Müsahibim Nasir Yasər oğlu Rzayev 1947-ci ildə Sumqayıt rayonunun Pirəkəşgül kəndində anadan olub. 1950-ci ildən valideynləri ilə Sumqayıt şəhərinə köçüblər. O, burada boya-başa çatıb. Erkən yaşlarından idmanla məşğul olub. İdmanın boks növü üzrə SSRİ idman ustasıdır. Ali təhsillidir. Gənc yaşlarından Sumqayıt və Bakı şəhərlərindəki sənaye obyektlərinin tikintisində fəhləlikdən idarə rəhbərliyinə qədər məsul vəzifələrdə çalışıb. Hal-hazırda Sumqayıt şəhər İcra Hakimiyyəti başçısının Hacı Zeynalabdin qəsəbəsi üzrə nümayəndəsidir. Nasir Rzayev Sumqayıt şəhəri və onun ətrafında olan yerlərlə bağlı mənə, heç vaxt yazılmamış çoxlu maraqlı məlumatlar verdi. Ümumiyyətlə, Nasir Rzayev Sumqayıtın canlı ensiklopediyasıdır. Çox əfsus ki, Sumqayıtla bağlı yazarlar ona müraciət etməyib, Nazir müəllimin bu şəhərlə və ətraf kəndlərlə bağlı bildiklərini bu vaxta qədər yazıya köçürməyiblər. İndi həmin məlumatların çox kiçik bir hissəsini oxucuların ixtiyarına verirəm. Bu məlumatlar vasitəsi ilə biz, bilmədiyimiz çoxlu məsələləri, tarixi hadisələri, maraqlı faktları öyrənəcəyik.

- 1937-ci ildə Sumqayıtda TEÇ-1 (Mərkəzi Elektrik Təchizatı) zavodunun (mərkəzinin) tikintisinə başlanılıb, - deyə Nasir müəllim sözə başladı. Əslində isə Sumqayıtda tikinti hələ 1920-ci illərin axırlarından başlayıb. Təxminən 1927-28-ci illərdən. O zaman Bakıda neft sənayesini inkişaf etdirmək üçün boru lazım idi. Boru zavodu tikmək üçün də ən münasib yer indiki Sumqayıt ərazisi hesab olunurdu. Çünki bu yerin bir tərəfi Xəzər dənizi, bir tərəfi magistral yol və bir tərəfində də dəmir yolu keçirdi. Artıq 1937-ci ildən isə Sumqayıt, Bakı şəhərinin rayonu idi.

- Bəs Sumqayıt sözü necə yaranıb?

- Mənim nənəm deyirdi ki, biz getdik Suqayıtıya. Bizim çayqırağı kəndlərdən gələn çay, bura çatanda 90 dərəcə dönüb, Xəzər dənizinə tökülür və elə bil oradan da su geri qayıdır. Ona görə də bura dağlılar Suqayıtı, yəni su qayıdan yer deyiblər. Ruslar Bakıya dəmir yolunu çəkəndə əlbəttə, "suqayıtı” sözünü deyə bilməyib və buranı Sumqayıt adlandırıblar. Beləliklə, bu yerin adı Sumqayıt qalıb və sənədlərə də ruslar rəhbərlik etdiklərindən belə yazılıb. Qalan əfsanələri də sadəcə adamlar uydurublar. Əlbəttə, Sumqayıtla bağlı əfsanələr çoxdur... Azərbaycana dəmir yolu çəkiləndə, dəmir yolunun keçdiyi yerlərdə soruşurdular ki, bu yerin adı nədir? Məsələn Qlizidən keçəndə soruşublar və yerli camaat da deyib ki, Qlizi. Amma ruslar bu yerə Kiləzi deyib və yazıda da adı Kiləzi qalıb. Mən çoxlu belə faktlar deyə bilərəm...

Sumqayıt, 1949-cu ilə qədər Bakının bir rayonu olub. Mənim də doğum sənədimdə Sumqayıt rayonu, Pirəkəşkgül kəndi yazılıb. Artıq iki yaşım olanda Sumqayıta şəhər statusu verilib. Mənim 3 yaşım olanda biz Sumqayıta, Stalin küçəsinə köçmüşük. Xruşşov Stalini "vətən xaini” edəndən sonra həmin küçənin adını dəyişib, Dostluq küçəsi qoydular. İndi isə müasir Azərbaycanın banisi, memarı, qurucusu, ulu öndər, əbədiyaşar prezidentimiz Heydər Əliyevin adını daşıyan prospektdir. Biz, bura köçəndə "Bahar” restoranı tikilirdi. Bu restoran Sumqayıtda ilk restoran olub. İndiki şəhər İcra Hakimiyyətinin binası isə 1957-ci ildə tikilib. Həmin yerlərdə əvvəllər Corat camaatının bağları olub.

