Bu gün Sumqayıtda N. Nərimanov adına Mədəniyyət Evində şair-jurnalist Asif Asimanın 60 illiyinə həsr edilmiş yubiley tədbiri keçirilib. 
Tədbirin aparıcısı, aktyor İzaməddin Bağırov A. Asimanın yaradıcılığından geniş bəhs edib, onun ilk növbədə bir vətənpərvər şair olduğunu diqqətə çatdırıb. Qeyd edib ki, onun əsərlərində milli vətənpərvərlik ruhu öndə durur.
Yubiley gecəsində şairin qələm dostları ilə yanaşı, yerli ictimaiyyət nümayəndələri və ziyalılar da iştirak ediblər.     
Ziyalılardan Hacı Cəfər Quliyev, şairlərdən Əşrəf Veysəlli, Rafiq Oday və başqaları çıxış edərək A. Asimanı 60 illik yubileyi münasibətilə təbrik edib, şairin həyat və yaradıcılığı barədə danışıb, ona yeni yaradıcılıq uğurları arzulayıblar.  
Yubiley gecəsində şairə fəxri fərmanı və qiymətli hədiyyə təqdim edilib.   
Gecənin sonunda çıxış edən A. Asiman tədbirin təşkilatçılarına və iştirakçılara minnətdarlığını bildirib, yeni şeirlərini oxuyub.  
Qeyd edək ki, Azərbaycan Yazıçılar Birliyinin üzvü olan Asif Asimanın indiyə kimi 7 şeir və 1 publistik kitabı çap edilib. "Ürəkdə od varsa", "Bu da bir taledi", "Sabah", "Ömrümə-günümə açılan yollar", "Bitməyəcək ölənəcən bu sevdam", "Unutsaq unudularıq", "Mənim Dəniz sevgim", "Bu dünyaya qərib gəldim" "Biz niyə vaxtında görüşməmişik...” kitablarının müəlifidir. 
Məlumat üçün bildirək ki,  Asif  Quliyev (Asiman)  1955-ci ildə Ordubad rayonunun Disər (indiki Başkənd) kəndində müəllim ailəsində anadan olub.Orta təhsilini Əvəz Sadıq adına Vənənd kənd orta məktəbində 1972-ci ildə başa vurub. elə həmin ildə də Bakı Politexnik Texnikumunun "Gündüz Mexanika şöbəsi"nə daxil olub. Oradan da birbaşa Ukrayna SSR-in Vinitsa vilayətinə hərbi xidmətə yola düşüb. Hərbi xidməti 1975-ci ildə başa vurduqdan sonra Bakıya qayıtmış və təhsilini davam etdirib.
1977-ci ilin may ayında gənc mütəxəssis kimi Sumqayıtda yerləşən Azərboru zavoduna təyinatla göndərilib.İstehsalatdan ayrılmadan 1987, 1988, 1989-cu illərdə Azərbaycan Jurnalistika Sənətkarlığı İnstitutunda təhsil alıb.
1986-1994-cü illərdə 49 nömrəli (indiki 4 nömrəli) Texniki Peşə Liseyində istehsalat təlimi ustası işləyib. 1994-cü ildən bu günədək Sumqayıt şəhər 9 nömrəli tam orta məktəbdə əmək təlimi müəllimi kimi çalışmaqdadır.
Eyni zamanda "Yeganə yol" və "Məslək" qəzetlərinin xüsusi müxbiridir.Azərbaycan Yazıçılar Birliyinin və Azərbaycan Jurnalistlər Birliyinin üzvüdür.Bədii yaradıcılığa orta məktəb illərində başlayıb.İlkin publisistik fəaliyyəti dövründə "Yeni Ordubad", "Yeni həyat", "Sovet Naxçıvanı", "Sosialist Sumqayıtı" qəzetləri ilə əməkdaşlıq edib.
Xeberle.com