Otağın havasını dəyişdirmək, təmiz hava almaq onlar üçün müşkülə çevrilib Ölkənin iri sənaye mərkəzlərindən olan Sumqayıtda sakinlər bu dəfə zavodların fəaliyyəti nəticəsində ətrafa yayılan zəhərli qazlardan şikayətçi deyillər. Sumqayıtlılar iddia edirlər ki, şəhərin giricəyinə yaxın yerdə - məişət tullantılarının daşındığı poliqonda tullantılar yandırılır. Bu hal xüsusilə axşam saatlarında yaşanır.
Vəziyyəti yerində araşdırmaq üçün üz tutduq Sumqayıt Məişət Tullantıları Poliqonuna. Ərazidə qızğın iş gedirdi. Çeşidlənməsi mümkün olan tullantılar digərlərindən ayrılır, yerdə qalanları isə quyu qazılaraq basdırılır, üstü torpaqlanır. 1961-ci ildən fəaliyyət göstərən və 130 hektar sahəni əhatə edən poliqona gün ərzində 1500-1800 kubmetr məişət tullantıları daşınır. Əldə etdiyimiz məlumata gör, buraya Xırdalan şəhərinin də tullantıları gətirilir. Düzdür, tullantıların yandırılmasının şahidi olmadıq, amma bəzi ərazilərdə tüstülənməni müşahidə etdik.
Həkimlər də bu cür havanın insanlara, xüsusilə də uşaqlara mənfi təsir göstərdiyini bildirirlər. Tənəffüs yolları xəstəlikləri olanlarda isə daha ciddi fəsadlar törədə biləcəyi istisna edilmir.
Məişət Tullantıları Poliqonu Mənzil Kommunal Təsərrüfat İstehsalat Birliyinin nəzdində olan "Sumqayıt şəhər Təmizlik Departamenti” Məhdud Məsuliyyətli Cəmiyyətin balansındadır. Departamentdən isə deyirlər ki, sakinlərin iddiası əsassızdır. Çünki poliqonun ərazisinə ciddi nəzarət edilir və tullantıların yandırılmasından söhbət belə gedə bilməz.
Amma... Maraqlıdır ki, Sumqayıtda yerləşən 4 saylı Ərazi Ekologiya və Təbii Sərvətlər Şöbəsinin rəsmisinin açıqlaması isə baş mühəndisin dediklərini tamamilə təkzib edir. Belə ki, şöbə tullantıların yandırılması ilə bağlı daxil olan şikayəti dəfələrlə araşdırıb və müvafiq qərarlar qəbul edib. Məsələn, Təmizlik Departametinin indiyədək 29 min manat məbləğində cərimələnməsi də bu qərarlardan biridir. Yəqin ki, insanların təmiz hava udmaq haqqı nəzərə alınmalıdır. Çünki söhbət təmiz havadan gedir. O hava ki, insanların yaşaması üçün ən vacib amildir.
Xəbərdən istifadə edərkən istinad etmək vacibdir.
