Prezident İlham Əliyevin əhalinin tibbi müayinədən keçirilməsi ilə bağlı verdiyi tapşırığa əsasən, respublikamızın hər yerində olduğu kimi, Sumqayıt şəhərində də tədbirlər planının uğurla icrasına başlanılıb. Profilaktik tibbi müayinələrin aparıldığı müəssisələr müəyyənləşdirilib və lazımi tibbi ləvazimatlarla təmin olunub. Tibbi müayinələrin aparılması həvalə olunmuş şəhərin 5 xəstəxanasında və 4 poliklinikasında əhaliyə nümunəvi xidmət göstərmək üçün tibb məntəqələri yaradılıb.
Şəhər səhiyyə şöbəsindən bildirilib ki, Sumqayıtın 333 min nəfərdən ibarət olan əhalisinin 233616-sını böyüklər, 99384-nü isə uşaqlar təşkil edir. Əhali profilaktik tibbi müayinələrin aparılması barədə əvvəlcədən məlumatlandırılıb. Hazırda sakinlər tibbin müxtəlif sahələri üzrə rentgen, ultrasəs, stomatoloq, terapiya, kardioqrama, laborator analizi və digər müayinələrdən keçirlər.
Fevralın 2-dən 9-dək böyük yaşlı əhalidən 35381 nəfəri tibbi müayinədən keçib. Müayinə olunanlar arasından 1349 nəfərdə xəstəliyin ilkin mərhələsi aşkar edilib, onlardan 1138 nəfərinə ambulator müalicə təyin edilib, 461 nəfər xəstəxanalarda yerləşdirilib.
Şəhərdə əhalinin böyük ruh yüksəkliyi ilə tibbi müayinədən keçməsi işin yüksək səviyyədə təşkilindən xəbər verir.
Qeyd edək ki, "Uşaqların icbari dispanserizasiyası haqqında” Azərbaycan Respublikasının Qanununa əsasən, 2013-cü ilin sentyabr ayından Sumqayıtın uşaq poliklinikalarında uşaqların icbari dispanserizasiyası aparılır.  (azertag.az)