Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maddi dəstəyi, Rabitə və Yüksək Texnologiyalar Nazirliyinin tərafdaşlığı ilə "Vətənpərvər Maarifçi Gənclər” İctimai Birliyi tərəfindən cəbhəyanı rayonlarda təşkil edilmiş "Elektron hökumət” mövzusunda seminarlar başa çatıb.
Xeberle.com məlumat verir ki, 21-22 oktyabr tarixlərində Bərdə və Tərtər rayonlarında start verilən layihə, 4-5 noyabr tarixlərində Ağdam və Goranboyda keçirilən seminarlarla yekunlaşıb.
"Vətənpərvər Maarifçi Gənclər" İctimai Birliyinin, Məlumat Hesablama Mərkəzinin, Yerli icra hakimiyyəti orqanlarının nümayəndələrinin iştirak etdiyi seminarlarda ümumilikdə 300-dən artıq yerli sakin iştirak edib.
Seminarlarda şəffaf sosial münasibətlərin qurulmasında elektron xidmətlərin rolundan danışılıb. Həmçinin vahid xidmət məkanı olan "Elektron hökumət" portalının bugünkü fəaliyyəti və gələcək prioritetləri barədə məlumat verilib. Məlumat Hesablama Mərkəzinin mütəxəssisi portal vasitəsilə təqdim olunan 418 xidmət üzrə ən çox müraciət olunan xidmətlərdən danışıb.
Seminar zamanı müxtəlif məzmunlu arayışların elektron şəkildə əldə edilməsi əhali tərəfindən yüksək qiymətləndirilib. Portalın "Fikir Bank", "Əks-Əlaqə" və "Onlayn Konsultasiya" kimi köməkçi funksiaları barədə seminar iştirakçıları məlumatlandırılıb.
Sonda iştirakçılara sertifikat və hədiyyələr təqdim olunub.










 
 
            

Xəbərdən istifadə edərkən istinad etmək vacibdir.