Xeberle.com xəbər verir ki, Sumqayıt şəhər sakini Məlahət Abdullazadə 8 iyul saat 18:50-də yola düşən Bakı-Böyük Kəsik qatarında başına gələn "əhvalat”ları görüntüləyərək saytımıza müraciət edib.
Onun sözlərinə görə, bacısı və övladları ilə birgə 4 plaskart və 1 kupe vaqonlarına bilet alıblar: "4 ədəd böyük və 1 ədəd uşaq bileti alıb qatara mindik. Biletləri tələsik aldığımız üçün içəri daxil olduqdan sonra gördük ki, bizdən 6 manata yaxın əlavə pul alınıb. Hansı ki, kupe vaqonunun qiyməti 9.72 AZN, uşaq bileti 4.11 AZN və digər 3 plaskart vaqonun qiyməti 6.82 AZN ( üçü bir yerdə 20.46 AZN) idi, lakin bizdən biletlər üçün 41 manat pul aldılar. Dedik ki, eybi olmaz, daha nə etmək olar?! İstəyirdik yataq, bizə paketin içərisində yorğan-döşək üzü gətirdilər. Açıb gördük ki, hamısı cırıq-cırıqdır və üstəlik kirlidirlər. Dəmirlərə, qapıya saqqız yapışdırılıb. Yastıq üzlərinin nə üçün bu vəziyyətdə olduğunu soruşduqda cavab verdilər ki, sizdən əvvəl burada əsgərlər var idi, ona görə də belə vəziyyətdədir. Kupe vaqonunda qalan bacım telefonunu toka taxmaq üçün müraciət etdikdə isə ona bildirildi ki, buna görə 1 manat ödəniş olunmalıdır. İnanın bu necə xidmətdir anlamadım. Qatardan düşəndən sonra dispetçerə də vaqonlardakı vəziyyət barədə danışdıq və o bizə qaynar xəttin nömrəsini verdi. İndi saytınıza da yazmışam ki, məsələ ictimailəşsin. Sərnişinlərə bu cür xidmət göstərmək olmaz”.
Məsələ ilə bağlı Xeberle.com olaraq Azərbaycan Dəmir Yolları QSC-nin İctimaiyyətlə Əlaqələr Şöbəsinin rəisi Sevinc Qədirova ilə əlaqə saxladıq. Onun sözlərinə görə, artıq rəhbərliyə bu məsələ ilə bağlı məlumat çatdırılıb: "Problem araşdırılır, ola bilər ki, kimlərsə tərəfindən bilərəkdən və ya səhvən olub.Məsələ bələdçi, qatar rəisi və ya başqa kiminsə günahkar olmasından asılı olmayaraq araşdırılacaq və buna məsul şəxs lazımı şəkildə cəzalandırılacaq”.
M. Abdullazadənin saytımıza ünvanladığı şəkilləri və videonu sizə təqdim edirik.
Elnarə Salamova,
Xeberle.com
Xəbərdən istifadə edərkən istinad etmək vacibdir.
