2015-ci ildən etibarən milli valyutanın 2 dəfə dəyərdən düşməsi, Mərkəzi Bankın "üzən məzənnə” siyasətinə keçməsi bütün sahələrdə olduğu kimi, dərman bazarına da ciddi təsir edib. Belə ki, aptekə müraciət edən vətəndaşlara "yoxdur” cavabını verərək, səbəbi həmin dərman pereparatlarının depoda olmadığını bildirirlər.
Vətəndaşlar həkim tərəfindən yazılan reseptdəki dərmanlardan 5-dən 3-nü tapa bilmir.
Çünki Tarif Şurası noyabrın 28-də keçirdiyi kollegiya iclasında10166 dərman preparatının yer aldığı siyahıda dərman vasitələrinin qiymətini əhəmiyyətli şəkildə artırıb. Şuranın məlumatına görə, həmin gün 300-dən artıq yeni dərman vasitəsinin satış qiymətləri təsdiq edilib, eləcə də indiyədək təsdiq olunmuş dərman vasitələrinin qiymətləri manatın hazırkı məzənnəsinə uyğunlaşdırılıb. Şuranın bu qərarı noyabrın 29-dan artıq qüvvəyə minib.
Səhiyyə Nazirliyi Analitik Ekspertiza Mərkəzinin İctimaiyyətlə əlaqələr üzrə mütəxəssisi Esmira Ələkbərova Modern.az-ın sorğusuna cavab olaraq bildirib ki, ölkə ərazisində dərman pereparatlarını çatışmazlığı problemi yoxdur:
"Azərbaycan Respublikasında qeydiyyatda olan dərman vasitələrinin analoqu var. Hər hansı konkret dərmanın qıtlığı varsa, bizə müraciət etməyinizi xahiş edirik”.
Qeyd edək ki, "Avromed” Qapalı Tipli Səhmdar Cəmiyyəti də ölkədə dərman pereparatlarının çatışmazlığının ilmadığını bəyan edib:
"Azərbaycanın əczaçılıq bazarında 10 mindən çox adda dərman preparatları var. Bir və ya bir neçə aptekdə müəyyən dərman preparatlarının olmaması heç də bütün ölkədə dərman qıtlığının olması demək deyildir. Dünyanın heç bir ölkəsində heç bir aptekdə 10 min adda dərman ehtiyatının daim mövcud olması mümkün deyil. Hər hansı bir aptekdə müəyyən dərmanın istənilən anda olmamasının isə bir çox səbəbləri ola bilər. Bir sıra inkişaf etmiş ölkələrdə olduğu kimi, Azərbaycanda da qüvvədə olan qanunvericilik reseptdə dərman adlarının deyil, tərkibinin yazılmasını tələb edir. Bu səbəbdən dərman brend adları ilə deyil, tərkibi ilə axtarılsa, əminik ki, hər aptekdə eynitərkibli bir çox adda dərman preparatları tapmaq mümkündür. Belə ki, brend adları ilə tanınan dərman preparatlarının demək olar ki, hamısının eyni tərkibə malik olan onlarla alternativi var”.
Xəbərdən istifadə edərkən istinad etmək vacibdir.
