Ölkədə aparılan ideoloji, sosial və elmi maarifləndirmə işlərinin daha da genişləndirilməsi, müasir Azərbaycan dövlətinin qurucusu ulu öndər Heydər Əliyevin banisi olduğu azərbaycançılıq ideologiyasının və Prezident İlham Əliyevin apardığı uğurlu dövlət siyasətinin prioritet istiqamətlərinin mahiyyətinin ölkə əhalisinə intensiv, dolğun və məzmunlu şəkildə çatdırılması məqsədilə Prezident yanında Bilik Fondu silsilə maarifləndirici mühazirələrini davam etdirir.
Xeberle.com AZƏRTAC-a istinadən xəbər verir ki, növbəti tədbir iyunun 12-də Sumqayıtdakı Heydər Əliyev Mərkəzində şəhər icra hakimiyyəti və Bilik Fondunun birgə təşkilatçılığı ilə keçirilib.
İctimaiyyət nümayəndələrinin iştirak etdiyi tədbiri Sumqayıt Şəhər İcra Hakimiyyəti başçısının müavini Teymur Səmədov açaraq, ümummilli lider Heydər Əliyevin xidmətləri sayəsində Azərbaycanda yaranan sabitlikdən, xalqın dövlətə olan inamından, vətəndaşların hüquq və azadlıqlarının təmin edilməsi istiqamətində atılan addımlardan danışıb.
Milli Məclisin deputatı Tahir Mirkişili dövlət siyasətinin başlıca istiqamətləri haqqında ətraflı məlumat verib, Prezident İlham Əliyevin həyata keçirdiyi daxili və xarici siyasətin əsas məqamları, son illərdə aparılan islahatlar nəticəsində əldə olunan sosial-iqtisadi tərəqqi barədə söz açıb.
Bildirilib ki, ümummilli lider Heydər Əliyevin çoxcəhətli fəaliyyəti, dövlət idarəçiliyi sahəsindəki böyük məharəti və zəngin təcrübəsi Azərbaycanda davamlı inkişafın təməlini qoyub və bu gün Azərbaycan özünün milli dövlət quruculuğu və idarəçiliyinin növbəti şərəfli mərhələsini yaşayır. Son illərdə ölkəmiz öz müstəqilliyini daha da möhkəmləndirib, siyasi, iqtisadi və mədəni sahələrdə böyük uğurlara imza atıb.
Həmin gün Sumqayıt şəhər S.Rüstəmov adına 3 nömrəli Musiqi Məktəbində təşkil olunmuş mühazirədə Bilik Fondunun dövlətçilik və milli maraqlara həsr olunan tədbirləri barədə məlumat verilib, belə mühazirələrin ideoloji maarifləndirmə işində xüsusi əhəmiyyət daşıdığı vurğulanıb.
Tədbirdə Bakı Dövlət Universitetinin hüquq fakültəsinin dekanı Əmir Əliyevin "Heydər Əliyev və Azərbaycanda dövlət quruculuğu” mövzusunda mühazirəsi dinlənilib.
İnteraktiv formada keçən mühazirələrdə iştirakçıları maraqlandıran suallar cavablandırılıb.
Xəbərdən istifadə edərkən istinad etmək vacibdir.
