İctimai nəqliyyatda mövcud olan çatışmazlıqlardan daha çox əziyyət çəkən həmişə sərnişinlər olur. Sumqayıt sakinləri daynacaqlarda uzun müddət marşrutları gözləmək və ya kiçiktutumlu avtobuslarda yol getməkdən artıq təngə gəliblər. Bu haqlı narazılıqların həllini tapacağı gün deyəsən heç də uzaqda deyil. Çünki bu il Sumqayıtın sərnişindaşıma sistemində bir sıra yeniliklərin həyata keçirilməsi planlaşdırılır. Artıq şəhərə müasir standartlara cavab verən avtobuslar gətirilib. Nəqliyyat vasitəsindəki bütün materiallar yanğına, donmaya və buxarlanmaya davamlıdır. Qapılar xüsusi sistemlə təchiz edilib. Salonlarda kameralar quraşdırılıb. "Avro-6" standartlarına cavab verən avtobuslar geniş salonu, rahat oturacaqları və müasir təchizatı ilə fərqlənir. Eyni zamanda kondisioner, qızdırıcı, əlilliyi olan insanlar üçün nəzərdə tutulan  panduslara da malikdir. Ümumilikdə Sumqayıta 150 ədəd yeni avtobusun gətirilməsi planlaşdırılır. Bundan başqa müvafiq ərazilərdə müasir tipli dayancaqların yerləşdirilməsi də görüləcək işlər siyahısındadır. Artıq bu məqsədlə şəhərin müxtəlif yerlərində 25 ədəd dayanacaq quraşdırılıb.