Qarşıdan payız-qış mövsümü gəlir. Bu aylarda əhalinin istilik sistemi ilə təchizatı məsələsi gündəmə gəlir. Sumqayıtın istilik sistemi ilə tam təchiz olunması məsələsi illərdir ki, çözülməmiş qalır. Tədbirlər planına görə şəhər 2018-ci ildə tam olaraq istilik sistemi ilə təmin edilməli idi.
Görəsən bu istiqamətdə hansısa tədbirlər həyata keçirilibmi?
"Azəristiliktəchizat”ASC-nin Sumqayıt şəhər idarəsinin rəisi Aftandil Nuriyev Xeberle.com-a bildirib ki, bu il Sumqayıtda yeni istilik qazanxanası tikilməyib. İdarə rəisi deyib ki, dövlət proqramında bütün şəhərin istiliklə təmin edilməsi nəzərdə tutulsa da, hələki bu mümkün deyil. Buna səbəb kimi isə uzun illərdir ki, tikinti işlərinin dayandırılmasıdır.
A. Nuriyev Sumqayıtın istiliklə təchiz edilən ərazilərini də açıqlayıb: "Dörd mikrorayon, 6 məhəllə və Hacı Zeynalabdin qəsəbəsi də daxil olmaqla, Sumqayıtda hazırda 24 müasir istilik qazanxanası fəaliyyət göstərir. 215 yaşayış binası, 30 orta məktəb, 14 uşaq bağçası, 14 səhiyyə ocağı istiliklə tam təmin edilir. 24 müəssisə və şirkətin inzibati binası da istiliklə təmin edilir. 215 binada 1005 abonent var."
Qurum rəhbəri bu il şəhərin istiliklə təchizatında yeniliyin olmayacağını da sözlərinə əlavə edib.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