- Sumqayıtın ilk tikinti illəri sizin yaddaşınızda necə qalıb?

- Biz, Sumqayıta köçəndə indiki Nəriman Nərimanov adına Mədəniyyət Evi və onun ətrafında olan binalar yox idi. Eləcə də indiki Heydər Əliyev prospektində evlər yalnız N. Nərimanov adına Mədəniyyət Evinə qədər idi. Hətta Nizami küçəsində, indiki İcra Hakimiyyətinin binasının yeri və 1, 2, 3-cü məhəllədəki evlər də yox idi. Həmin yerlər hamısı Coratın bağları idi. Yadıma gəlir ki, artıq 1956-57-ci illərdə 1 may tədbirlərindən sonra biz, indiki 3-cü mikrorayonun yerinə gedirdik. Çünki oralar da boş idi. Oradan Corata yol gedirdi. O vaxt Avtovağzal da indiki Narkologiya xəstəxanasının yerində idi. İndiki köhnə yolla avtobuslar Kimya zavodunun qarşısından keçib əsas Bakı-Quba yoluna və oradan da Baklya gedirdi. Yəni, indiki Bakıya gedən yol da yox idi. İlk Çörək zavodu da Sumqayıt Yuyucu Vasitələri zavodunun yanında olub. İkincı Çörək zavodu indiki "Əşya bazarı”nın yanında tikilib. Bunları ona görə deyirəm ki, o vaxt Sumqayıt çox kiçik bir şəhər olub. Ümumuyyətlə, bu şəhəri o vaxtkı rəhbərlər təxminən 200 min əhali üçün planlaşdırmışdılar. İndi artıq Sumqayıtda 500 minə yaxın əhali yaşayır.

Bir məsələni də sizə deyim. Bunu Sumqayıtda və Azərbaycanda çox adam bilmir. Sumqayıt Avtovağzalı Nəriman Nərimanov adına Mədəniyyət Evinin yanında yeni tikildiyi vaxt oradan bir müddət Bakı-Sumqayıt vertolyot (helikopter) taksi də işləyirdi. Həmin vertolyot 22 nəfəri götürə bilirdi. Adamları cəmi 7 dəqiqəyə aparıb Hökumət evinin qarşısındakı meydanda düşürürdü. Oradan da adamları götürüb, 7 dəqiqəyə Sumqayıta gətirirdi.

- Siz, Sumqayıtda ilk katib olan Kamran Hüseynovdan başlayaraq, bütün rəhbərləri görübsünüz və çoxunun vaxtında da ayrı-ayrı vəzifələrdə işləyibsiniz. Həmin rəhbərlərlə Zakir Fərəcovun fərqi nədir?

- Bəli, mən Sumqayıt şəhərində 52 illik əmək fəaliyyəti dövrümdə bir çox şəhər rəhbərləri ilə işləmişəm. Lakin mötərəm prezidentimiz İlham Əliyev cənablarının bu şəhərə Zakir Fərəcovu rəhbər təyin etdiyi 2 sentyabr 2015-ci il tarixindən keşdiyi bir ildən artıq bu müddətdə abadlıq-quruculuq işlərinin böyüklüyü, genişliyi, həcmi keçmiş rəhbərlərin gördüyü işləri üst-üstə qoysaq, bu az bir zaman müddətində şəhərdə 10-15 ilə görüləcək işləri bir ilə başa gətirmək çox böyük məsuliyyət, işgüzarlıq, bacarıq, zehni və fiziki qüvvə tələb edir. Zakir müəllim artıq 5-6 aydan və bir neçə il bundan sonra hansı işlər görəcəyinin də dəqiq planlaşdırıb. O, təkcə rəhbər yox, həm də yaxşı memardır, maliyyəçidir və yüksək səviyyəli psixoloqdur. Çünki insanların damarını dəqiq tutmağı bacarır. Əgər bu vaxta qədər Sumqayıta rəhbərlik edənlər bu şəhər üçün 5 faiz iş görmüşdülərsə, yerdə qalan 95 faizi məhz Zakir Fərəcov görür. Zakir müəllimin cəmi bir ildə gördüyü işlərin yalnız kiçik bir hissəsini sadalamaq istəyirəm. Onda oxucular üçün də onun necə yüksək təşkilatçı, bacarıqlı rəhbər olduğu tam aydın olar.

