Sumqayıt hələ sovetlər dövründən bir neçə ölkənin şəhərləri ilə qardaşlaşıb. Azərbaycan müstəqilliyini bərpa etdikdən sonra bu şəhərlərin sayı artmaqla yanaşı, dostluq əlaqələri də genişlənib.
Belə əlaqələrdən biri 1977-ci ildə Almaniyanın Lüdviqshafen şəhəri ilə qurulub. Şəhər sakinləri arasında alman parkı kimi tanınan Lüdviqshafen istirahət parkı da bu əlaqələrin 20 illiyi münasibətilə 1997-ci ildə salınıb. Lüdviqshafendə isə küçələrdən birinə Sumqayıt adı verilib.
Bu il Sumqayıtla Lüdviqshafenin tərəfdaşlıq münasibətlərinin 40 ili tamam olur. Bununla bağlı may ayında bir sıra tədbirlərin həyata keçiriləcəyi planlaşdırılır.
Bununla bağlı Almaniyanın ölkəmizdəki səfiri Sumqayıtda səfərdə olub, icra hakimiyyətində tədbirlər planını müzakirə edib, Lüdviqshafen istirahət parkına baş çəkib.
İki şəhər arasında tərəfdaşlıq münasibətləri məktəblərin şagird və müəllim mübadiləsi ilə başlayıb. 2002-ci ilin may ayında əməkdaşlığın inkişaf etdirilməsi məqsədilə Sumqayıt və Lüdviqshafen şəhərləri arasında müqavilə imzalanıb və Almaniya Texniki Əməkdaşlıq Cəmiyyətinin iştirakı ilə bir neçə layihə həyata keçirilib.
Sumqayıt yalnız Lüdviqshafenlə deyil, dünyanın 11 ölkəsinin 13 şəhəri ilə dostluq əlaqələri qurub. Bunların sırasında Gürcüstanın Rustavi, Ukraynanın Çerkassı, Çinin Cu Jou, Rumıniyanın Piteşti, Avstriyanın Lints və digər şəhərlər var.

Xəbərdən istifadə edərkən istinad etmək vacibdir.