"Sumqayıtda içməli su təminatı ilə bağlı heç bir problem yoxdur. Suya təlabatın çox olduğu aktiv günlərdə də bizim su ilə bağlı heç bir problemimiz yaşanmadı. Şəhər ötən ilki qədər, 150 min kub metr su ilə təmin olunub. Hər gün Sumqayıt şəhəri və ətraf qəsəbələrə (Hacı Zeynalabdin, Stansiya Sumqayıt və Bağlar Massivi) su ötürülür. Sakinlər içməli su ilə təmin olunub. Su ehtiyatını biz tənzimləmirik, biz sadəcə Ceyranbatan su anbarından suyu götürüb, təmizləyib istifadəçilərə ötürürük".
Bu sözləri Xeberle.com-a açıqlamasında "Azərsu" ASC-nin Mətbuat xidməti və ictimaiyyətlə əlaqələr şöbəsinin rəhbəri Anar Cəbrayıllı deyib. A. Cəbrayıllı Sumqayıt şəhərinin bəzi ərazilərinin su il təminatının fasilələrlə həyata keçirildiyini bildirib: "Sumqayıt şəhərində hələ də bəzi ərazilər var ki, 24 saat fasiləsiz deyil, suyu fasilələrlə alır. 17, 18, 12, 10, 9, 5-ci mikrorayonların bir hissəsi, o cümlədən 19, 20, 21, , 30, 42, 41, 45, 3, 4, 5, 7, 8 -ci məhəllələr günün müxtəlif saatlarında qrafiklə su alırlar. Səhər, axsam nasosla təyiqli su verilir həmin ərazilərə, günün qalan saatların da isə su öz təzyiqi ilə gəlir".
Qurum rəsmisi Sumqayıt şəhərində lokal problem yaşanan ərazilərin olduğuna da diqqət çəkib: "Bunlar ətraf ərazilərdir, Hacı Zeynalabdin qəsəbəsinin həyət evləri olan hissəsi, "Yaşıldərə" adlanan ərazilərdə su xətlərini insanlar özləri çəkib. Həmin ərazilərdə mərkəzləşmiş qaydada su xətti yoxdur.
Və bu da müəyyən hissələrdə lokal olaraq suyun təzyiqində problemlər yaradır. Ərazilərə kollektorlar vasitəsi ilə su ötürülür və bu da suyun təzyiqinin artdığı müddətlərdə problemlər yaradır. Sumqayıtda hazırda içməli su ilə ciddi nəzərəçarpacaq problemlər yoxdur. İşlərimiz gedir, problemlərin hamısının həll olunmasına çalışırıq. Bu günə qədər Sumqayıtda çox iş görülüb".
O, Sumqayıt şəhərində su təchizatı ilə bağlı problemlərin olmadığını qeyd edib: "80 faiz ərazi fasiləsiz olaraq içməli su ilə təmin olunur. Fərdi şəbəkələr, tikinti normalarına cavab verməyən şəbəkələrlə bağlı isə, bizim əlimizdə ilkin layihələr var. Azərbaycanda su layihələri dövlət büdcəsi və dövlətin zəmanəti ilə cəlb olunmuş beynəlxaq qurumlardan cəlb olunan kreditlər vasitəsi ilə həyata keçirilir. Bizə vəsaitlər ayrıldıqca mərhələli şəkildə işlər görürük".
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
