31 Mart – Azərbaycanlıların Soyqırımı Günü ilə əlaqədar olaraq Qərbi Azərbaycan İcmasının (QAİ) Sumqayıt nümayəndəliyində gənclərlə görüş təşkil edilib.
Xeberle.com-un məlumatına görə, tədbirdə QAİ Sumqayıt nümayəndəliyinin İdarə Heyətinin üzvləri və Şura sədrləri iştirak ediblər.
Tədbiri QAİ Sumqayıt nümayəndəliyinin sədri Ramiz İsmayılov açaraq, ermənilərin azərbaycanlılara qarşı törətdiyi soyqırımı, deportasiya və vandalizm siyasətindən danışıb. O, erməni silahlılarının bu vəhşilikləri beynəlxalq havadarlarının dəstəyi ilə həyata keçirdiyini vurğulayıb. Həmçinin, Qərbi Azərbaycan həqiqətlərinin dünyaya çatdırılmasının vacibliyini qeyd edərək bildirib ki, azərbaycanlılar sivil qaydada mübarizə apararaq öz ata-baba yurdlarına qayıtmaq istəyirlər.
Daha sonra Ziyalılar Şurasının sədri Mehman Adıgözəlov çıxış edərək, tarixən azərbaycanlıların ermənilərə həmişə qonaqpərvərlik göstərdiyini, lakin onların bu etimadı doğrultmadığını bildirib. O, gənclərə Azərbaycan həqiqətlərini beynəlxalq arenada təbliğ etməyi və gələcək nəsillərə ötürməyi tövsiyə edib.
Tədbirdə həmçinin təşkilati məsələlər müzakirə olunub və bir sıra struktur dəyişiklikləri həyata keçirilib. Belə ki, QAİ Sumqayıt nümayəndəliyinin Gənclər Birliyinin sədri İlkin Şirinov vəzifəsindən azad edilib. O, QAİ Sumqayıt nümayəndəliyinin sədri Ramiz İsmayılovun digər əmri ilə nümayəndəliyin sədr müavini vəzifəsinə təyin edilib. Bundan başqa, Gənclər Birliyinin müavini Fuad Məmmədov nümayəndəliyin gənclər təşkilatının sədri olub. Nümayəndəliyin gənclər təşkilatının boş qalan digər müavin postuna isə tanınmış jurnalist Müşviq Əhmədov təyinat alıb.
Tədbir müzakirələrlə davam edib.
Xəbərdən istifadə edərkən istinad etmək vacibdir.
