Bildiyimiz kimi, son zamanlar Sumqayıta yeni avtobuslar gətirilib. 5, 6 və bu günlərdə 7A marşurutları yenisi ilə əvəzlənib. Bəs yeni avtobusların gətirilməsi ilə onların qrafiklərində dəyişiklik yaranıbmı? Məsələ ilə bağlı Xeberle.com olaraq Sumqayıt Şəhər İcra Hakimiyyəti başçısının tabeliyində "Sumqayıt Nəqliyyat" MMC ilə əlaqə saxladıq. Oradan bizə bildirdilər ki, əvvəllər 7A marşurutu 3 dəqiqədən bir işləyirdi və şəhər üzrə 20 avtobus fəaliyyət göstərirdi. Amma indi 4 dəqiqədən bir işləyir və  biz onları 15 yeni avtobusla əvəz etmişik. Digər avtobusların intervallarında heç bir dəyişiklik yoxdur. 7A marşurut xəttinin intervalının dəyişilməsinə səbəb yeni avtobusların daha komfortlu olması və tıxacların yaranmasının qarşısının alınması istiqamətində tədbirlərin görülməsidir. Köhnə avtobuslar 9 metr uzunluğunda idi, lakin hazırki müasir tipli avtobuslar 12 metr uzunluğundadır. Bu avtobuslar həm də rahatlığı ilə digərlərindən seçilir, nəqliyyat vasitələrində kameralar quraşdırılıb, istilik sistemi isə digərlərinə nisbətən daha yaxşı işləyir.  Köhnə avtobuslarda yalnız oturacaqlar var idi və ayaq üstə durmaq sərnişinlərə   problem yaradırdı, amma yeni tipli avtobusların içərisində 72 nəfər ayaq üstə gedə bilər. Yaxın günlərdə 7 nömrəli marşurutun, gələcəkdə isə Sumqayıtdakı bütün  avtobusların yenisi ilə əvəzlənməsi gözlənilir. Düzdür şəhərimizdə elə yaşayış yerləri var ki, oraya böyük avtobuslar daxil ola bilmir. Lakin biz çalışacağıq ki, onları da daha komfortlu, kiçik tutumlu avtobuslarla əvəz edə bilək.
Elnarə Salamova
Xeberle.com

Xəbərdən istifadə edərkən istinad etmək vacibdir.