Sosial şəbəkələrdə 2 nömrəli Sumqayıt şəhər xəstəxanasının ləğv ediləcəyi və personalın isə işdən azad ediləcəyi ilə bağlı iddialar yayılıb.
Yayılan bu iddialara Sumqayıt şəhər Səhiyyə Şöbəsinin müdiri Səkinə Sadıxova aydınlıq gətirib. S. Sadıxova
Xeberle.com-a açıqlamasında belə fikirlərin heç bir əsası olmadığını və həqiqəti əks etdirmədiyini bildirib. Şöbə müdirinin sözlərinə görə, 2 nömrəli Sumqayıt şəhər xəstəxanasının yeni binasının tikintisi başa çatanadək tibb müəsisəsinin personalı müvəqqəti olaraq Sumqayıt şəhər Dəri Zöhrəvi Dispanserində və digər tibb müəssisələrinə yerləşdirilib:
"Aprelin 1-dən Sumqayıtda tibbi sığortanın tətbiqi ilə bağlı tibb müəssisələrində hazırlıqlar aparılır və personalın yenidən yerdəyişməsi aparılır. İcbari Tibbi Sığortaya hazırlıq işləri çərçivəsində 2 saylı xəstəxananın tibb personalının yerdəyişməsi edilir. Lakin bu o demək deyil ki, kim isə işsiz qalacaq və ya yerləşdirilməsi gecikdiriləcək. Şöbələr üzrə tibb işçiləri təmirli xəstəxanalara yerləşdiriləcək. 2 nömrəli xəstəxana istifadəyə verildikdən sonra isə, öz yerlərində, əvvəl olduğu qaydada işlərinə davam edə biləcəklər”.
Xatırladaq ki. 2 nömrəli şəhər xəstəxanası çox profilli olub və 1992-ci ildə istifadəyə verilib.
Qeyd edək ki, 2019-cu ildən isə ölkə başçısının sərəncamına əsasən xəstəxana binası yenidən tikilir.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
