Xeberle.com-a müraciət edən Sumqayıt sakinləri bildirirlər ki, yaşadıqları şəhərdə «Nizami» Parkında, Sülh küçəsində və şəhərin iri ticarət obyektlərinin qarşısında pirotexnikanın açıq şəkildə satıldığını müşahidə etmək olar.

Məsələ ilə bağlı Sumqayıt şəhər İcra Hakimiyyətinin İstehsal və xidmət sahələri sektorundan münasibət öyrənmək cəhdlərimiz isə uğursuz alındı. Belə ki, telefon zənglərimizə cavab verən olmadı.

Xatırladaq ki, 2003-cü ildə 556 saylı qanuna əsasən partlayıcı maddə və qurğuların, eləcə də tezalışan maddələrin və pirotexniki vasitələrin mülki dövriyyəsi tamamilə qadağandır. Yalnız xüsusi icazə əsasında idxalına yol verilən bu tip qurğu, maddə və məmulatların vətəndaşlar tərəfindən ölkə ərazisinə gətirilməsi, satışı və istifadəsi qanunla qadağan olunub.

İstifadəsi yüksək səs-küylə müşayiət olunan, insan sağlamlığı üçün təhlükə törədən pirotexniki və tezalışan malların satışı aşkarlandığı halda İnzibati Xətalar Məcəlləsinin 224-cü maddəsinə əsasən fiziki şəxslər üçün buna görə 350-500 manat, vəzifəli şəxslər üçün isə 1650-2200 manat məbləğində cərimə də nəzərdə tutulub.

Yəqin ki, rəsmi qurumların bununla bağlı məntiqli bir açıqlaması olacaq.

Xədicə Səxavətqızı

Xeberle.com