Azərbaycanda yol hərəkəti qaydaları demək olar ki, hər addımda pozulur. Bunu ya piyadaların, ya da sürücülərin timasalında müşahidə edirik. Sumqayıtda apardığımız araşdırma isə onu deməyə əsas verir ki, şəhərdə bu sahə üzrə vəziyyət daha acınacaqlıdır.
Piyadaların yol hərəkəti qaydalarını mütəmadi olaraq pozması adi hal alsa da, buna müdaxilə, ciddi təsir mexanizmləri demək olar ki, yoxdur. Düzdür, sürücülərin də səhlənkarlığı yetərincədir. Bunu inkar etmək mümkün deyil. Bilərəkdən, yaxud bilməzlikdən sükan arxasında oturan şəxs yol hərəkəti qaydalarını kobud şəkildə pozur. Qaydalara görə, əgər piyada zolağa daxil olursa, yaxınlaşan avtomobil sürəti azaldaraq yavaşımalı və piyadaya yol verməlidir. Təəssüflər ki, əksər hallarda sürücülər qaydalara əməl etmirlər. Hətta yolun piyada üçün nəzərdə tutulan hissəsini sürəti azaltmadan keçirlər. Bu isə sonda mənfi fəsadlara gətirib çıxarır.
Sakinlər deyirlər ki, qəzaların tez-tez qeydə alındığı magistralda hərəkət nişanları düzgün qoyulmayıb. Və buna görə də yolda bədbəxt hadisələrin baş verməsi qaçılmazdır. Günahı isə onlar təkcə aidiyyatı qurumlarda deyil, həmçinin sürücülərdə görürlər.
Piyadalar sürücüləri günahlandırsalar da ərazidə çəkiliş apardığımız zamanı bunun əksinin də şahidi olduq. Piyadalar yolun qadağan olan hissəsindən həyatlarını təhlükəyə ataraq keçirlər. Onlar üçün nə qayda var, nə qanun. Sürücülər piyadaların yol hərəkəti qaydalarına riayət etmədiyini desələr də qəzaların baş verməsində özlərini də günahkar sayırlar.
Nəzərə alsaq ki, bu cür keçidlərdən qocalar, uşaqlı qadınlar, məktəblilər də keçir, onda durum daha ciddi şəkil alır və risk artır. İş orasındadır yolun bəzi yerlərində piyada keçidləriinin olmasını bildirən nişanlar var. Amma keçid xətti çəkilməyib. Eləsi də var ki, pozulduğundan burada piyada keçidinin olduğunu müəyyən etmək olmur. Ekspertlərin fikrincə, yollarda hər iki hərəkət iştirakçısı diqqətli olmalıdır.
Piyadalar bu yolun Üzeyir Hacıbəyov dairəsindən gələn istiqamətində eləcə də əks yolda işıqforlar quraşdırlılmasını vacib hesab edirlər. Sumqayıt şəhər Polis İdarəsinin Dövlət Yol Polisi şöbəsindən isə şifahi olaraq bildirdilər ki, sözügedən yolda yaranan problemlərin aradan qaldırılması ilə bağlı ərazidə bir sıra tədbirlərin həyata keçiriləcəyi nəzərdə tutulur. Artıq magistralda nişanların qoyulması və piyada keçidlərinin çəkilməsi ilə bağlı müvafiq qurumlara müraciət olunub.
RAMİL ZEYNALLI
Xəbərdən istifadə edərkən istinad etmək vacibdir.
