Doğulandan bir tufan var sinəmdə,
Sinəmdəki o tufana borcluyam.
Nə qanırsan "yox" içində "var" nədir,
Mən bu Haqqa qana-qana borcluyam.
Ya dağdan düş,ya da başa düş məni,
Düşmürsənsə,düşmənimsən,düşmənim!
Allaha da borcum yoxdur heç mənim,
Bu dünyada tək bir cana borcluyam.
Bilmək olmur çölün nədir,için nə,
O nə qurddur yatıb qalıb içində?!
Elə dedin camaatın içində,
Guya inək,guya dana borcluyam!
Löyun-löyun yeməyindir toy-düyün,
Qabağına çıxacaqdır tökdüyün.
Bəsdir məni misra-misra sökdüyün,
Heç demirəm,mən atana borcluyam?!
Dilənirsən,hər çiynində xurcun var,
Uğur olsun,nə uğursuz bürcün var?!
Sənin bütün Sumqayıta borcun var,
Nə olub ki,mən də sana borcluyam!
Xoflanırsan,çox uzağam "xox"dan mən,
Sən ox atdın,çəpər çəkdim oxdan mən,
Tüpürmüşəm bu taleyə çoxdan mən,
Günümə bax,bir nadana borcluyam!
Təmiz cibim cibin kimi dolammaz,
Pul dediyin biz tərəfə dolanmaz!
Mənim sənə heç vaxt borcum olammaz,
O verdiyin "beş şirvana" borcluyam....

Zirəddin Qafarlı