Sumqayıtlılar tərəfindən uğurla qarşılanan iki sərəncam lifttəmir və nəqliyyatla bağlıdır. Belə ki, prezident İlham Əliyev Sumqayıt şəhərində çoxmərtəbəli binaların, lift təsərrüfatının maddi-texniki bazasının möhkəmləndirilməsi, dövlət mənzil fonduna aid olan çoxmərtəbəli binalarda istismara yararsız 76 liftin yeniləri ilə əvəz edilməsi məqsədi ilə dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan 3,7 milyon manat ayrılması ilə bağlı 13 oktyabr 2015-ci il tarixində sərəncam imzaladı. Bu sərəncam da sumqayıtlıların sevincinə səbəb oldu. Bununla bağlı artıq böyük işlər görülüb. Sumqayıt şəhərindəki 594 liftdən 200-ü istismar müddətini keçmişdi. Hal-hazırda Sumqayıtda liftlərin dəyişdirilməsi uğurla davam edir. Həmin liftlərin çoxu artıq qısa müddət ərzində dəyişdirilərək əhalinin istifadəsinə verilib. Yerdə qalan başqa liftlər isə istismar müddəti başa çatdıqca yeniləri ilə əvəz edilcək.

İkinci sərəncam isə prezident İlham Əliyevin Sumqayıt şəhərində avtomobil nəqliyyatı ilə sərnişin daşınması sahəsində idarəetmənin təkmilləşdirilməsi haqqında 7 dekabr 2015-ci il tarixində fərman imzalamasıdır. Sərəncamla Sumqayıt şəhər İcra Hakimiyyətinin başçısı yanında Sumqayıt Avtomobil Nəqliyyatı ilə Sərnişindaşıma İdarəsi yaradıldı. Bu sərəncamla nəhayət ki, Sumqayıt şəhərində nəqliyyat sektorunda illərlə yığılıb qalan mövcud problemlərin köklü şəkildə həll olunacağına ümid edə bilərik. Həqiqətən də Sumqayıtda nəqliyyat sektoru çox bərbad vəziyyətdə idi. Burada anarxiya hökm sürürdü. Əsasən də Bakı-Sumqayıt marşrutları sumqayıtlılara artıq problemlər yaradırdı.

Möhtərəm prezidentimiz İlham Əliyev gənclər şəhərinə səfərlərindən birində Sumqayıt şəhərində müasir bulvar kompleksinin mütləq yaradılmalı olduğunu vurğulayaraq demişdı: "Sumqayıtda bulvarın tikintisi təşəbbüsünü də mən bir müddət əvvəl irəli sürmüşəm. Hesab edirəm ki, Sumqayıt şəhərindəki bulvar Bakı bulvarının standartlarına uyğun olmalıdır. Sumqayıtın bu dənizkənarı sahəsindən də biz gərək səmərəli şəkildə istifadə edək. Sumqayıtda gözəl bulvar tikilməlidir və çimərliklər yaradılmalıdır. Beləliklə, bu şəhərdə insanların istirahəti üçün gözəl, yaraşıqlı guşə yaradılacaqdır”.

Zakir Fərəcov işə başladığı ilk günlərdən diqqət yetirdiyi əsas məsələlərdən biri də məhz Sumqayıt şəhərinin dənizkənarı bulvarının yenidən qurulması ilə bağlı möhtərəm Prezidentimizin dediyi həmin maraqlı fikirin reallaşdırılması oldu. Bu da sumqayıtlıların Zakir Fərəcova olan inamını bir qədər də artırıb. Çünki sumqayıtlılar, Xəzər dənizinin sahilində yaşasalar da bu dənizdən layiqincə yararlana bilmirdilər. Axı çoxlu xəstəliklərin dərmanı olan dəniz suyu və sahildəki qumlar həddindən artıq çirkablı olduğundan sumqayıtlıları sağaltmaqdansa onlarda ayrı-ayrı xəstəliklər yaradırdı.

