İslam dünyası rəbbiül-əvvəl ayının 12-17-si tarixlərini əziz İslam Peyğəmbəri Həzrəti Məhəmmədin (s) mövludu günləri kimi qeyd edir. İslamın böyük alimləri bu həftəni "Vəhdət həftəsi" elan ediblər.

Bu münasibətlə Sumqayıt şəhəri "Cümə" məscidində Hz. Məhəmməd və İmam Sadiq əleyhissalamlara həsr olunmuş möhtəşəm bir bayram tədbiri təşkil olunmuşdu. Bayramda şəhərin axundu Hacı Rauf başda olmaqla, bir çox alimlər, ziyalılar, məddahlar və möminlər iştirak edirdilər. İslam dininə uyğun olaraq tədbir müqəddəs Qurani-Kərimin tilavəti ilə başladı. Daha sonra, Hacı Rauf peyğəmbər və imamın həyatından danışaraq, tədbir iştirakçılarını məlumatlandırdı. Qafqaz Müsəlmanlar İdarəsinin (QMİ) tədbirdə nümayəndəsi Hacı Fuad Nurullayev və Dini Qurumlarla İş Üzrə Dövlət Komitəsinin Sumqayıt-Abşeron bölgəsi üzrə şöbə müdiri Azər Abbasov da iştirak edirdilər.

Tədbirdə iştirak edən ilahiyyatçı Seyid Fərrux, Katec qəsəbəsinin axundu Hacı Mir Fəyyaz, Corat qəsəbəsinin axundu Hacı Sahib, Ceyranbatan qəsəbəsinin axundu Mir Kazım və digər tanınmış bir çox alimlər o həzrətlərin həyatı barədə moizələr edərək insanları xoşhal etdilər. Bundan savayı, "Nur” nəğmələr qrupunun ifaçıları öz gözəl səslərilə tədbirə əsl bayram ab-havası qataraq, tədbir iştirakçılarını şənləndirdilər. Tədbirin sonu şam namazına təsadüf etdiyindən, cəm halda namazlar qılındı və Peyğəmbər və İmam (ə) adına açılmış ehsan süfrəsinə dəvət edildilər.

ABBASƏLİ Hüseyni