Bu gün Sumqayıt şəhərində azyaşlının içində siçan leşi çıxmış uşaq qidasından zəhərlənməsi ilə bağlı xəbər vermişdik. (yazını bu linkdən oxuya bilərsiniz: http://xeberle.com/sumqayit/23119-sumqayitda-dehshet-ushaq-qidasinin-ichinden-sichan-leshi-chixdi-foto.html)
Xeberle.com xəbər verir ki,moderator.az saytı baş vermiş zəhərlənmə faktı ilə bağlı Səhiyyə Nazirliyinin mətbuat xidməti ilə əlaqə saxlayıb və hadisəni nazirlik rəsmilərinin diqqətinə çatdırıb. Bundan sonra qurum tərəfindən hadisəylə bağlı araşdırma aparılıb və dəqiq məlumat verilib.
Nazirliyin nümayəndəsi bildirib ki, zəhərlənən uşaq Sumqayıtda xəstəxanaya aparılıb:
"Xəstəxanadan aldığımız məlumata görə, uşaqda mədə-bağırsaq pozuntusu aşkarlanıb, tibbi yardım göstərildikdən sonra uşağı evə göndəriblər. Ancaq uşağın siçan leşindən zəhərləndiyini və ya hər hansı başqa bir qidadan zəhərlədiyini, ya da ümumiyyətlə heç zəhərlənmədiyini, sadəcə mədə-bağırsaq pozuntusu olduğunu deyə bilmərik. Bunun üçün araşdırma aparılmalıdır. Zəhərlənən uşaq xəstəxanada yüksək səviyyədə müalicə aldıqdan sonra evə buraxılıb, hazırda da heç bir problemi yoxdur”.
Qurum rəsmisi onu da bildirib ki, süni uşaq qidalarının satışı Səhiyyə Nazirliyinə aid olan bir məsələ deyil:
"Biz ümumiyyətlə deyə bilmərik ki, doğrudan da o yeməyin içindən siçan leşi çıxıb və ya çıxmayıb. Bu, ya reklam, ya da antireklam kimi bizim sahə deyil. Biz uşaq yeməyi istehsal etmirik, uşaq yeməyi satmırıq, bununla başqa qurumlar məşğuldur. Bu hadisəylə bağlı da Gigiyena və epidiomologiya mərkəzi məşğul olmalıdır, araşdırma aparmalıdır. Təbii ki, bütün qidalara, xüsusən də uşaq qidalarına nəzarət güclü olmalıdır. Həmçinin havaların isti keçdiyinə görə uşaqların qida rasionuna ciddi nəzarət edilməlidir”.
Qeyd edək ki, Sumqayıtda fəaliyyət göstərən uşaq həkimi xəstələnmiş uşağı müalicə etmək üçün çağrışa gedib. Uşağı müayinə etdikdən sonra məlum olub ki, zəhərlənməyə səbəb Heinz-uşaq qidasının içində olan siçan leşidir. Bu barədə informasiyanı super_moms_club instagram səhifəsi paylaşıb.
Xəbərdən istifadə edərkən istinad etmək vacibdir.