Hal-hazırda Nəsimi adına Sumqayıt şəhər dənizkənarı Mədəniyyət və İstirahət parkı ilə birlikdə 186 hektar ərazini əhatə edən bulvarda iş çox sürətlə gedir. Layihədə gənclər şəhəri üçün böyük əhəmiyyət kəsb edən bulvar ərazisinin daha geniş olması nəzərdə tutulub. Ərazidə dənizə qarşı hündürlüyü 1 metr 60 santimetr, uzunluğu isə 3700 metr olan istinad divarı tikilir. Burada müasir tipli otellər, ticarət mərkəzləri, uşaqlar üçün əyləncə məkanları, kafe, restoran və çoxmərtəbəli yaşayış binalarının tikintisi də nəzərdə tutulub. Artıq bir ildə bu nəhəng işlərin böyük hissəsi yüksək keyfiyyətlə görülüb. Deməli, Sumqayıt qısa vaxtda əsl turist şəhərinə çevriləcək.

Zakir Fərəcov Sumqayıt şəhər İcra Hakimiyyətinin başçısı təyin olunduqdan sonra yol infrastrukturunun yenilənməsi, bərpası istiqamətində çox böyük tədbirlər görməyə başlayıb. Onun ilk verdiyi göstərişlərdən biri də Sumqayıt şəhərinin əsas giriş yolunun – Sülh küçəsinin genişləndirilməsi ilə bağlı oldu. Artıq şəhərin girişindən "Göyərçin” abidəsinə qədər avtomobil yolunun 5 metr genişləndirilməsi prosesi həyata keçirilir. Beləliklə, bu yol hazır olandan sonra səhər və axşam Sumqayıtın giriş və çıxışında insanların əsəbinə təsir edən tıxaclar daha olmayacaq. Bu yolda baxmayaraq ki, hələ işlər tam tamamlanmayıb, amma görülən bu işlər də adamı valeh edir. Bu da alqışa layiqdir. Onu da vurğulayım ki, Sumqayıtda həllini gözləyən problemlərdən biri də məhəllədaxili yolların yararsız halda olması ilə bağlı idi. Şəhərin yol infrastrukturunun yenilənməsinin tərkib hissəsi olaraq məhəllədaxili yolların da yenilənməsinə başlanılıb. İllərdən bəri yararsız vəziyyətdə olan və təmir üzü görməyən Çerkaski küçəsinin asfalt örtüyü təzələnib. Bağlar massivinə gedən və bərbad vəziyyətdə olan yolun asfalt örtüyü də əsaslı təmir olunub. Bağlarda yaşayan insanlar belə yaraşıqlı yola görə Zakir Fərəcova minnətdarlıqlaırını bildirirlər. İnanıram ki, bu proses davam etdirilərək digər mikrorayon və məhəllədaxili yollar da mərhələli şəkildə təmir olunacaq. Novxanı qəsəbəsindən Sumqayıt şəhərinə giriş hissəsi elə gözəl memarlıq üsulunda qurulub ki, adam bütün bunları görəndə heyran olur. Çünki Sumqayıtda heç vaxt belə gözəllik olmayıb. Sumqayıt yaranandan həmin yollar həmişə bərbad gündə olub.

Sumqayıt şəhərində başlanılan kompleks tikinti-quruculuq işlərinin bir hissəsini də ictimai yaşayış binalarının təmiri və yenidən qurulması təşkil edir. Heydər Əliyev, Azərbaycan prospektləri və 20 Yanvar küçəsi boyunca yaşayış binalarının fasad və dam örtüklərinin əsaslı təmiri, binaların müasir qaydada üzlənməsi işləri davam edir. Təmir olunan binaların memarlıq görünüşü saxlanılır, aşınmaya məruz qalmış və piyadalar üçün təhlükə yaradan elementlər yenilənir. Şəhərdə prospekt və küçələr boyu Sumqayıt yarananda tikilən 3 mərtəbəli 18 binada hazırda üzlənmə işləri başa çatıb. Şəhərin əsas prospektlərində yerləşən binalarla yanaşı 17 və 18-ci mikrorayonlarda da yaşayış binalarının dam örtüklərinin dəyişdirilməsinə, zirzəmilərin təmir olunmasına başlanılıb. Çünki sumqayıtlıların ən çox giley etdiyi də yaşayış binalarinın zirzəmilərində olan çirkab sularının təmizlənməsi problemi ümdə işlərdən biri idi. Keçmiş şəhər rəhbərindən fərqli olaraq, Zakir Fərəcov Sumqayıtı yaxşı tanadığından və bir müddət şəhər təsərrüfatına rəhbərlik etdiyindən bu işlərə daha ciddi fikir verir.

