Azərbaycanım müstəqilliyə hamilə olduqda çox sevindim. Amma mutasiya qismində doğulmuş övladlarını gördükdə qolum-qanadım qırıldı. Biz sovetlərdən ayrılanda sevindik ki, özümüzə, yəni milli məfkurəmizə, dinimizə, sağlam mental təfəkkürümüzə qayıdacağıq. Sən demə, son 200 ildə çar Rusiyası, yüz ildə də sovet siyasi təfəkkürü məmləkətimin bətnində eybəcər bir "gələcək" toxumunu gizlədibmiş. Odur ki, doğulmuş həmin mutantlar Dədə Qorqudu, Şah İsmayılı, Füzulini yemək istəyir. Postmodern cərəyan adı altında bu eybəcər varlıqlar gah ateist, gah bütpərəst, gah da yalançı millətçi şəklində zühur edir. Ən pisi də budur ki, belə eybəcər varlıqlar arasında partiya sədrləri, deputatlar, yazıçı-xalq şairi, media rəhbərləri də var. Bəli, İslam maarifi ilə çar Rusiyasının siyasi sintezindən törəmiş Axundov bu gün də yaşayır. Cılız təfəkkürə malik yazarlar tərəfindən yaşadılsa da belə!