Keçmiş SSRİ-nin böyük və ən zəhərli kimya sənayesi komplekslərindən biri bu şəhərdə yerləşirdi.
Ağır metallar, kimyəvi məhsulların emalı zamanı atmosferə düşən zəhərli maddələr şəhərin havasını korlayırdı.
Sumqayıt Azərbaycan şəhərlərinin içində ən fəlakətli ətraf mühitə malik idi. İyirmi ildən çox kimya zavodlarından birində işləyən Məhəbbət Səmədova da deyir ki, o vaxtlar havaya atılan zərərli maddələr külək vasitəsilə bütün şəhəri bürüyürdü. Sumqayıtda bu müəssisələrin tikildiyi zamanı ətraf mühitə vurulan ziyan nəzərə alınmamış, layihələrdə nöqsanlara yol verilmişdir. Bu baxımdan şəhərin ekoloji vəziyyətində ciddi problem yaranırdı.
SOCAR-ın"Azərikimya” İstehsalat Birliyində də Sumqayıtın sənaye zonasında sovetlər dönəmində ekoloji problemlərin miras qaldığını deyirlər. O, zamanlar ətraf mühitin qorunması istiqamətində heç bir addım atılmamış, əksinə bu məsələlər arxa planda olmuşdur. 2010-cu ildən isə Sumqayıtda ekoloji problemlərin həlli və uzun illər boyu müxtəlif kimyəvi çirkləndiricilərlə yararsız hala salınan torpaqların reabilitasiyasına, ətraf mühitə zərər verən müəssisələrin sökülməsinə başlanıldı. Bir vaxtlar Sumqayıtın havasını korlayan zavodlar tarixə qovuşdu. Çirklənmiş torpaqların təmizlənməsi istiqamətində layihələrə start verildi. Bununla da ətraf mühitin çirklənmə dərəcəsi xeyli azaldı, Sumqayıtda hamını narahat edən ekoloji vəziyyətdə ciddi dönüşə nail olundu.
Hazırda Sumqayıtda ekoloji vəziyyətlə bağlı davamlı monitorinqlər aparılır. mütəxəsisslərin fikrincə əvvəlki illərə nisbətən indi şəhərdə atmosferin vəziyyəti yaxşılaşıb. Hazırda insanların sağlamlığına təsir göstərən zavodlardan əsər əlamət yoxdur. Amma şəhərdə həllini tapmayan bir problem də var ki, bu da insanları narahat edir. Söhbət Məişət Tullantıları Poliqonundan gedir. Ümidvarıq ki, Sumqayıtın bu problemi də öz həllini tapacaq.
Yeri gəlmişkən, 1972-ci il Birləşmiş Millətlər Təşkilatı Baş Assambleyasının İsveçin paytaxtı Stokholm şəhərində keçirilən iclasında qərara alınıb ki, iyunun 5-i Dünya Ətraf Mühitin Mühafizəsi Günü kimi qəbul olunsun. Məqsəd problemin kəskinliyinə, əhali arasında ekoloji şüurun yüksəldilməsinə, ətraf mühitin mühafizəsi problemlərinə diqqətin yönəldilməsinə nail olmaqdır.
Xəbərdən istifadə edərkən istinad etmək vacibdir.