Sumqayıtda müasir üslubda yeni Heydər Əliyev Mərkəzində tikinti işləri artıq yekunlaşıb. 4 mərtəbədən ibarət olan mərkəzdə 400 nəfərlik akt zalı, nikah mərasimlərinin keçiriləcəyi zal, gənclər üçün müzakirə və diskussiya zalları, elektron kitabxana yaradılıb. Möhtəşəm görünüşü ilə hər kəsi heyran edəcək mərkəzdə linqafon, internet və rəssamlıq otaqları, fotostudiya və rəqs zalı da fəaliyyət göstərəcək. Deməli, bu Mərkəz həqiqətən də Ulu Öndərə layiq Mərkəz olacaq. İnanıram ki, bu bina özünün arxitekturasına görə müasir binalar arasında dünyanın ən yaraşıqlı binalarından biri olacaq.

Elə orada Avropa satandartlarına uyğun inşa olunan Şahmat məktəbi və Uşaq Musiqi məktəbi də yüksək memarlıqla, möhtəşəm formada inşa olunub.

Sumqayıt şəhərində illərdən bəri həllini gözləyən ən problemli məsələlərdən biri də məktəbəqədər təhsil müəssisələrinin vəziyyəti idi. Bu vəziyyət doğrudan da çox acınacaqlı idi. Şəhərdə mövcud baxçaların dam örtüyünün dəyişdirilməsinə, istilik sisteminin bərpa olunmasına çox ehtiyac vardı. Zakir Fərəcov Sumqayıt şəhər İcra Hakimiyyətində fəaliyyətə başladığı ilk gündən şəhərdə fəaliyyət göstərən məktəbəqədər təhsil müəssisələrinin qısa müddətdə təmir olunması göstərişini verdi. Dam örtükləri yenilənərək, istilik sistemi bərpa olundu və binalar da əsaslı formada fəmir olundu.

Sumqayit şəhər sakinlərinə yaxşı məlum idi ki, 8-ci mikrorayon ərazisində təşkil olunan əvvəlki yarmarkanın vəziyyəti həddindən artıq pis idi. Burada antisanitariya hökm sürürdü. Zakir Fərəcov işə başladığı ilk gündən burdakı vəziyyətə narazılığını bildirib və yeni yarmarkanın təşkil olunmasının zəruriliyini qeyd etmişdi. Qısa müddət ərzində yeni, daha səliqəli şəkildə təşkil olunmuş kənd təsərrüfatı məhsullarının satışı yarmarkası işə düşdü. Sözsüz ki, əhalinin istəkləri nəzərə alınaraq, gələcəkdə yarmarkanın daha da təkmilləşdirilməsi gözlənilir. İnanirıq ki, belə də olacaq.

Bu gün sumqayıtlıları ən çox narahat edən istilik sisteminin vəziyyətidir. Sumqayıt əhalisinin demək olar ki, 50 faizi istilik sisteminə möhtacdır. Onlar da məcbur olub evləri qızdırmaq üçün elektrik sobalarından istifadə edirlər. Ona görə də şəhərin işıq sistemində çoxlu problemlər yaranır. Yəqin ki, şəhərdə ən böyük problemlərdən olan istilik sistemi də tezliklə Zakir Fərəcov sayəsində müsbət həllini tapacaq. Bu da şəhər camaatının sevincinə səbəb olmaqla yeni İcra Hakimiyyəti başçısına inamı daha da artıracaq.

Sumqayıt şəhər İcra Hakimiyyətinin qarşısında çox böyük, analoqu olmayan işlər görülüb. Oradakı örtüklər dəyişdirilib. Magistral yol asfaltla örtülüb. İcra Hakimiyyətinin qarşısında yaşıl otlar-sarmaşıqlar əkilib. İnanıram ki, qısa vaxtda həmin sarmaşıqlar binanı əvvəlki kimi bəzəyəcək. Bu bina əvvəlki kimi dünyanın ən yaraşıqlı binalarından biri olacaq. Sumqayıt Dövlət Dram Teatrının binası əsaslı formada, müasir Avropa standartları üslubunda təmir olunub. İcra Hakimiyyətinin binası və Teatr binası arasındakı meydanda əvvəllər olan, keçmiş rəhbərlər tərəfindən sökülən fəvvarələr yenidən bərpa olunmaqla daha gözəl üslubda qurulub. Bu da meydana böyük yaraşıq verir. Teatr binasının arxasındakı və vaxtı ilə Zakir Fərəcov Sumqayıt şəhər Bələdiyyəsinin sədri olduğu vaxt saldırdığı Bələdiyyə Parkında da çoxlu işlər görülüb. Artıq Park özünün əvvəlki görkəminə qayıdaraq, sumqayıtlıların əsl istirahət yerinə çevrilib.

