Təəssüf ki, son günlər Sumqayıtda virusa yoluxanların sayında ciddi artım müşahidə olunur. Mütəxəssislərin fikrincə, müayinə nəticələrinin pozitiv say artımı karantin rejiminin yumşaldılması ilə bağlıdır. Bəziləri isə "xəstəlik yoxdur” deyib məsuliyyətsiz davranışları ilə nəinki özlərinin, doğma və yaxınlarının, habelə şəhərin bütün sakinlərinin sağlamlığını təhlükə altına alırlar. 

Əvvəl şəhər sakinləri fərdi qoruyucu vasitələrdən - tibbi maskalardan daha çox istifadəyə üstünlük verirdilərsə, artıq buna riayət olunmur, onlar sosial məsafəni qorumurlar.

Xeberle.com- un müşahidələrinə əsasən, ciddi karantin rejiminin ilk həftələrində küçədə 10 nəfərdən 5-6-da nəfərində maska görmək olurdusa, son günlərdə 1-2 nəfərdə belə maska görmək çətin olur. Bunun da nəticəsində Sumqayıtda ilk vaxtlar yoluxma 6, sonra isə 50-yə çatdı. Hazırda isə "Gənclər şəhəri”ndə yoluxma artıq 250-ni keçib.

Bu gündən iri ticarət mərkəzlərinin də açılmasını da nəzərə alsaq yoluxanların artacağı istisna edilmir.

Mənfi tendensiyanın artması çox təhlükəlidir. Odur ki, bütün Sumqayıt sakinlərindən aşağıdakı tədbirlərə əməl etmələrini xahiş edirik:

- Asqıran və öskürən zaman müvafiq etiket qaydalarına əməl edin: Öskürən və ya asqıran zaman ağzınızı və burnunuzu dirsəkdən bükülmüş vəziyyətdə qolunuzla yaxud salfetlə örtün, istifadə etdiyiniz salfeti dərhal atın və əllərinizi yuyun.

- Üzünüzə (ağız, burun, göz) toxunmayın

- Sosial məsafəni saxlayın: Digər insanlarla əl sıxaraq, qucaqlaşaraq və ya öpüşərək görüşməyin, onlarla öz qidanızı, mətbəx ləvazimatlarını, fincanları və dəsmalları bölüşməyin

- Soyuqdəymə və ya qrip simptomları müşahidə olunan şəxslərlə yaxın təmasdan çəkinin

- Özünüzə və ya övladınızda qızdırma, öskürək və ya nəfəs darlığı kimi əlamətlər müşahidə olunursa, vaxtında tibb müəssisəsinə müraciət edin

- Virusun təmas edə biləcəyi səthləri təmizləyin və, ümumilikdə, əşyaların səthini tez-tez təmizləyin (xüsusilə, ictimai yerlərdə).

Xeberle.com