Sumqayıt marşrut avtobuslarında kondisioner sisteminin işləməməsi sərnişinlərin haqlı narazılıqlarına səbəb olur. Təəssüf ki, avtobusların ənənəvi problemi davam edir. Hələ də Sumqayıt ərazisində kondisioneri olmadan sərnişindaşıma ilə məşğul olan nəqliyyat vasitələrinə yenə rast gəlirik. Belə ki, Bakıda fəaliyyət göstərən avtobuslarda kondisoner olsa da, işlək vəziyyətdə deyil. Bu isə sərnişinlərin haqlı və ciddi narazılığına səbəb olur. Sərnişinlər deyirlər ki, bu problem isti havalarda onlar üçün dözülməz vəziyyət yaradır.
Tarif Şurasının qərarı ilə avtobuslarda gedişhaqqı 10 qəpik artırılaq 50 qəpik oldu. Bəs, avtobuslarda gediş haqqının artırılması sərnişindaşıma xidmətinə hansı "keyfiyyət”i gətirdi? Təəssüf ki, hələ də avtobuslarda kondisioner sisteminin işləməməsi "keyfiyyət”in yerində saydığının göstəricisidir.
Məsələ ilə bağlı Azərbaycan Yerüstü Nəqliyyat Agentliyi (AYNA) ilə əlaqə saxladıq. Qurumun mətbuat katibi Tural Orucov Xeberle.com-a açıqlamasında bildirdi ki, hər il olduğu kimi, bu il də yay mövsümü başlamazdan əvvəl müntəzəm sərnişindaşıma fəaliyyəti göstərən daşıyıcılara rəsmi qaydada xəbərdarlıq məktubu göndərilib. Qurum rəsmisi onu da qeyd edib ki, onlara avtobuslarda sərinləndirmə sistemlərinin işlək vəziyyətə gətirilməsinə dair göstərişlər verilir: "Müntəzəm marşrut xətt avtobuslarında havalandırma, isitmə və sərinləndirmə sistemlərinin olması sərnişinlərin rahatlığı üçündür. Nazirlər Kabinetinin 73 saylı qərarı ilə təsdiq olunan tələblərdə də bu məsələ xüsusilə qeyd edilib. Hər bir daşıyıcı şirkət istismarında olan avtobuslarda bu sistemlərinin olması və işlək vəziyyətdə saxlanılması üçün məsuliyyət daşıyır”
Daha sonra Sumqayıt şəhər İcra Hakimiyyəti ilə əlaqə saxladıq. İcra Hakimiyyətindən də bildirilib ki, şəhər ərazisində fəaliyyət göstərən avtobuslarda kondisioner sisteminin işlək vəziyyətdə olması ilə bağlı tapşırıq verilib.
Yol-nəqliyyat eksperti Eldar Bəşirovun sözlərinə görə, avtobuslarda kondisioner sisteminin işləməməsinə avtobazalarda bu sahəyə baxan texniki şöbə məsuliyyət daşıyır. Ekspert bildirib ki, həmin texniki şöbə avtobusların tam texniki göstəricilərə uyğun olması ilə bağlı yol vərəqələrinə qol çəkir və avtobus xəttə buraxılır: "Sərnişin avtobuslarında kondisionerlərin işləməməsi ahıl insanlara pis təsir göstərir. Avtobazalarda bu sahəyə baxan texniki şöbə yol vərəqələrinə qol çəkib, avtobusları marşrut xəttinə buraxırlar. Onlar avtobusu xəttə buraxanda, nəqliyyat vasitəsinin tam saz olmasına və bütün sistemlərinin işləməsinə cavabdehlik daşıyır. Əgər kondisioner işləmirsə, avtobus xəttə buraxılmamalıdır. Ən azı bir günlük texniki qulluq olunmalıdır. Hər bir avtobus xəttinin müəyyən qrafikası olur. Necə olur ki, avtobazanın müdiri, baş mühəndisinin şəxsi avtomobilində kondisioner sistemi işləyir, lakin avtobuslarda işləmir?! Bu qədər insan avtobusda gedir. Niyə avtobuslarda kondisioner işləməməlidir?! Texniki işlərə nəzarət edən şəxslər bilirlər ki, avtobuslarda kondisioner işləmir. Bu halda avtobuslar niyə xəttə buraxılır?! Onlar buna görə tam məsuliyyət daşıyırlar”, - deyə ekspert tənqid edib.
Qeyd edək ki, dünyanın bir çox ölkələrində şəhərdaxili marşrutlarda kondisionerli avtobuslardan istifadə olunur. Hətta bəzi ölkələrdə əhalinin rahatlığı üçün kondisionerli dayanacaqlara da rast gəlinir. Sumqayıt şəhəri və regionlarda isə mənzərə heç də ürəkaçan deyil.
Mövzunu davam etdirəcəyik.
Elşən Yəhyayev
Xəbərdən istifadə edərkən istinad etmək vacibdir.
