Bu gün Sumqayıtda əsaslı yenidənqurma, abadlıq, quruculuq işləri görülür. Söhbət kosmetik dəyişikliklərdən yox, şəhərin tamamilə yeni simasının formalaşdırılması, müasir, abad şəhərə çevrilməsi istiqamətində görülən iri layihələrdən gedir. Giriş yolu genişləndirilir, yeni yaşıllıqlar və parklar salınır, binaların üzlükləri dəyişdirilir, şəhərindənizkənarı hissəsində nəhəng bulvar salınır.

 

Sumqayıt Şəhər İcra Hakimiyyətinin başçısı Zakir Fərəcov qısa müddət ərzində Sumqayıt şəhərində bulvar salınacağını vəd etmişdi. Hazırda ümumi sahəsi 106 hektar, uzunluğu 4,2 kilometr olan ərazidə başlanılan tikinti işləri sürətlə davam edir. Bulvarın 500 metrlik hissəsində işlər tamamlanmaq üzrədir. Bulvar ərazisində tikinti işləri ilə yanaşı yaşıllaşdırma işləri də aparılır.

Bundan başqa şəhərdə Heydər Əliyev Mərkəzi, musiqi və şahmat məktəbləri tikilir, yaşayış binalarının dam örtükləri dəyişdirilir. Ümumilikdə isə hazırda şəhərdə 200 binanın dam örtüyü dəyişdirilir. Şəhərin yol infrastrukturunun yenilənir, artıq 1, 3, 6, 9, 13, 17 və 18-ci mikrorayonlarda, 19, 21, 45, 47, 48-ci məhəllələrdə daxili yollar yenidən qurulub. Bağlar massivinə gedən 17 və 18 nömrəli marşrutların yolları əsaslı təmir olunub, yeni asfalt örtüyü salınıb. Ümumilikdə 300 min kvadratmetrdən çox sıradan çıxmış asfalt örtüyü yenilənib. Sumqayıt şəhərindəki 594 liftdən 200-ü yararsız vəziyyətdə idi. Artıq bu liftlərin 140-ı dəyişdirilib.

Şəhərdə görülən yenidənqurma, abadlıq işlərinə Sumqayıt Bələdiyyəsi də dəstək verir. Son aylarda həyata keçirilən bir sıra işləri nəzərdən keçirək:

Bələdiyyə parkında yenidənqurma işləri aparılıb

 

 

 

Parkın ərazisində yerləşən fontan sökülərək tamamilə yenidən qurulub. Parkda 50 ədəd palma ağacı və 5000 ədəd gül əkilib, yaşıllıqlara qulluq edilib.

Məlumat üçün deyək ki, şəhər İcra hakimiyyətinin başçısı Zakir Fərəcovun göstərişi ilə bütün Sumqayıtda yaşıllaşdırma işləri aparılır, payız-yaz əkin mövsümündə şəhərin küçə, xiyaban və parklarında 1 milyondan çox gül, 500-dən artıq palma ağacı və digər ağac və kollar əkilib.

Şəhərdə tez-tez müşahidə etdiyimiz iməclik işləri Sumqayıt Bələdiyyə Parkında da aparılır. Burada bələdiyyə işçiləri ilə yanaşı, şəhərin bir sıra strukturlarının əməkdaşlarının iştirakı ilə bu yaxınlarda iməclik işləri də aparılıb.

 

 

 

Böyük Vətən Müharibəsi iştirakçıları ilə görüş keçirilib

Sumqayıt Bələdiyyəsində Böyük Vətən Müharibəsində faşizm üzərində qələbənin 71-ci ildönümü münasibətilə Böyük Vətən Müharibəsi iştirakçıları ilə görüş keçirilib.

Bələdiyyə əməkdaşları yataq xəstəsi olan müharibə veteranlarını da ziyarət ediblər. Müharibə veteranlarına Sumqayıt Bələdiyyəsi tərəfdən pul yardımı edilib.

 

Müharibə veteranları və bələdiyyə işçiləri ödənişsiz müayinə olunub

Sumqayıt Bələdiyyəsində "Xəzər Qayğıkeşlik Layihəsi” Humanitar İctimai Birliyinin layihəsi çərçivəsində "Azercell” şirkətinin Göz klinikasının həkimləri tərəfindən pulsuz olaraq vətəndaşların tibbi müayinəsi təşkil edilib.

Görkəmli oftalmoloq alim, akademik Zərifə xanım Əliyevanın anadan olmasının 93-cü ildönümü münasibətilə təşkil olunan müayinə günündə Böyük Vətən Müharibəsi iştirakçıları, bələdiyyə işçiləri və məhəllə komitələrinin bir qrup üzvü pulsuz olaraq müayinədə keçiblər.

 

 

 

Bundan əlavə yerli bələdiyyədə məhəllə komitələrinin üzvlərinin iştirakı ilə ayrı-ayrı istiqamətlərlə bağlı tədbirlər keçirilib.

 

 

 

Xəbərdən istifadə edərkən istinad etmək vacibdir.