Sumqayıt şəhərində yerləşən çoxmərtəbəli yaşayış binasının lifti uzun müddətdir işləmir. Söhbət 9-cu m/r ərazisində fəaliyyət göstərən "Şərq" MTK-nın tikdiyi çoxmərtəbəli yaşayış binasından gedir.
Yeni quraşdırılan liftin işləməməsi sakinlər üçün əlavə problemlər yaradıb. Onlar yuxarı mərtəbələrdəki mənzillərinə qalxa bilmirlər. Xüsusilə də yaşlı insanlar və uşaqların yuxarı mərtəbələrə qalxmasında çətinliklər meydana çıxıb. Dəfələrlə müraciət etsələr də, komendantın problemin həlli istiqamətində heç bir addım atmadığını bildiriblər. İndi vətəndaşlar çaş-baş qalıblar. Bəzi vətəndaşlar həmin liftlərə minməkdən qorxurlar.
Ekspertlərin fikrincə, tikintini aparan şirkət mənzillər təhvil verildikdən sonra da binada liftlərin işləməsini təmin etməlidir. Bunun üçün hündürmərtəbəli binalarda yaşayan sakinlərdən komunal ödəniş də alınır. Binada olan bütün texniki qurğulardan tikinti şirkətinin məsuliyyət daşıyır. Xüsusi ilə də liftlər mütəmadi istifadə olunduğundan texniki baxışın vaxtı vaxtında keçirilməsi vacibdir. MTK-nın hər hansı bir şirkətlə müqaviləsinin olub olmaması araşdırılmalıdır. Əgər qəza baş verərsə, məsuliyyəti həmin şirkət daşımalıdır. Əks halda bütün məsulliyyət MTK-nın üzərində qalır.
Unutmayaq ki, nasaz liftlərin ucbatından hər il 2-3 nəfər xəsarət alır, hətta ölüm halları da baş verir. Ümid edirik ki, sözügedən bina sakinlərinin lift problemi tezliklə həllini tapacaq və biz mövzuya yenidən qayıtmaq zərurəti hiss etməyəcəyik.
Qeyd edək ki, "Şərq" MTK-nın direktoru Ziyadxan Abbasovdur. Bir müddət əvvəl mediada yayılan məlumata görə, inşaat şirkəti olan "Şərq MTK” MMC-nin rəhbəri Ziyadxan Abbasovun ölkədən çıxışı məhdudlaşdırılıb. Ziyadxan Abbasova "stop” qoyulmasının səbəbi "Şərq MTK” MMC-nin külli miqdarda vergi borcu olması ilə əlaqədardır. İş adamı borcu ödəmədiyinə görə İqtisadiyyat Nazirliyi yanında Dövlət Vergi Xidməti 2 Saylı Ərazi Vergilər Baş İdarəsi xüsusi icraat qaydasında məhkəməyə ərizə ilə müraciət edib. İş materiallarından məlum olur ki, həmin vaxt şirkətin 51 342,53 AZN vergi borcu olub. Lakin məhkəmədən sonra da borc ödənilməyib.
Elşən Yəhyayev
Xeberle.com
Xəbərdən istifadə edərkən istinad etmək vacibdir.
