Raminə Eyvazqızı

Musa Quliyev(Urud) illərdir, millətin vəkili kimi boy göstərir. Sabir Rüstəmxanlının təbirincə desək, Milli Məclisıdə varlığı-yoxluğu bilinməyən biridir.  Onun çıxışlarına daha çox Aztv-də qulaq asmaq olar. Deputat hərdən vətəndaş qayğısından elə danışır ki, adamın süni, pafoslu nitqinə əl çalmağı da gəlir. Musa müəllim  ixtisasca həkimdir. Bu gün onu xəstə baxıcısına veriləcək pul yardımı çox düşündürür. Özdə bu qədər xərclənən pullar arasında. O, əlil övladı olan və ona baxan valideynə(ana)hər hansı müavinətin verilməsini doğru saymır. Niyəsini belə izah edir ki, hər sağlamlıq imkanı məhdud  xəstə ovladı olana pul  vermək yalnışdır. Yalnız işləyən analar xəstə övladına görə işdən ayrılırsa, bu halda müavinətlə təmin olunmalıdır. Görəsən, böyük deputatlıq təcrübəsi olan Musa Urud bu məntiqsiz çıxışına özü də qulaq asıbmı? Ölkədə 100-lərlə əlil uşaq var, gələcəkdə nə qədər əlil uşaq olacağı da məlum deyil. Deputatın sözündən belə çıxır ki, ana xəstə uşağını atıb mütləq işləməlidir ki, sonra keçmiş işçi kimi yardım ala bilsin. Hansı işdə işləməsi, qeydiyyatda olub-olmaması Musa müəllimi heç maraqlandırmır da. Ona elə gəlir ki, uşaq yalnız hansısa yaşda əlil və xüsusi qayğıya ehtiyaclı ola bilər. Bəs doğuşdan əqli və fiziki məhdudiyyətlə dünyaya gələn uşaqlara saç ağardan analar, ailələr necə olmalıdır? Xəstə övladı olan və İşləməyən (işləyə bilməyən) analar aylıq verilən 60 (əlil uşağa)manatla necə dolanmalıdır? Musa müəlim, bu sizin bir dəfəlik çay dəsgahınızın pulu da eləmir? Və deyəsən unudursuz ki, əlil qalmaq proqramla baş tutmur, heç kəs əlillikdən sığortalanmayıb. Yaradanın işidir. Axı siz tibb işçisisiz, şair təbiətli millət vəkilimiz.
 Deyilənə görə, kirli vicdan daşımağın da bir aqibəti var. Demirəm ki, bizim bəzi deputatlar, hər hansı məmur aldığı halal maaşından, statusundan geninə-boluna istifadədən məhrum qalsın. Ya Odessa qubernatoru M. Saakaşvili kimi yol tikintisinə operativ nəzarət üçün çadırda qalsın. Yaxud Kanadanın gənc baş naziri Castin Trüdo kimi müqəddəs Ramazanın ilk günündə iftar süfrəsi açsın. Erməni deputatlar kimi aylıq maaşını hərbçi ailəsinə bağışlasın. Sadəcə cüzi heysiyyat kifayətdir, hər davranışın bir çüt alqışı və ya qarğışı var,axı.
Haşiyə. Məlum rüşvət videoları ilə hər kəsin  etibarına xəyanət edən Gülər Əhmədova yenə ictimai təşkilat yaradır. Psixologiya elmlər namizədi, eks-deputat bir vaxtlar uşaq hüquqları ilə məşğul idi, indi  nə haqla psixoloji yardım təklif edəcək, maraqlıdır? Sabah yenidən deputat  olsa heç təəccüblənməyək də.
Bəlkə vicdanı kirayə və kreditlə də almaq olur, xəbərimiz yoxdur?    

Xəbərdən istifadə edərkən istinad etmək vacibdir.