Xəbərlə” xəbər portalının (xeberle.com) “Sumqayıtın məmurlarını necə tanıyırıq?” rubrikasında bu dəfə Sumqayıt Nəqliyyat Departamentinin fəaliyyəti haqqında söhbət açılacaq.

Həmkarlarımıza belə bir sualla müraciət etdik:

“Sumqayıt Nəqliyyat Departamenti  və onun rəhbəri Mahir Nəbiyevin fəaliyyətini necə qiymətləndirirsiniz?"

Aytən Fərhadova, Meydan TV-nin əməkdaşı

-          7 saylı marşrutun intervalını, dayanacaqlararası zamanı artırmaq olar, bir də 7-lərin hər əyləci basdıqda çıxardıqları səs onların ofislərinə çatır, ya çatmır?

Zaur Əhməd, Mia.az saytının redaktoru

- Bu qurum barədə heç nə demək istəmirəm. Sözə heyfim gəlir. Qoçular nazirliyinin qoçu departamentidir.

Bəhruz Salmanov, Xeberlent.az saytının baş redaktoru

- Bir sıra marşrutların insanların işdən gec gəlməsini nəzərə alaraq axşam iş saatlarını artırsalar və sürücülərin peşakalığına nəzarət etsələr yaxşı olar.

Abbasəli Hüseyni, müstəqil jurnalist

-           Çox özündən razı və kobud məmur kimi. Şəxsən mən, ondan bir müsahibə aldım və onda gördüm. Müsahibə də Sumqayıtın çirkli avtobuslarına aid idi.

Rövşən Əliyev, Azad Azərbaycan Televiziyasının əməkdaşı

-          İstənilən dayanacaqda 10 dəqiqə durmaq kifayətdir ki, nəqliyyat sahəsinin hansı vəziyyətdə olmasına şahidlik edəsən. Şərq bazarının qarşısında və Kolxoz bazarının yanındakı dayanacaqların analoqu heç Zimbabvedə də yoxdur.

 Sübhan Arifoğlu, “Zaman və Biz” qəzetinin baş redaktoru

 Şəhərimizin marşrut sürücülərinin tez-tez həkim nəzarətindən keçirərək psixoloji durumları nəzərə alınmalıdır. Ayaqlarını qaza və ya əyləcə qoymaqlarından bəlli olur halları -nə halda olduqları. Bir də ki, avtobus marşrutlarının kimlərəsə məxsus olması onlara qarşı DYP –nin biganə qalmasına səbəb olur. Nəqliyyat qoçuları da elə bil tatamiyə çıxan sumoçular kimi qarınlarıyla hücuma keçir. Dayanacaq məsələləri də hər zaman aktual olaraq qalır ....

Məftun Ənvəroğlu, “Yeganə yol” qəzetinin baş redaktor müavini

- Sərnişindaşıma nəqliyyat sahəsində uzun illərdir (sonugörünməyən) bir xaos hökm sürür. Loru desək başdıbaşınalıqdır. Sərnişinlərin həyatlarını etibar etdikləri əksər sürücülər bildikləri tərzdə avtobusu və ya mikroavtobusu idarə etməkdədirlər. Nəqliyyat vasitələrində "bəzəyə" çevrilən, daha dəqiq desəm sürücülərin başı üzərindən asılan bir bildiriş sərnişinlərin gözünə girir: "Sərnişinlərdən xahiş olunur avtobusu dayanacaqdan kənar yerdə saxlamağı xahiş etməsinlər. Əks təqdirdə sürücü 50 manat cərimə olunacaq". Ancaq nə bu bildirişə əməl edən var, nə də 50 manat cərimə olunan. Şəhərimizdə gözoxşayan olmasa da, şüşəli dayanacaqlar (hərçənd bir çoxunun şüşələri artıq sökülüb) var. Amma bu dayanacaqlar vizual xarakter daşımaqla öz missiyalarını yerinə yetirirlər. Çünki 2 dayanacaq arasında bəzən sürücü idarə etdiyi avtobusu 10-15 dəfə saxlayıb sərnişin mindirib-düşürür. Sürücülərə etiraz etdikdə isə, cavabları "Nə edim, deyirlər saxla, mən də saxlayıram." olur. Və yaxud da, "planı necə verməliyəm?" cavabını eşitmək olur. Bundan başqa sürücülər arasında bəzən ralli yarışlarına da tamaşa etmək mümkündür. Sürücülər 20 qəpik uğrunda onlarla insanın həyatını təhlükə qarşısında qoyaraq "mübarizə" aparırlar. Sürücülər yolllarda ikinci, bəzən üçüncü zolaqdan sərnişin mindirib- üşürürlər. Bu da insan həyatını riskə atmaq deməkdir. Salonda papiros çəkmək, bayağı mahnılarla sərnişinlərin qulağını "mozol" edənlərdə az deyil... Bir sözlə, şəhərimizdə nəqliyyat sahəsində vəziyyət heç də ürəkaçan deyil.

