Azərbaycan qazı növbəti illər ərzində Avropa istehlakçıları üçün yeganə yeni qaz mənbəyi olacaq.

Bunu prezident İlham Əliyev fevralın 12-də Bakıda "Cənub Qaz Dəhlizi" Məşvərət Şurası çərçivəsində keçirilən nazirlərin görüşündə bildirib: "İndi görüşün keçirilməyi üçün çox münasib bir vaxtdır. Bu il "Cənub Qaz Dəhlizi" layihəsinin praktiki olaraq həyata keçirilməyinə başlanılır. Bu layihə bizi birləşdirir. Onunla bağlı əlavə əlaqələndirmə, fikir mübadiləsi lazımdır."

Dövlət başçısı Azərbaycanın dünyada neft hasil edən ilk ölkə kimi tanındığını vurğulayıb: "Bu, XIX əsrin ortalarında baş verdi. Eyni zamanda, XX əsrin ortalarında dənizdə neft hasil edən ilk ölkə də Azərbaycandır. Bu səbəbdən Azərbaycanın neft sənayesinin tarixi çox zəngindir. Onu da bildirmək istəyirəm ki, İkinci dünya müharibəsində Azərbaycanda istehsal olunan neft Sovet İttifaqının hasil etdiyi neftin 80%-ni təşkil edirdi. Azərbaycan neftçiləri faşizm üzərində qələbənin əldə edilməyinə böyük töhfə veriblər. Bəlkə də Azərbaycan nefti olmasaydı, İkinci dünya müharibəsinin nəticələri başqa cür olardı.

Lakin Sovet İttifaqının süqutu zamanı neft sənayesindəki vəziyyət ürəkaçan deyildi. Quruda olan yataqlar əsasən tükənmişdi. Azərbaycan 1991-ci ildə müstəqilliyini bərpa edərkən ölkənin neft sənayesi böhran içərisində idi. Biz təkcə neft sənayesində deyil, həmçinin ciddi hərbi, siyasi, iqtisadi böhranla üzləşdik. Vətəndaş müharibəsi, Ermənistanın işğalı baş verdi. Nəhəng neft yataqlarımızın işlənməyi üçün nə maliyyə ehtiyatlarımız, nə də texniki imkanlarımız var idi. Yalnız Heydər Əliyev 1993-cü ildə prezident seçildikdən sonra vəziyyət sabitləşdi, vətəndaş müharibəsi dayandı, biz islahatlara başladıq. İslahatların mühüm elementlərindən biri Azərbaycanı dünyaya açmaq idi. Biz Azərbaycana xarici sərmayələr cəlb etməyə başladıq, ölkədə çox yaxşı sərmayə mühiti yaratdıq. Bu fakt sayəsində Azərbaycanın indiki iqtisadiyyatı davamlıdır, sabitdir. Birbaşa xarici sərmayələrin adambaşına olan həcminə görə Azərbaycan keçmiş Sovet məkanında aparıcı yerdədir.

1994-cü il Azərbaycanın yeni enerji strategiyasının başlanğıc ili olub. Azərbaycan hökuməti ilə dünyanın əsas neft şirkətləri arasında müqavilə imzalandı. Bu müqavilə "Əsrin müqaviləsi” adını aldı. Bu, sərmayələrin həcmi və resurs əsası kimi götürülən "Azəri-Çıraq-Günəşli” yatağının dünyadakı ən böyük neft yataqlarından biri olmağı faktı ilə bağlı idi.

20 ildən çoxdur ki, həmin yataq işlənilir və ölkəmizdə neft hasilatının əsas özəyi hesab olunur. Buna görə də 1994-cü il enerji strategiyasının başlanğıc ili oldu. Beləliklə, Xəzər dənizi ilk dəfə olaraq xarici sərmayələr üçün açıq elan edildi. (interaztv.com)