirov hər zaman övladlarının dərsləri ilə maraqlanar, onların tərbiyəli, əxlaqlı, vətənpərvər, elmli, savadlı olmalarını arzulayardı. 2020-ci ildəToğrul AMİU-ya daxil olanda atanın sevinci yerə-göyə sığmır. O, Yağmurun da ali təhsil almasını, hətta onun hüquqşünas olmasını istəyirdi.

Xasiyyəti: Sakit təbiətli, istiqanlı, həlim xasiyyətli, gülümsər çöhrəli, ciddi xarakterli Elvin Zakirov hələ uşaq vaxtlarında tərbiyəli davranışı, ağıllı danışığı, zəkası ilə diqqəti çəkmiş, maraqlı söhbətləri ilə qəlblərə yol tapmışdı. Məktəb illərində idmana və hərbiyə xüsusi maraq göstərmişdi. Elə bu maraq və həvəsdən bir çox idman növləri ilə; cüdo, güləş, üzgüçülük, futbolla məşğul olmuşdu. Cüdo ilə bağlı ciddi məşqlər etmişdi. Dəfələrlə şəhər və respublika yarışlarında iştirak etmiş, bir çox mükafatlar qazanmışdı. Təltif və medallar saya gəlməzdi. Hətta "Qara kəmər”ə  də layiq görülmüşdü. İdmanda bir çox nailiyyətlərə imza atmış gənc, daha bir arzusunu gerçəkləşdirməyi qarşısına məqsəd qoymuşdu...

E.Zakirov ali məktəbə daxil olaraq, Vətən qarşısında oğul borcunu yerinə yetirərək arzularına çatır.

İncə qəlbli, sakit təbiətli, mülayim xasiyyətli idi. Bəzən belə insanları həzin müsiqiyə bənzədirlər. Heç kimlə işi olmayan, hər kəsə mehribanlıqla yanaşan, qəlbində insanlara qarşı yalnız xoş arzular olan, sakit, rahat həyat yaşamağı arzulayan olub igidimiz. O qədər ürəyi saf və təmiz olub ki, 5 yaşlı uşaq da desəydi "mənimlə gedək”, 

"gəl, nəsə edək”,.. onun xətrinə dəyməz, yanına düşüb gedərdi, təki o uşağı sevindirsin. Kimisə xoşbəxt etmək, sevindirmək üçün əlindən gələni etməyə hazır olardı. 

Elvin Zakirovun ən gözəl keyfiyyəti onun qəlbinin böyüklüyü, ürəyiyumşaqlığı idi.  O, kimsəsiz, atılmış uşaqlara görə valideynləri qınayardı. "Onların uşaqlara bu həyatı yaşatmağa haqqları yoxdur!” deyərdi. Bəlkə, elə bu səbəbdəndir ki, heç vaxt uşaqlarını başqalarının yanında əzizləməzdi. Belə məsələlərdə çox diqqətli  idi.

Müharibə:  Müharibə zamanı  Elvin Zakirov, demək olar ki, hər gün 2-3 dəfə ailəsi ilə əlaqə saxlayırdı. Əzizləri ilə danışan zaman olduğu yerlər, hərbi əməliyyatlar barədə heç bir məlumat verməz, sadəcə, "narahat olmayın, irəliləyirik” deyərdi.  Noyabrın 8-ində zabitimizin ailəsinə son zəngi olur. 

Noyabr ayının 8-dən 9-na keçən gecə Xocavənd istiqamətində döyüşlər başlayır. Məğrur döyüşçülərimiz, hazırlanmış döyüş planına əsasən, Şüşa istiqamətində  irəliləyirdilər. Düşmən hər vəchlə irəli gedən, itirilmiş torpaqları geri alan Azərbaycan Ordusunun qeyrətli oğullarının gücü qarşısında tab gətirə bilmirdi... 

Elvin Zakirov 2020-ci il sentyabrın 27-dən başlanan Vətən müharibəsi zamanı şərəfli döyüş yolu keçərək, Azərbaycanın bir çox bölgələrində qalibiyyətə imza ataraq, noyabr ayının 9-da son yolçuluğu olan Xocavənd-Şuşa istiqamətində gedən döyüşlərdə qəhrəmancasına halak olur və ən uca məqama - Şəhidlik Zirvəsinə ucalır. 

Azərbaycan Ordusunun mətin, cəsur zabiti Elvin Zakirov noyabr ayının 20-si  2020-ci ildə Sumqayıt Şəhidlər Xiyabanında dəfn olunur.

Gözəl insani kefiyyətləri ilə sağlığında onu tanıyanların qəlbində məhəbbət qazanmış vüqarlı, ləyaqətli, vicdanlı, xeyirxah Vətən sevdalı oğul olan Elvin Zakirov şücaəti ilə 10, 100, 1000 nəfərin deyil, milyonların qəlbində özünə taxt qurdu! Bu gün Elvin kimi mübariz, qoçaq, cəsur igidlərimizin sayəsində AZAD AZƏRBAYCANın hər qarış torpağında doğma diyarın üçrəngli bayrağı dalğalanır!!! 

Azərbaycan Silahlı Qüvvələrinin mərd, qorxmaz, cəsur zabiti, 40 yaşlı Baş leytenant Elvin Ağasəlim oğlu Zakirov ölümündən sonra, Azərbaycan Respublikasının prezidenti İlham Əliyevin müvafiq Sərəncamlarına əsasən, 3-cü dərəcəli "Vətənə xidmətə görə” ordeni, "İgidliyə görə”, "Vətən uğrunda”, "Füzilinin azad olunmasına görə” və "Xocavəndin azad olunmasına görə” medalları ilə təltif olunub. 

Ruhun şad olsun, Cənnətməkan Şəhidimiz!!!