 P.S: Əgər qeyd etdiklərimə Mahir Nəbiyev başda olmaqla, hər hansı bir departament işçisinin şəkk-şübhəsi varsa rahat xarici avtomobillərindən düşüb gəlsin,  birlikdə avtobusa əyləşib mənzilbaşına gedək.

Elkin Xəlilov, Qaynar.info saytının əməkdaşı

- Ümumiyyətlə Nəqliyyat Departamentinin fəaliyəti nəinki Sumqayıtda, bütünlüklə ölkənin hər yerində bərbad vəziyyətdədir. Sürücülərlə davranış, yolda özlərini aparmaqları və sairə bura daxildir. Sumqayıtda da bir neçə dəfə bu kimi mənfi hallarla rastaşmışam. Xüsusi olaraq da, avtovağzal tərəfdə vəziyyət çox bərbaddır. Burda Nəqliyyat Departamentinin əməkdaşları sürücülərlə istədikləri kimi rəftar edirlər. Ümid edirəm ki, bu məsələyə diqqət ayırarlar. Departmanetin rəhbəri Mahir Nəbiyev fəaliyyəti haqda isə elə bir ciddi məlumatım yoxdur, təəssüf ki.

Elnur Ağayev,  Xeberle.com saytının redaktoru

Sumqayıt Nəqliyyat Departamentinin və onun rəhbəri Mahir Nəbiyevin fəaliyyətini qiymətləndirmək üçün aşağıdakı məqamlara diqqət etmək kifayətdir:

- Dayanacaqdan kənarda saxlama və götürmə, neçə illərdir ki, bu problemin qarşısını ala bilmirik!

- Dayanacaqların bir çoxunun namünasib yerlərdə qoyulmasına görə (Şərq bazarı ətrafında 2 ədəd, bazarın yanında 1 ədəd və sair.) pik saatlarda tıxacların yaranması

- Bir qisim marşrut avtobuslarının (xüsusən əsas xətt olan 7 nömrənin avtobuslarının) içinin bərbad, baxımsız olması, kirli, natəmiz, antisanitar durumu, əyləc səsinin azı 1 km ətrafa yayılması

- Avtobus sürücülərinin bir-biri ilə yarışa girməsi, ötüşməsi, yolun nahamar yerlərindən necə gəldi sürmələri

- Axşam olmamış əksər marşrut avtobusların xəttən çıxması və ya yolunu dəyişməsi, misal olaraq axşam saatlarında 9 saylı marşrut

Ən əsası, Mahir müəllim söz verməsinə rəğmən (Sumqayıtda ilin yekunları ilə bağlı keçirilən hesabat konfransında ilin 1-ci rübü ərzində bütün kiçiktutumlu avtobusların xətdən çıxarılacağını söz vermişdi) hələ də sözünün üstündə durmayıb.

Çinarə Hüseynova,   müstəqil yazar

-Sürücüləri hansı kriteriyalarla seçirlər? Hardan tapıb gətirirlər bu əsəbi, danışıq qabiliyyətləri olmayan, sərnişinlərlə normal rəftar edə bilməyən, kobud, mədəniyyətsiz - ən əsası  avtobusu sürə bilməyən sürücüləri?

Xeberle.com