Bildiyiniz kimi dekabrın 13-də Qəbələ şəhərində ağır yol-nəqliyyat hadisəsi baş verib.
Qəbələ şəhərində 10 KJ 200 dövlət nömrə nişanlı "Mercedes-Benz Gelandewagen” markalı avtomobil digər 10 BZ 555 dövlət nömrə nişanlı "Mercedes-Benz Gelandewagen”lə toqquşub.

Məlumata əsasən ciddi xəsarət alan olmasa da, avtomobillər yararsız hala düşüb.

Qeyd edək ki, "Mercedes-Benz Gelandewagen” markalı avtomobilin orta qiyməti 120-150 min ABŞ dolları təşkil edir.

Xeberle.com-un əldə etdiyi məlumata görə, qəzaya düşən avtomobil sahiblərini Sumqayıtla bağlayan məqamlar var. Belə ki, aldığımız məlumata əsasən, 10 KJ 200 dövlət nömrə nişanlı "Mercedes-Benz Gelandewagen” markalı avtomobil Sumqayıtın maliyyə oliqarxlarından biri, "Karvan” Ticarət Mərkəzinin rəhbəri Ağamirzə Əhədovun nəvəsi Aqşin Əhədova məxsusdur. O, həmçinin Abşeron Rayon İcra Hakimiyyətinin başçısı Zakir Fərəcovun qardaşı deputat Nazim Fərəcovun kürəkənidir. A.Əhədov Dövlət Əmək Müfəttişliyi Xidmətinin Sumqayıt şəhər 7 saylı Regional Dövlət Əmək Müfəttişliyinin rəisi vəzifəsində çalışır. 1987-ci ildə anadan olmuş Aqşin Əhədov həmin vəzifəyə ötən ilin dekabrında təyin olunub və kifayət qədər imkanlı şəxs kimi tanınır.

Xatırlayırsınızsa, bir müddət öncə onun ABŞ-ın Texas ştatında fəaliyyət göstərən "Hennesey Performance” tüninq şirkəti tərəfindən xüsusi sifariş əsasında yığılan və Azərbaycana gətirilən "Mercedes-Bens G63 AMG Gelandewagen” avtomobilinin sahibi olduğu barədə məlumatlar yayılmışdı.
Məsələni diqqətdə saxlayaraq daha dəqiq məlumat əldə etməyə çalşacağıq.