Sumqayıtda heç vaxt bu qədər yaşıllıqlar, gülllər, çiçəklər olmayıb. Bu şəhər artıq bir ildə sözün həqiqi mənasında güllər, çiçəklər, yaşıllıqlar diyarına çevrilib. İnsan bunlara baxdıqca böyük zövq alır və bir daha inanır ki, Abşeronun qumsallığında belə gözəl cənnət yaratmaq olarmış.

Mən, imkan düşdükcə Sumqayıt Mədəniyyət və İstirahət parkında olanda, orada gördüyüm, uzun illər tanıdığım, bir yerdə işlədiyim insanlarla apardığım söhbətlərdən və dənizin sahilində salınan yeni parkda sürətlə gedən işlərdən görürəm ki, sumqayıtlılar Zakir Fərəcovun Sumqayıt şəhər İcra Hakimiyyətinin başçısı işlədiyi bu bir il müddətində gördüyü böyük işlərdən çox razıdırlar. Hətta Sumqayıtın ilk illərindən bu şəhərin quruculuğunda çalışmış tanınmış ağsaqqallar, ziyalılar da görülən bu uğurlu işlərə böyük nikbinliklə, fəxarətlə baxırlar və çox sevinirlər. İnanın onların deməyə sözü qalmır. Çünki, görülən bu işlərə hamı heyranlıqla baxır.

Zeytuna Türkiyədə, Yunanıstanda, İsraildə və başqa ölkələrdə ikinci çörək qədər müqəddəs bir nemət kimi qiymət verirlər. Həmin ölkələr zeytundan böyük gəlir götürürlər. Hətta müqəddəs Qurani Kərimdə adı çəkilən üç meyvədən biri də zeytundur. Bir vaxtlar Abşeron yarımadasında çoxlu zeytun bağları vardı. Hətta Sovetlərin dövründə həmin zeytun meyvələri xarici ölkələrə valyutaya satılırdı. Lakin 1990-cı ilin əvvəllərində həmin zeytun bağları dağıdıldı. Zakir Fərəcovun bir də uzaqgörənliyi ondadır ki, dəniz kənarı parkda çoxlu zeytun ağacları əkdirib. Bu ağacların artıq bir hissəsi bar verir və qalanları da tezliklə bar verəcək. Deməli, Sumqayıtda əkilən bu zeytun bağları tezliklə şəhərə çoxlu valyuta gətirəcək.

Zakir müəllimin bu şəhərə rəhbərlik etdiyi bir ildə gördüyü işlərin mən, yalnız kiçik bir qismini sadaladım. O, köhnə və sınanmış ənənələri bərpa etməklə inanıram ki, sumqayıtlıların qəlbində özünə əbədi heykəl ucaldacaq. Adı Sumqayıtın tarixində qurucu rəhbər kimi qalacaq.

Xalq şairi Nəbi Xəzrinin: "Canlanır hər qarış yer Sumqayıtda, xarüqələr yaradır el Sumqayıtda”, sözləri elə bil ki, bu gün üçün yazılıb. İnanın ki, Sumqayıtda bu gün işin surəti və görülən işlərin keyfiyyəti bütövlükdə Bakı standartlarına sözdə yox, əməldə çatıb. Hər gün Sumqayıtda bir yenilik olur. Şəhər hamımızın gözləri qarşısında gözəlləşir, abadlaşır və dünya standartlarına yaxınlaşır.

Qətiyyətlə deyə bilərəm ki, Sumqayıt, 1970-ci illərdə ulu öndər Heydər Əliyevin sayəsində özünün birinci intibah dövrünü yaşayırdısa, indi isə möhtərəm prezidentimiz İlham Əliyevin rəhbərliyi altında özünün ikinci intibah dövrünü yaşayır. Əminik ki, ən qısa vaxtda bu şəhər dünyanın ən gözəl, yaraşıqlı şəhərlərindən biri olacaq. Həmin günlər heç də uzaqda deyil.

Ağalar İDRİSOĞLU,

Əməkdar incəsənət xadimi