Azərbaycanın ixrac potensialını artırmağa hesablanan ən iri sənaye zonalarından biri - Sumqayıt Kimya Sənayesi parkının rezidentlərinin sayı artmaqda davam edir. 9 rezidenti olan park daha 2 şirkətlə danışıqlara başlayıb.
Ərazisi 500 hektara yaxın olan Sumqayıt Kimya Sənaye Parkında aqro, tibb və məişət kimyası, tikinti sənayesi, elektronika və avtomobil sənayesi kimyası, polimerlər və sənaye avadanlıqlarının istehsalı üçün nəzərdə tutulan müəssisələr yaradılır. Parkın rezidentləri biznes fəaliyyətinin rahat təşkili üçün zəruri xidmətlərlə təmin edilir. 21 hektar ərazini əhatə edən sosial zonada 16 mərtəbəli inzibati bina, Sərgi-Konfrans Kompleksi, Laboratoriya binası, emalatxanalar, Uşaq Baxım Mərkəzi, açıq və qapalı idman meydançaları, Sağlamlıq Mərkəzi, Yataqxana Kompleksi, həmçinin rezidentlər və işçilərə xidmət edəcək digər obyektlər fəaliyyət göstərəcək. Park ərazisindəki Peşə Tədris Mərkəzinə bu ildən tələbə qəbulu həyata keçiriləcək. Peşə tədris məktəbinin tələbələri iki illik təhsilin sonunda Sənaye Parkının rezidentlərindən digər müəssisələrə birbaşa iş təklifləri alacaqlar. Artıq parkdakı rezidentlərdən biri işə başlayıb. İlin sonuna kimi digər rezidentlərin də istehsala qoşulacağı planlaşdırılır. 2018-ci ildə istifadəyə veriləcək "SOCAR Polymer” isə Azərbaycanda plastik sənayenin əsasını qoyacaq. 35 ha torpaq sahəsi olan müəssisədə 180 min ton polipropilen və 120 min ton yüksək sıxlıqlı polietilen istehsal ediləcək. Sumqayıt Kimya Sənaye Parkının rezidentləri 7 il müddətinə mənfəət, əmlak, torpaq vergisindən və idxal olunan texnika, texnoloji avadanlıqlar, qurğulara görə ƏDV-dən azaddır.

Xəbərdən istifadə edərkən istinad etmək vacibdir.