Xeberle.com-un məlumatına görə, yanğın 23 nömrəli məktəbdə olub. Belə ki, məktəbin 1-3-cü mərtəbələrində müxtəlif nöqtələrdə xırda yanğınlar qeydə alınıb. Yanğınsöndürənlər tərəfindən alov ram edilib və digər ərazilərə keçməsinin qarşısı alınıb.

Xeberle.com-un araşdırmasına görə, yanğının kənar təsirlərin müdaxiləsi nəticəsində baş verdiyi ehtimal edilir. Maraqlısı odur ki, məktəbin yan tərəfinin şüşəsi sındırılıb, güman ki, buradan içəriyə naməlum şəxslər daxil olub. Daha bir təəccüb doğuran hala diqqət çəkək. Əgər yanğın insan müdaxiləsi olmadan baş versə idi, eyni ərazidən baş verib digər hissələrə keçərdi. Amma bu baş verməyib.

Belə ki, 1-ci mərtəbədə iki stul, 3-cü mərtəbədə sinif otağında 5 kvadratmetr ərazidə şkaf, dəftər-kitab, otaqların birində süfrə və müəllimlər otağının qapısı yanıb. Bu baş verənlər yanğının qəsdən törədildiyini və naməlum şəxs və ya şəxslərin tez yanan materialları alışdırması ehtimalını daha da gücləndirir.

Fövqəladə Hallar Nazirliyinin yaydığı məlumatda isə bildirilir ki, orta məktəbin yerləşdiyi dördmərtəbəli binanın 3-cü mərtəbəsində 1 otağın giriş qapısı qismən, sahəsi 30 m² olan sinif otağında kitab şkafı və içərisinə yığılmış əşyalar 5 m² sahədə, dəhlizdə 2 ədəd stul və 1-ci mərtəbənin dəhlizində masanın üzərində parça örtük yanıb. 

Hadisə barədə ətraflı məlumat əldə etmək üçün məktəbin direktoru Reyhan Yunisovayla əlaqə saxladıq. Məktəb direktoru bunun qəsdən törədilmiş hadisə olmadığını və qısapanmadan yaranan yanğın olduğunu bildirdi. O, həmçinin qeyd etdi ki, məktəbin 3-cü mərtəbəsində olan bir sinifdə elektron lövhəyə gedən elektrik və internet xətlərinin qısapanmasından yanğın yaranıb və yanındakı taxta lövhəyə, pərdələrə də sıçrayıb: "Məktəb mühafizəçisi yanğını görərək dərhal Fövqəladə Hallar Nazirliyinin Yanğından mühafizə xidmətinə zəng edib. Fövqəladə Hallar Nazirliyinin əməkdaşları sinfə daxil ola bilmək üçün sinfin şüşələrini sındırıb. Yanğın dərhal zərərsizləşdirilib. Digər siniflərə də keçməsinin qarşısı alınıb. Qəsdən törədilmiş hadisə deyil”.

Xədicə Səxavətqızı

Xeberle.com