Bu gün Xeberle.com informasiya portalının yaranmasından 13 il ötür.

Xeberle.com informasiya portalı üç jurnalist - Elnur Ağayev, Ramil Zeynallı, və Kamal Almuradlı tərəfindən 2012-ci ildə iyunun 28-də Sumqayıt şəhərində yaradılıb. Əsas məqsədi doğma şəhərin ictimai, siyasi, sosial və mədəni həyatında baş verən hadisə və yenilikləri, aktual problemləri oxucularının diqqətinə çatdırmaq, həmçinin şəhərin tarixi şəxsiyyətləri, istedadlı, uğur qazanmış gənclərini təbliğ etməkdir. Sayt bu illər ərzində yüzlərlə xəbər, müsahibə, reportaj və digər janrlarda materiallar hazırlayaraq təqdim edib, Sumqayıtda bir sıra problemin həllində vasitəçi olub.
Bununla belə, portal regional informasiya resursu kimi çıxış edərək Abşeron yarımadası və Xızıda, həmçinin ölkə və regionda baş verən ən mühüm xəbərlərə də yer ayırır. Gündəlik xəbər yayımı ilə bərabər, müxtəlif video və fotoreportajlar, araşdırmalar, müsahibələr, sosioloji rəy sorğuları, siyasətdən şou-biznesə, idmandan texnologiyalara qədər istənilən mövzuda materiallar təqdim edir. Təsadüfi deyildir ki, portal yaradıldığı vaxtdan az bir müddət sonra ölkənin də media həyatında mühüm yer tutmağa başlayıb, həmçinin çevik, dəqiq və etibarlı informasiya mənbəyi kimi özünü təsdiqləyib. Xeberle.com-un gündəlik 12-15 min oxucusu olur. Burada paylaşılan materiallar həmçinin portala məxsus böyük facebook, instagram, telegram və tik-tok sosial şəbəkə hesablarında da yayımlanır. Facebook (Sumqayıt Rəsmi Səhifə - 65k user) və Instagram (Sumqayıt Rəsmi Səhifə - 75k user) sosial şəbəkələrində Sumqayıt üzrə ən böyük səhifələrə sahibdir. Bu səhifələrdə də tərəfdaşlarının bütün məlumatları paylaşılır və daha çox baxış sayına müvəffəq olur.
Portal Azərbaycan Mətbuat Şurasının üzvüdür.
Sayt tərəfindən Sumqayıt şəhərində ilk dəfə olmaqla gənc media həvəskarlarına 3 dövr ərzində "Jurnalistika kursları” adlı təlimlər təşkil olunub. 
Portalın əməkdaşları Azərbaycanla yanaşı, Gürcüstan, Türkiyə, Ukrayna, Çexiya, Latviya və sair ölkələrdə media və PR sahələri üzrə müxtəlif təlim və layihələrdə iştirak ediblər. 
Portal Sumqayıtda bir sıra dövlət və özəl təşkilatlar, həmçinin QHT-lərlə sıx əməkdaşlıq edir.