Məlumdur ki, dünən Azərbaycan Yazıçılar Birliyinin (AYB) Sumqayıt şəhər şöbəsinə yeni sədrin təyinatı ilə bağlı təqdimat mərasimi keçirilib. Təqdimatda Gülnarə Cəmaləddin şöbənin sədri təyin edilib.  Xeberle.com olaraq AYB-nin üzvü olan sumqayıtlı yazarların bu seçimə münasibətini öyrəndik:

 

Rafiq Oday, Azərbaycan Respublikasının Yazıçılar və Jurnalistlər Birliyinin üzvü, Azərbaycan Jurnalistlər Birliyi Sumqayıt şəhər təşkilatının sədri, «Azərikimya» İstehsalat Birliyinin mətbuat xidmətinin rəhbəri, «Möhtəşəm Azərbaycan» ictimai-siyasi, ədəbi-bədii qəzetinin təsisçisi və baş redaktoru, şair, publisist:"Mən dünən Sumqayıtdan kənarda olduğum üçün həmin tədbirdə iştirak edə bilmədim. Amma orada iştirak etsəydim də, Gülnarə Cəmaləddinin seçimini təqdirəlayiq hal kimi dəyərləndirərdim. AYB-nin Sumqayıt şəhər şöbəsi təxminən 20 ildir ki, fəaliyyət göstərir. O vaxtı rəhmətlik Sabir Sarvanın seçimində də onun sədrlikdən çıxarılması üçün müəyyən qruplaşmalar oldu. Mən düşünürəm ki, ədəbi camiədə qruplaşma müsbət hal deyil. Çünki bu hal ədəbiyyatın inkişafına təkan vermək əvəzinə, onu daha da geriyə salır. Gülnarə Cəmaləddin bütün dövrlərdə öz səmimiyyətini, mədəniyyətini, oturuşunu-duruşunu bilən bir xanımdır, şair kimi də onun çox gözəl qələmi var. Ola bilsin ki, bu seçimin əleyhinə olanlar var, amma əksəriyyət onu dəstəkləyən insanlardır. Əksəriyyət dedikdə  söhbət təbii ki, mən də daxil olmaqla AYB-nin üzvlərindən gedir”.

 

Günel Eyvazlı, Azərbaycan Yazıçılar Birliyinin üzvü, gənc yazar: "Şöbəyə kimsə təyin olunmalı idi və düşünürəm ki, kimin təyin olunmasından asılı olmayaraq müəyyən söz-söhbətlər olacaqdı. Mən deməzdim ki, bu, uğurlu, təqdirəlayiq  seçimdir. Sadəcə ona uğurlar arzu etməklə kifayətlənirəm”.

 

İbrahim İlyaslı, Sumqayıt Poeziya Evinin direktoru, Azərbaycan Yazıçılar Birliyinin üzvü, tanınmış şair: "Mənim bu məsləyə heç bir münasibətim yoxdur”.

 

Ofelya Babayeva, Azərbaycan Yazıçılar Birliyinin üzvü, şair: "Mən həmin xanımın nə yaradıcılığı ilə tanışam, nə də ki, özünü çox yaxından tanımıram. Ona görə də bu haqda fikir deyə bilmərəm”. 

 

Əyyub Qiyas, Azərbaycan Yazıçılar Birliyinin üzvü, nasir, tərcüməçi, dramaturq, şair: "Mən elə bir şair tanımıram və mənə elə gəlir bu seçim Sumqayıtda yaşayan yazarlara, kifayət qədər tanınan,nüfuzu və yaradıcılığı olan qələm adamlarına qarşı bir təhqirdir. Deyirlər ki, onun seçimi Allah rəhmət eləsin, Sabir Sarvanın vəsiyyəti ilə olub. Amma mən düşünürəm ki, bu, çox absurddur. Görək inşallah Gülnarə xanım kimi vəsiyyət edəcək”.

 

Əvəz Mahmud Lələdağ, Azərbaycan Yazıçılar Birliyinin, Azərbaycan Jurnalistlər Birliyinin və Aşıqlar Birliyinin üzvü, şair: "Çox dəyərli insandır və AYB-nin Sumqayıt şöbəsi yaranandan həmin xanım oradadır. Hamını,bütün yazıçıları, şairləri tanıyır və özü də gözəl şairdir. Yəni çox keyfiyyətli və təqdirəlayiq seçimdir”.
Təyinatla bağlı Azərbaycan Yazıçılar Birliyinin katibi Rəşad Məcid ilə əlaqə saxladıq. Onun sözlərinə görə, sədr katibliyin qərarı ilə təyin olunur. O bildirib ki, qərar mayın 5-də verilsə də, təqdimat mərasimi dünən keçirilib.
Qeyd edək ki, Xeberle.com olaraq Gülnarə Cəmaləddinin də mövqeyini təqdim etməyə hazırıq.
Elnarə Salamova
Xeberle.com

Xəbərdən istifadə edərkən istinad etmək vacibdir.