Redaksiyamıza Corat bağlarında fəaliyyət göstərən qum mafiyası barəsində məlumatlar daxil olub. Bir şəhər sakininin yazdığına görə, işbazlardan ibarət bir qrup şəxs bağların əsl qəniminə çevriliblər. Beləcə bu qrup günlərlə sahibsiz bağ sahələrini və ya baxımsız torpaq sahələrini müəyyənləşdirir, daha sonra isə ərazinin qumunun oğurlanması prosesinə başlayırlar.

Daxil olmuş məlumat marağımızı cəlb etdiyi üçün kiçik bir araşdırma apardıq. Məlum oldu ki, bu işbazlar gecə saatlarında dövlət nömrə nişanı olmayan yük maşınları ilə bağ sahəsinin qumunu oğurlamağa başlayırlar. Belə bağ sahələrindən birinə də “Gəmi” restoranından 300 metr aralıda rast gəldik. Ərazi böyük bir tikinti sahəsini xatırlatsa da, yerli sakinlər bu sahənin qum oğurlayan işbazlar tərəfindən təqribən 6 metr qazıldığını bildirdilər. Həmin ərazidə axtarışlar apararaq qum işbazları ilə əlaqəli şəxsləri tapmağa çalışsaq da, axtarışlarımız nəticəsiz qaldı. Bu şəxslərin belə gizlin çalışmasına baxmayaraq, artıq onların izinə düşməyimizi deyə bilərik.

Mövzuyla bağlı mütəxəssislər isə bildirirlər ki, bağ sahələrinin bu formada qazılması ərazinin relyefinin və ekoloji balansının pozulmasına səbəb olur. Belə ki, yerin altından su çıxana qədər qazılan sahələr ərazidə torpaq aşınması və sürüşməsinə gətirib çıxarır. Mütəxəssislərin dediklərini qonşularla apardığımız söhbətlər də təsdiqlədi. Sakinlər Xeberle.com-a qum mafiyası işə başladıqdan sonra hasarlarında və mənzillərinin divarında çatların yarandığını, su quyularında suyun səviyyəsinin aşağı düşməsini, bəzi quyuların isə tam quruduqlarını bildirdilər.

Maraqlıdır ki, qum mafiyasının bu fəaliyyəti nədənsə əlaqədar qurumların diqqətini cəlb etmir.

Sonda onu da bildirək ki, qum mafiyasının Corat bağlarındakı fəaliyyətini diqqətdə saxlayacağıq. Yaxın vaxtlarda bu şəxslər tərəfindən qumu oğurlanan bağ sahələri  və axşam saatlarında dövlət nömrə nişanı olmadan fəaliyyət göstərən yük maşınlarının fotoşəkillərini və videosüjeti sizlərə təqdim edəcəyik.

Ramil Yaquboğlu, xeberle.com